Read Мукъаддес Китап къырымтатар тилинде, Башланув 22 Bible Online

Башланув 22 - Мукъаддес Китап къырымтатар тилинде, bible

Башланув 22

¹Бу вакъиалардан сонъ, бир кунь Алла Ибраимни сынады. — Ибраим! — деди Алла. — Мен мындам, — деди о.

²— Озь севимли, бирден-бир огълунъ Исхакъны ал да, Мория топрагъына бар. Анда Мен санъа айтаджакъ байырларнынъ биринде огълунъны къурбан чал ве бутюнлей якъ, — деди Алла.

³Ибраим саба эрте турды, эшегини екти, янына эки хызметчи огъланыны ве озь огълу Исхакъны алды. Чалынаджакъ къурбанны бутюнлей якъмакъ ичюн одун парлап, онъа Алла айткъан ерге ёл алды.

⁴Учюнджи куню Ибраим о ерни узакъта корьди.

⁵— Мында эшекнен къалып турунъыз, — деди Ибраим хызметчи огъланларгъа. — Мен исе огъланнен берабер анда барып, ибадет этермиз ве сизге къайтырмыз.

⁶Ибраим чалынаджакъ къурбанны бутюнлей якъмакъ ичюн одунларны алып, огълу Исхакънынъ аркъасына къойды. Озю исе къолуна пычакъ ве атешни алды. Бойлеликнен олар экиси берабер кеттилер.

⁷— Бабам, — деди Исхакъ бабасына. — Не, огълум? — деп джевап берди Ибраим. — Мына атеш ве одунлар, амма къурбан айваны къайда я? — деди Исхакъ.

⁸— Огълум, Алла Озюне къурбан айванны тапар, — деди Ибраим. Сонъ олар экиси берабер ёлны девам эттирдилер.

⁹Олар, Алла Ибраимге айткъан ерге кельдилер. Анда Ибраим къурбан чалынгъан ерни къурды, одунларны азырлады ве, огълу Исхакъны багълап, къурбан ери устюне, одунлар тёпесине къойды.

¹⁰Сонъ, огълуны соймакъ ичюн, Ибраим къолуны узатып, пычакъ алды.

¹¹Лякин РАББИнинъ Мелеги коктен оны: — Ибраим, Ибраим, — деп чагъырды. — Мен мындам, — деди о.

¹²— Огълангъа къаршы къолунъны котерме, онъа асыл бир шей япма, чюнки энди Мен билем ки, сен Алладан къоркъасынъ ве бирден-бир огълунъны Манъа бермеге аджымадынъ, — деди Мелек.

¹³Ибраим бакъып, артында, чалы-чырпы ичинде бойнузларындан сарылып къалгъан къочкъарны корьди. Ибраим барып, къочкъарны алды ве огълу ерине оны къурбан чалып бутюнлей якъты.

¹⁴Ибраим о ернинъ адыны Яхве-Ире [27] деп къойды. Онынъ ичюн шимди де: «РАББИнинъ байырында тапылыр», — деп айталар.

¹⁵РАББИнинъ Мелеги Ибраимни экинджи кере коктен чагъырып,

¹⁶онъа бойле деди: — РАББИ бойле деп айта: «Озюмнен ант этем ки, сен бу ишни бойле япкъанынъ ичюн ве озюнинъ бирден-бир огълунъны Манъа бермеге аджымагъанынъ ичюн,

¹⁷Мен сени берекетли багъышларым ве эвлятларынъны кок йылдызлары дайын, денъиз ялысындаки къум дайын чокъ сайылы этерим. Сенинъ эвлятларынъ душманларыны енъеджеклер ве бойсундыраджакълар.

¹⁸Сенинъ эвлятларынъ ярдымынен ер юзюндеки эписи миллетлер багъышланырлар, чюнки сен Мени динълединъ».

¹⁹Сонъ Ибраим хызметчи огъланларына къайтты, ве олар берабер Беэр-Шевагъа кеттилер. Ибраим Беэр-Шевада ерлешти.

²⁰Бу вакъиалардан сонъ, бир кунь Ибраимге бойле хабер кетирдилер: — Мына Милка Нахор къардашынъа огълан балаларны тапты:

²¹Уцны — бу биринджи догъгъан огълу, Бузны — онынъ къардашы, Кемуэлни — Арамнынъ бабасы,

²²Кеседни, Хазоны, Пилдашны, Идлафны ве Бетуэлни.

²³Бетуэлнинъ Рефикъа адлы къызы олды. Ибраимнинъ къардашы олгъан Нахоргъа Милка мына бу секиз огълан баланы тапты.

²⁴Нахорнынъ джариеси олгъан Реума да онъа Тевах, Гахам, Тахаш ве Маакъа адлы балаларны тапты.