Read Мукъаддес Китап къырымтатар тилинде, Башланув 23 Bible Online

Башланув 23 - Мукъаддес Китап къырымтатар тилинде, bible

Башланув 23

¹Саре 127 йыл яшады; будыр онынъ яшайыш йыллары.

²Саре Кирьят-Арбада, я да Хевронда, Ханаан топрагъында кечинди. Ибраим барып Саре артындан окюр-окюр яныкълап агълады.

³Сонъ кечинген апайындан кери чекилип, Ибраим Хетнинъ огъулларына бойле деди:

⁴— Мен сизинъ аранъызда кельмешек олып, вакътынджа яшагъан адамым. Кечинген апайымны мезаргъа къоймакъ ичюн, аранъыздан манъа озь мульк оларакъ мезар ери беринъиз.

⁵Хет огъуллары, Ибраимге бойле джевап бердилер:

⁶— Эфендимиз, бизни динълесе. Сен бизим арамызда Алланынъ мырзасысынъ. Энъ яхшы къабирлеримизден биринде кечинген апайынъны дефн эт. Бизим арамыздан ич биримиз санъа кечинген апайынъны дефн этмек ичюн къабир бермеге «ёкъ» демез.

⁷Ибраим турып, о ернинъ халкъына — Хет огъулларына — бель букти

⁸ве оларгъа: — Эгер сиз меним кечинген апайымны мезаргъа къояджагъыма разы олсанъыз, ялварам, меним адымдан Цохарнынъ огълу Эфрондан

⁹онынъ тарласынынъ четинде олгъан Макъпела къобасыны манъа бергенини, оны сизинъ аранъызда кумюшнен яхшы фияткъа манъа саткъаныны соранъыз. О, дефн этмек ичюн, меним мулькюм олсун, — деди.

¹⁰Эфрон исе Хет огъулларынынъ арасында отура эди. Бу хитли олгъан Эфрон, Хет огъулларына эшиттирип, онынъ шеэр араба къапусына кельген эписи адамларгъа эшиттирип, Ибраимге бойле джевап берди:

¹¹— Ёкъ, эфендим! Мени динълесе: мен санъа тарланы берейим, устюндеки къобаны да санъа берейим, халкъымнынъ козю огюнде оны санъа бахшыш этейим. Кечинген апайынъны дефн эт.

¹²Ибраим о ернинъ халкъына бель букип,

¹³оларгъа эписине эшиттирип, Эфронгъа бойле деди: — Мени динълесе! Мен санъа бу тарла ичюн кумюш берейим. Оны менден ал, ве мен анда озь кечинген апайымны дефн этейим.

¹⁴Эфрон Ибраимге бойле джевап берди:

¹⁵— Эфендим, динълесе! Бу ер 400 кумюш [28] тура — бизим арамызда бу акъча олдымы? Дефн эт кечинген апайынъны.

¹⁶Ибраим Эфроннынъ айткъанларына разы олды, ве Хет огъуллары эшиткенлерине коре, не къадар айтса, о къадар кумюш, базиргянларда юрген ольчюге коре, 400 кумюш ольчеп Эфронгъа берди.

¹⁷Бойлеликнен, Мамре къаршысындаки, Макъпела янындаки Эфроннынъ тарласы: тарласы ве устюндеки къоба, ве тарлада олгъан эписи тереклер тарланынъ этрафындаки сынъырларында,

¹⁸шеэр араба къапусына кельген эписи Хет огъулларынынъ козю огюнде, Ибраимнинъ мулькю олды.

¹⁹Бундан сонъ Ибраим озюнинъ апайыны Сарени Ханаан топрагъында, Мамре — я да Хеврон — къаршысында, Макъпеладаки тарланынъ къобасында дефн этти.

²⁰Бойле этип, тарла ве устюндеки къоба мезарлыкъ мулькю киби Хет огъулларындан Ибраимге кечтилер.