Read Мукъаддес Китап къырымтатар тилинде, Башланув 25 Bible Online

Башланув 25 - Мукъаддес Китап къырымтатар тилинде, bible

Башланув 25

¹Ибраим даа бир кере эвленди, апайынынъ ады Кетура эди.

²О, Ибраимге Зимран, Йокшан, Медан, Мидьян, Ишбакъ ве Шуах адлы огълан балаларны тапты.

³Йокшаннынъ Шева ве Дедан адлы балалары олды. Деданнынъ огъуллары: Ашшурим, Летушим ве Леуммимдир.

⁴Мидьяннынъ огъуллары будыр: Эфа, Эфер, Ханох, Авида ве Элдаа. Олар эписи Кетуранынъ эвлятларыдыр.

⁵Ибраим бутюн олгъан барлыгъыны огълу Исхакъкъа берди.

⁶Джариелеринден олгъан огъулларына исе Ибраим бахшышлар берип, оларны озю даа сагъ олгъанда, огълу Исхакътан четке, шаркъкъа — шаркъ топракъларына ёллады.

⁷Эписи олып, Ибраим 175 йыл яшады.

⁸О, баягъы яшта олгъан къарт олып, яшайышкъа тойып кечинди ве баба-деделерине кетти.

⁹Огъуллары Исхакъ ве Исмаил, Ибраимни Мамренинъ къаршысында олгъан, Цохар огълунынъ хитли Эфроннынъ тарласындаки Макъпела къобасында дефн эттилер.

¹⁰Бу тарланы Ибраим Хетнинъ огъулларындан сатын алгъан эди. Анда Ибраим ве онынъ апайы Саре дефн этильгендирлер.

¹¹Ибраим кечинген сонъ, Алла онынъ огълу Исхакъны багъышлады. Исхакъ Беэр-Лахай-Рои янында яшады.

¹²Мына Ибраимнинъ огълу Исмаил (оны Ибраимге Саренинъ хызметчиси мысырлы Хагар тапты) ве онынъ эвлятлары акъкъында ривает.

¹³Буюгинден башлап кичкенесине баргъандже, Исмаил огъулларынынъ адлары будыр: Невайот (Исмаилнинъ биринджи догъгъан огълу), Кедар, Адбеэл, Мивсам,

¹⁴Мишма, Дума, Масса,

¹⁵Хадад, Тема, Етур, Нафиш ве Кедма.

¹⁶Бу Исмаилнинъ огъуллары ве он эки халкъ башлыкъларынынъ адлары. Оларнынъ адлары, койлерининъ ве къасабаларынынъ адлары олдылар.

¹⁷Исмаил эписи олып, 137 йыл яшады. Сонъ о кечинди ве баба-деделерине кетти.

¹⁸Онынъ эвлятлары Шургъа тараф Мысыр огюнде олгъан Хавиладан башлап Шургъадже ерлештилер. Олар озь агъа-къардашларынен душманлыкъта яшай эдилер.

¹⁹Мына Ибраимнинъ огълу олгъан Исхакъ ве онынъ эвлятлары акъкъында ривает. Ибраимнинъ Исхакъ адлы огълу олды.

²⁰Исхакъ 40 яшында олгъанда, о, Паддан-Арамдан олгъан арамлы Бетуэлнинъ къызы Рефикъагъа эвленди. Рефикъа, арамлы Лаваннынъ къыз-къардашы эди.

²¹Исхакъ апайы акъкъында РАББИге дуа этти, чюнки о бала тапып оламай эди. РАББИ Исхакънынъ дуасыны эшитти, ве онынъ апайы Рефикъа юклю олды.

²²Онынъ ичинде олгъан огъуллары талашып башладылар, ве Рефикъа: «Бу манъа не ичюн олды?» — деп тюшюнди ве барып РАББИден сорады.

²³РАББИ онъа бойле деди: — Къурсагъынъда эки миллет, ве ичинъден эки тюрлю халкъ айырылып пейда оладжакълар. Олардан бир халкъы башкъасындан кучьлюдже оладжакъ, ве буюги кичкенесине хызмет этеджек.

²⁴Онъа догъмагъа вакъыт кельди, ве иште къурсагъында эгизлер экен.

²⁵Биринджиси бутюн къырмызы ве юньлю урба киби чыкъты; онынъ адыны Исав деп къойдылар.

²⁶Артындан, Исавнынъ табаныны къолунен тутып, къардашы чыкъты. Онъа Якъуп [31] деген ад къойдылар. Олар догъгъанда, Исхакъ алтмыш яшында эди.

²⁷Балалар буюдилер. Исав уста авджы, тарла адамы олды. Якъуп исе — чадырларда яшагъан юваш адам олды.

²⁸Исхакъ Исавны севе эди, чюнки о, ав этини бегене эди. Рефикъа исе Якъупны севе эди.

²⁹Бир кунь Якъуп аш пиширгенде, Исав тарладан болдурып-узюлип къайтты.

³⁰Исав Якъупкъа: — Манъа анавы къырмызыдан берчи ашамагъа, — деди. — Мен болдурдым. Бунынъ ичюн онъа Эдом [32] деген лагъап бердилер.

³¹Якъуп исе Исавгъа: — Сен манъа биринджи догъгъан акъкъынъны сат, — деди.

³²— Мен ачтан олерим, — деди Исав. — Биринджи догъгъанымнынъ акъкъындан манъа не файда?

³³— Башта емин эт, — деди Якъуп. О, емин этти ве Якъупкъа биринджи догъгъанынынъ акъкъыны сатты.

³⁴Сонъ Якъуп Исавгъа отьмек ве берджимек шорбасыны берди, ве о, ашап ичти ве сонъ турып кетти. Бойлеликнен, Исав биринджи догъгъанынынъ акъкъыны козь огюне биле алмады.