Read Мукъаддес Китап къырымтатар тилинде, Башланув 27 Bible Online

Башланув 27 - Мукъаддес Китап къырымтатар тилинде, bible

Башланув 27

¹Исхакъ къартайгъанда, козьлери ярамай корип башлагъанда, о, озюнинъ буюк огълу Исавны чагъырды. — Огълум! — деди онъа Исхакъ. — Мен мындам, — деди онъа огълу.

²— Мен энди къартайдым, — деди Исхакъ. — Даа не къадар яшайджагъымны бильмейим.

³Озь алетлеринъни — яйынъны ве окълугъынъны — алып, тарлагъа авгъа чыкъ.

⁴Мен севген лезетли ашны азырла ве манъа кетир. Сонъ мен ашарым ве ольмезден эвель джаным сени багъышлар.

⁵Рефикъа исе Исхакънынъ огълу Исавгъа айткъанларыны эшитти. Исав ав этинден кетирмек ичюн тарлагъа авгъа чыкъкъан сонъ,

⁶Рефикъа огълу Якъупкъа бойле деди: — Мен бабанънынъ Исав агъанъа:

⁷«Манъа ав этинден кетирип лезетли аш азырла да, мен ашарым ве олюмимден эвель РАББИнинъ огюнде сени багъышларым», — деп айткъаныны эшиттим.

⁸Шимди исе, огълум, мен санъа буюргъан шейни динъле.

⁹Къой-эчкилер сюрюсине бар да, манъа андан эки яхшы бакъылгъан улакъ кетир. Мен олардан бабанъ севген лезетли ашны азырларым.

¹⁰Сен исе оны бабанъ огюне алып кетерсинъ, ве о, ашар ве ольмезден эвель сени багъышлар.

¹¹— Агъам Исав юньлю адамдыр, — деди Якъуп анасы Рефикъагъа. — Меним терим исе тегиз.

¹²Барып да, бабам мени тутып бакъса, ве мен онынъ юзю огюнде яланджы олып, башыма багъышлав дегиль де, къаргъыш къазансам?

¹³Лякин анасы онъа: — Огълум, сенинъ къаргъышынъ манъа олсун, тек айткъанымны динъле, бар да, кетир сорагъанымны, — деди.

¹⁴Якъуп барып улакъларны алды ве анасына кетирди. Анасы исе онынъ бабасы севген лезетли ашны азырлады.

¹⁵Сонъ Рефикъа эвинде олгъан буюк огълу Исавнынъ энъ яхшы урбаларыны алып, кичик огълу Якъупнынъ устюне кийдирди,

¹⁶къолларыны ве тегиз бойнуны исе улакъларнынъ терисинен сарды.

¹⁷Сонъ азырлагъан лезетли ашнен отьмекни огълу Якъупнынъ къолуна берди,

¹⁸ве Якъуп, бабасына кирип: — Бабам! — деди. — Мен мындам, — деди бабасы. — Огълум, сен кимсинъ?

¹⁹— Мен Исав, сенинъ биринджи догъгъан огълунъ, — деди бабасына Якъуп. — Сен манъа насыл айттынъ, мен ойле де яптым. Тур ве отурып ав этинден аша, сонъ да джанынъ мени багъышласын.

²⁰— Огълум, — деди бабасы. — Не о къадар тез тапып кельдинъ я? — РАББИ, сенинъ Алланъ, оны меним къаршыма ёллады, — деди Якъуп.

²¹— Кельчи яныма, огълум, — деди Исхакъ Якъупкъа. — Мен сени тутып бакъайым, огълум Исав сен экенсинъми-ёкъмы?

²²Якъуп бабасы Исхакънынъ янына барды, ве о, Якъупны тутып бакъты ве: — Сеси Якъупнынъ, къоллары Исавнынъ, — деп тюшюнди.

²³Онынъ къоллары агъасы Исавнынъ къоллары киби юньлю олгъанлары ичюн, Исхакъ Якъупны танымады ве оны багъышлады.

²⁴Исхакъ деди ки: — Керчектен де, сен меним огълум Исавсынъмы? — Эбет, мен, — деди о.

²⁵— Манъа ав этинден ашамагъа бер, огълум, — деди Исхакъ. — Ве джаным сени багъышлар. Якъуп бабасына ашнен шарапны алып берди, ве о, ашап-ичти.

²⁶Сонъ бабасы Исхакъ онъа: — Огълум, яныма келип мени опь, — деди.

²⁷Якъуп бабасынынъ янына келип оны опьти. Исхакъ онынъ урбасындан кельген къокъуны алып, оны багъышлады ве бойле деди: — Мына, РАББИ багъышлагъан тарладан кельген къокъу дайын, меним огълумнынъ къокъусы.

²⁸Алла санъа кок чыкъыны, ернинъ энъ яхшы махсулларыны ве ашлыкънен шарапнынъ бол-берекетини берсин.

²⁹Санъа халкълар хызмет этсинлер, ве миллетлер бель буксюнлер. Агъаларынъа акимдарлыкъ эт, ве ананънынъ огъуллары санъа бель буксюнлер. Сени къаргъагъан адамлар къаргъышлы олсун, Сени багъышлагъан адамлар исе багъышлангъан олсунлар!

³⁰Исхакъ огълу Якъупны багъышлагъан сонъ, ве Якъуп бабасы Исхакънынъ юзю огюнден янчыкъ чыкъкъанда, онынъ агъасы Исав авдан къайтты.

³¹О да лезетли ашны азырлады ве бабасына келип, онъа: — Тур, бабам, огълунъ кетирген ав этинден аша ве сонъ мени багъышла, — деди.

³²Бабасы Исхакъ исе ондан: — Сен кимсинъ? — деп сорады. — Мен сенинъ огълунъ! — деди Исав. — Сенинъ биринджи догъгъан огълунъ Исав!

³³Исхакъ къоркъусындан чокъ титреп башлады ве бойле деди: — Я, сен кельмезден эвель манъа ав этинден кетирип ашаткъан ве мен оны багъышлагъан ким эди? Энди о, багъышлангъан оладжакъ.

³⁴Исав, бабасынынъ сёзлерини эшитип, буюк ве аджджы толу къыямет къопарды ве бабасына: — Бабам! Мени де багъышла, — деди.

³⁵Лякин онынъ бабасы онъа: — Сенинъ къардашынъ айнеджиликнен келип, сенинъ багъышланувынъны алды, — деди.

³⁶— Тевекель онынъ адыны Якъуп [34] деп къоймадылар, — деди Исав. — О энди эки кере мени алдатты. О, меним биринджи догъгъан акъкъымны алды, шимди исе, мына, багъышланувымны алды! Ве даа къошты: — Аджеба, сен манъа да багъышланув къалдырмадынъмы?

³⁷— Мен оны сенинъ устюнъе акимдар этип къойдым, эписи агъа-къардашларыны да онъа къуллукъкъа бердим, — деп джевап берди Исхакъ Исавгъа. — Ашлыкънен шарапны да онъа бердим. Сен ичюн мен не япып олурым, огълум?

³⁸Лякин Исав бабасына: — Бабам, аджеба, сенинъ тек бир дане багъышланувынъ бар эдими? Бабам, мени де багъышла, — деди ве юксек сеснен агълап башлады.

³⁹Сонъ бабасы Исхакъ онъа бойле деп джевап берди: — Динъле! Яшагъан ерлеринъ кок чыкъындан ве берекетли ерден узакъ оладжакътыр.

⁴⁰Къылычынъ не тапса, онен яшайджакъсынъ ве къардашынъа хызмет этеджексинъ. Лякин вакъыт келир, ве сен исьян котерип, онынъ зулумыны бойнунъдан алып ташлайджакъсынъ.

⁴¹Якъуп бабасындан багъышлавны алгъаны ичюн, Исавнынъ оны корьмеге козю ёкъ эди, ве Исав юрегинде: «Бабама янып агълайджакъ куньлеримиз якъынлаша, ве мен къардашым Якъупны ольдюририм», — деди.

⁴²Лякин Рефикъагъа буюк огълу Исавнынъ сёзлерини етиштирдилер, ве о, озюнинъ кичик огълу Якъупны чагъырттып, онъа бойле деди: — Агъанъ Исав сени ольдюрмеге истей.

⁴³Динъле, огълум, айткъанларымны: Харангъа, меним агъам Лавангъа къач.

⁴⁴[44-45] Анда, агъанънынъ гъазабы кечип, санъа къаршы олгъан ачувы ятышып, сен япкъанынъны агъанъ унутмагъандже, бир къач вакъыт яшап тур. Сонъ мен адам ёлларым ве сени андан алырым. Бир куньде экинъизни джоймагъа истемейим.

⁴⁵

⁴⁶Рефикъа Исхакъкъа бойле деди: — Бу хитли къызларындан яшайышым козюме корюнмей. Эгер Якъуп да буларгъа ошагъан, бу ернинъ хитли къызларындан олгъан хитли къызны апай этип алса, манъа яшайыш не керек?