Read Мукъаддес Китап къырымтатар тилинде, Башланув 28 Bible Online

Башланув 28 - Мукъаддес Китап къырымтатар тилинде, bible

Башланув 28

¹Исхакъ Якъупны чагъырып оны багъышлады ве онъа бойле огют берди: — Ханаан къызларындан озюнъе апай алма.

²Тур да, Паддан-Арамгъа, ананънынъ бабасы Бетуэлнинъ эвине бар. Андан, дайынъ олгъан Лаваннынъ къызларындан озюнъе апай ал.

³Къудретли Алла сени багъышласын, сени арттырсын ве чокъ сайылы этсин. Сенден пек чокъ халкъ асыл олсун.

⁴Сен вакътынджа яшагъан, Алла Ибраимге берген топракъкъа саип ол, Ибраимге берген багъышлавны О, санъа ве эвлятларынъа берсин.

⁵Сонъ Исхакъ Якъупны йиберди, ве о, Паддан-Арам топрагъына, арамлы Бетуэлнинъ огълу олгъан Лавангъа, Рефикъанынъ агъасына кетти. Рефикъа Якъупнынъ ве Исавнынъ анасы эди.

⁶Исхакъ Якъупны багъышлагъаныны, Якъупны багъышлап апай алмакъ ичюн Паддан-Арамгъа ёллагъаныны, «Ханаан къызларындан апай алма», — деген огют бергенини,

⁷ве Якъуп ана-бабасынынъ айткъанларыны динълеген сонъ, Исав Паддан-Арамгъа кеткен эди.

⁸О вакъыт Исав, Ханаан къызлары бабасы Исхакънынъ юрегине ятмагъанларыны анълады.

⁹Сонъ Исав Исмаилге барып, Ибраимнинъ огълу Исмаилнинъ къызы олгъан Махалатны — Невайотнынъ къыз-къардашыны — озюне даа бир апай этип алды.

¹⁰Якъуп исе Беэр-Шевадан чыкъып Харангъа ёл алды.

¹¹Бир ерге келип, о анда геджелемеге токътады, чюнки кунеш къавушкъан эди. О ернинъ ташларындан бирини алды да, башынынъ тюбюне къойып анда ятты.

¹²О, бойле тюш корьди: ер устюнде мердивен тура, онынъ тёпеси исе коклерге тие, ве Алланынъ Мелеклери онынъ устюнден котериле ве эне эдилер.

¹³Онынъ устюнде РАББИ тура эди ве Якъупкъа бойле деп айта эди: — Мен — РАББИм, деденъ Ибраимнинъ Алласы ве Исхакънынъ Алласыдырым. Сен яткъан топракъны санъа ве эвлятларынъа береджегим.

¹⁴Эвлятларынъ топракъ тозу дайын чокъ сайылы оладжакъ ве гъарп ве шаркъкъа, шималь ве дженюпке даркъалып яшайджакъ. Сенинъ ве сенинъ эвлятларынъ ярдымынен бутюн ер юзюндеки халкъларны багъышларым.

¹⁵Мен сеннен оладжагъым. Къайда бармасанъ, эр ерде сени къорчаларым ве сени бу ерге къайтарырым, чюнки санъа айткъанымны япмагъандже, сени къалдырмайджагъым.

¹⁶Якъуп юкъудан уянды ве: — Керчектен де бу ерде РАББИ бар экен, мен исе бильмей эдим, — деди.

¹⁷Къоркъып, о: — Не къадар къоркъунчлы экен бу ер. Бу — Алланынъ эвидир, башкъа бир шей дегиль. Кок къапуларыдыр бу! — деди.

¹⁸Саба эрте турып, Якъуп башынынъ тюбюне къойгъан ташны алып, оны абиде этип догъру тиклеп къойды ве устюне зейтюн ягъы тёкти.

¹⁹Бу ернинъ адыны Якъуп Бет-Эль [35] деп къойды, эвель исе о шеэр Луз деп адлана эди.

²⁰Сонъ Якъуп бойле сёз берди: — Эгер Алла меним янымда олса, мен кеткен ёлумда мени къорчаласа ве манъа ашамакъ ичюн отьмек ве киймек ичюн урба берсе,

²¹эгер мен эсен-аман бабамнынъ эвине къайтсам ве РАББИ меним Аллам олса,

²²мына бу мен абиде этип къойгъан таш Алланынъ эви олур, ве Сен манъа бергенлеринъден он пайда бир пайыны Санъа береджегим.