Read Мукъаддес Китап къырымтатар тилинде, Башланув 29 Bible Online

Башланув 29 - Мукъаддес Китап къырымтатар тилинде, bible

Башланув 29

¹Ёлуны девам этип, Якъуп шаркъ огъулларынынъ топрагъына кельди.

²Якъуп бакъып, тарлада къуюны ве онынъ янында къой-эчкилерининъ учь сюрюси яткъаныны корьди; адамлар сюрюлерге къуюдан сув бердилер. Къуюнынъ агъзы балабан ташнен япылгъан эди.

³Анда бутюн сюрюлер топлангъан сонъ, ташны четке юварлатып къоя эдилер ве къой-эчкилерге сув бере эдилер. Сонъ ташны кене озюнинъ ерине, къуюнынъ агъзына къоя эдилер.

⁴— Агъаларым, сиз къайдансынъыз? — деп сорады чобанлардан Якъуп. — Харанданмыз, — деп джевап бердилер олар.

⁵— Сиз Нахорнынъ торуны олгъан Лаванны билесинъизми? — деп сорады олардан Якъуп. — Билемиз, — дедилер олар.

⁶— Сагъ-селяметми о? — деди Якъуп. — Сагъ-селямет, — дедилер олар. — Мына онынъ къызы Рахель де къой-эчкилерни айдап келе.

⁷— Кунь даа ярыгъа етмеди, айванларны къайтармагъа вакъыт кельмеди, — деди Якъуп чобанларгъа. — Къой-эчкилерге сув беринъиз де, барып отлатынъыз.

⁸Лякин олар: — Эписи сюрюлер топланмагъандже, биз бир шей япып оламаймыз. О вакъыт ташны къуюнынъ агъзындан четке юварлатырлар да, биз къой-эчкилеримизге сув берермиз, — дедилер.

⁹Олар лакъырды этип тургъанда, бабасынынъ къой-эчкилеринен берабер Рахель кельди. О, оларны отлата эди.

¹⁰Дайысы Лаваннынъ къызы Рахельни ве дайысы Лаваннынъ къой-эчкилерини корип, Якъуп якъынлашып, къуюнынъ агъзындан ташны алып четке юварлатты ве дайысынынъ къой-эчкилерине сув берди.

¹¹Сонъ Якъуп Рахельни опьти ве окюр-окюр агълап,

¹²эмджеси олгъаныны ве Рефикъанынъ огълу олгъаныны айтты. Рахель чапып кетти ве эписини бабасына айтты.

¹³Лаван, татасынынъ огълу Якъуп акъкъында эшиткен сонъ, онынъ къаршысына чапып чыкъты, оны къучакълап опьти ве эвине алып кетти. Якъуп Лавангъа бутюн олгъан шейни айтып берди,

¹⁴ве Лаван онъа: — Керчектен де сен меним кемигим, меним вуджудымсынъ! — деди. Якъуп онда бир ай отурды.

¹⁵Сонъ Лаван Якъупкъа бойле деди: — Аджеба сен меним союм олгъанынъ ичюн, манъа бес-бедава хызмет этеджексинъ? Насыл акъ тёлейим санъа, айт.

¹⁶Лаваннынъ исе эки къызы бар эди: буюгининъ ады Леа эди, кичигининъ исе — Рахель.

¹⁷Леанынъ козьлери зайыф эди, Рахель исе эм тюз эндамлы, эм дюльбер эди.

¹⁸Якъуп Рахельге севда олды ве Лавангъа: — Мен сенинъ кичик къызынъ Рахель ичюн санъа еди йыл хызмет этеджегим, — деди.

¹⁹— Яхшы, — деди Лаван. — Оны башкъасына бергендже, санъа бергеним яхшы. Менде къала бер.

²⁰Бойлеликнен, Якъуп Рахель ичюн еди йыл хызмет этти, ве олар онынъ козюне бир къач кунь дайын корюндилер, чюнки о, Рахельни севе эди.

²¹Ахыры-сонъу Якъуп Лавангъа: — Апайымны манъа бер, чюнки хызметимнинъ вакъты битти, ве мен онъа эвленмеге истейим, — деди.

²²Лаван о ернинъ эписи адамларыны топлап той япты.

²³Акъшам исе Лаван къызы Леаны алды да, Якъупкъа кирсетти, ве Якъуп онен ятты.

²⁴Леагъа хызмет этмек ичюн Лаван онъа озь хызметчиси Зилпаны берген эди.

²⁵Саба исе бу Леа олгъаны ачылды! — Бу сенинъ меннен япкъанынъ недир? — деп сорады Якъуп Лавандан. — Мен санъа Рахель ичюн хызмет этмедимми? Не ичюн сен мени алдаттынъ?

²⁶— Бизим тарафларда биринджи догъгъан къыз акъайгъа чыкъмагъандже, кичигини бермеге адет ёкъ, — деди Лаван.

²⁷— Мына Леанынъ той афтасы кечсин де, сонъ, сен манъа даа еди йыл хызмет эткенинъ ичюн, биз санъа Рахельни де берермиз.

²⁸Якъуп ойле де япты. Той афтасы кечкен сонъ, Лаван къызы Рахельни онъа акъайгъа берди.

²⁹Лаван къызы Рахельге, онъа хызмет этмек ичюн, озь хызметчисини Билханы берген эди.

³⁰Якъуп Рахельнен де ятты. О, Рахельни Леадан зияде севе эди. Якъуп Лавангъа даа еди йыл хызмет этти.

³¹РАББИ Якъупнынъ Леаны корьмеге козю олмагъаныны корьди ве онынъ къурсагъыны бала-чагъалы этти; Рахель исе бала тапып оламай эди.

³²Леа юклю олып, огълан бала тапты ве: «РАББИ меним кедеримни корьди, ве энди акъайым мени север», — деп, онынъ адыны Рубен [36] деп къойды.

³³Леа кене юклю олды ве огъул тапты. «РАББИ акъайымнынъ мени корьмеге козю олмагъаныны эшитти ве манъа бу баланы да берди», — деп, онынъ адыны Шимеон [37] къойды.

³⁴Кене юклю олып, огълан бала тапты ве: «Энди акъайым манъа япышыр, чюнки мен онъа учь огълан таптым», — деди. Бунынъ ичюн онынъ адыны Левий [38] деп къойды.

³⁵Сонъ кене юклю олып, кене огълан тапты ве: «Бу сефер РАББИни макътарым!» — деди. Онынъ ичюн огълунынъ адыны Ехуда [39] деп къойды. Бундан сонъ бала тапмакъны токътатты.