Read Мукъаддес Китап къырымтатар тилинде, Башланув 30 Bible Online

Башланув 30 - Мукъаддес Китап къырымтатар тилинде, bible

Башланув 30

¹Рахель озю Якъупкъа бала тапып оламагъаныны корип, татасыны пахыллап башлады ве Якъупкъа: — Манъа бала бер, — деди. — Бермесенъ эгер, мен олерим.

²Якъупнынъ Рахельге ачувы чыкъып, о, онъа: — Мен Алла дегилим! О, санъа бала бермеди! — деди.

³— Мына меним хызметчим Билха, — деди Рахель. — Онен ят, ве, мен ондан балалы олайым деп, о, манъа бала тапсын.

⁴Рахель хызметчиси Билханы онъа апай оларакъ берди, ве Якъуп онен ятты.

⁵Билха юклю олып, Якъупкъа огълан бала тапты.

⁶— Алланынъ козю догъру, — деди Рахель. — Керчектен де О, мени эшитип, манъа огълан бала берди. Онынъ ичюн огъланнынъ адыны Дан [40] деп къойды.

⁷Рахельнинъ хызметчиси Билха исе кене юклю олды ве Якъупкъа даа бир огълан тапты.

⁸— Алланынъ кучюнен мен татамнен курештим, — деди Рахель, — ве гъалип чыкътым. Онынъ ичюн огъланнынъ адыны Нафтали [41] деп къойды.

⁹Леа исе, озю бала тапмакъны токътаткъаныны корип, Зилпаны алып, Якъупкъа апай оларакъ берди.

¹⁰Сонъ Зилпа, Леанынъ хызметчиси, Якъупкъа огълан бала тапты.

¹¹— Не къадар къысмет! — деди Леа ве онынъ адыны Гад [42] деп къойды.

¹²Сонъ Леанынъ хызметчиси Зилпа Якъупкъа экинджи огълан бала тапты.

¹³— Бу меним бахтыма! — деди Леа. — Энди апайлар мени бахытлы деп саярлар. Ве онынъ адыны Ашер [43] деп къойды.

¹⁴Бир заманда, богъдай орулгъан вакъытта Рубен барып, тарлада мандрагор [44] махсулларыны тапты ве оларны анасы Леагъа кетирди. Рахель Леагъа: — Огълунъ кетирген мандрагорлардан манъа берсе, — деди.

¹⁵— Акъайымны менден тутып алгъанынъ аз олдымы санъа? — деди Леа. — Энди огълум кетирген мандрагорларны да алмагъа истейсинъми? — Огълунънынъ мандрагорларыны манъа берсенъ эгер, — деди Рахель, — акъайым бугунь гедже сеннен ятар.

¹⁶Акъшам Якъуп тарладан къайткъанда, онынъ къаршысына Леа чыкъып онъа: — Бугунь манъа кир, чюнки мен сени огълум кетирген мандрагорларгъа сатын алдым, — деди. Ве о геджеси Якъуп Леанен ятты.

¹⁷РАББИ Леаны эшитти, ве Леа о геджеси кене юклю олды ве Якъупкъа бешинджи огълан баланы тапты.

¹⁸— Бу, — деди Леа, — акъайыма хызметчимни бергеним ичюн манъа Алланынъ мукяфатыдыр. Ве онынъ адыны Иссасхар [45] деп къойды.

¹⁹Леа кене юклю олды ве Якъупкъа алтынджы огълан баланы тапты.

²⁰— Алла манъа аджайип бахшыш берди, — деди Леа. — Энди акъайым манъа урьмет этеджек, чюнки мен онъа алты огълан бала таптым, — ве огълунынъ адыны Зевулун [46] деп къойды.

²¹Сонъ Леа къыз бала тапты ве онынъ адыны Дина деп къойды.

²²Алла Рахельни де хатырлады, оны эшитти ве къурсагъыны бала-чагъалы этти.

²³Рахель юклю олды ве огълан бала тапып: — Алла меним масхаралыгъымдан азат этти, — деди.

²⁴Рахель онынъ адыны Юсуф [47] деп къойды ве: — РАББИ манъа даа бир огълан бала берсин, — деди.

²⁵Рахель Юсуфны догъгъан сонъ, Якъуп Лавангъа бойле деди: — Манъа озь ериме, озь топрагъыма кетмеге разылыкъ бер де, мен къайтайым.

²⁶Апайларымнен балаларыма да меннен кетмеге разылыкъ бер, чюнки мен олар ичюн санъа хызмет эттим. Насыл чалышкъанымны озюнъ билесинъ.

²⁷— Сенинъ козюнъде урьмет къазангъан олсам, мени динъле, — деди онъа Лаван. — Сенинъ хатиринъ ичюн РАББИ мени багъышлагъаны фалда чыкъты.

²⁸Озюнъе насыл мукяфат истесенъ, мен санъа берерим.

²⁹— Насыл чалышкъанымны ве мен олгъанда айванларынъ насыл яхшы олгъанларыны озюнъ билесинъ, — деди Якъуп. —

³⁰Мен кельгенде, айванларынъ аз эди, энди исе чокъ олды! Меним келювимнен РАББИ сени багъышлады. Лякин озь эвим ичюн мен не вакъыт чалышаджагъым?

³¹— Не берейим санъа? — деди Лаван. — Манъа сенден бир шей керекмей, — деди Якъуп. — Айткъанымны япсанъ эгер, мен кене сенинъ къой-эчкилеринъни бакъарым ве къорчаларым.

³²Бугунь эписи къой-эчкилерни айланып чыкъайым да, олардан эписи бенекли ве чубар айванларны, къозулардан эписи къара сойларыны, улакълардан да эписи чубар ве бенекли сойларыны айырып алырым. Бу меним мукяфатым олур.

³³Сонъра исе, меним мукяфатымны бакъмагъа кельгенинъде, меним догърулыгъым санъа джевап берер: менде бенексиз ве чубар олмагъан улакъны, я да къара олмагъан къозуны корьсенъ, демек, мен оны сенден хырсызладым.

³⁴— Келиштик, — деди Лаван. — Айткъанынъ дайын олсун.

³⁵О куню де, Лаван сырлы ве чубар текелерни, эписи бенекли ве чубар эчкилерни, эписи беяз лекели ве эписи къара къозуларны айырып алды ве огъулларына берди,

³⁶оларны да Якъуптан учь куньлюк ёлгъа ёллады. Якъуп исе Лаваннынъ къалгъан къой-эчкилерини бакъа эди.

³⁷Якъуп тазе сельби, бадем ве платаннынъ пытакъларыны алып, оларнынъ къабугъыны кесип, беяз агъач ёлакъларыны ачты.

³⁸Сыдырылгъан пытакъларны о, сув ашлавларына, сув ичкен къой-эчкилерининъ огюне къоя эди. Къой-эчкилер мында ичмеге келе эдилер ве къача эдилер.

³⁹Къой-эчкилер къачкъанда ёлакълы пытакъларгъа бакъа ве сырлы, бенекли ве чубар къой-эчкилер догъа эдилер.

⁴⁰Якъуп къозуларны айырды, къой-эчкилерни исе Лаваннынъ сырлы ве эписи къара къой-эчкилерине къаршы къойды. Озюнинъ сюрюлерини о айры тута эди, оларны Лаваннынъ къой-эчкилеринен берабер къошмай эди.

⁴¹Эр вакъыт, сагълам къой-эчкилер къачкъанда, айванлар пытакъларгъа бакъып къачсынлар деп, Якъуп ашлавларгъа, къой-эчкилернинъ козьлери огюне пытакъларны къоя эди.

⁴²Зайыф къой-эчкилер къачкъанда исе, къоймай эди. Бойлеликнен, зайыф айванлар Лаваннынъки, сагълам айванлар исе Якъупнынъки ола эдилер.

⁴³Якъуп пек зенгин адам олды, онынъ пек чокъ къой-эчкилери, хызметчи къызлары ве къуллары, девелери ве эшеклери бар эдилер.