Read Мукъаддес Китап къырымтатар тилинде, Башланув 32 Bible Online

Башланув 32 - Мукъаддес Китап къырымтатар тилинде, bible

Башланув 32

¹Якъуп исе озь ёлунен кете берди. Онынъ къаршысына Алланынъ Мелеклери чыкътылар.

²Оларны корип Якъуп: — Бу Алланынъ ордусы, — деди ве о ернинъ адыны Маханаим [50] деп къойды.

³Якъуп онынъ огюнде Эдом мемлекетине, Сеир топрагъында олгъан агъасы Исавгъа хаберджилерни йиберди ве

⁴оларгъа эмир берди: — Эфендим Исавгъа бойле деп айтынъыз: «Къулунъ Якъупнынъ айткъанлары будыр: “Мен вакътынджа Лаванда яшадым, шимдигедже анда отурдым.

⁵Энди меним огюзлерим, эшеклерим, къой-эчкилерим, хызметчи къызларым ве къулларым бар. Козюнъ огюнде мерамет къазанайым деп, мен санъа, эфендиме, бу хаберни ёллайым”».

⁶Хаберджилер Якъупкъа къайтып: — Биз сенинъ агъанъ Исавгъа бардыкъ, о, сенинъ къаршынъа келе, ве онен берабер дёрт яз адам келе, — дедилер.

⁷Якъуп пек къоркъты ве шашмалады. Онен олгъан адамларны, къой-эчкилерни, туварларны ве девелерни болип эки ордунен къойды.

⁸«Эгер Исав бир ордугъа уджюм этип оны урса, — деп тюшюнди Якъуп, — ич олмагъанда, экинджи орду къачып къуртарылыр».

⁹Сонъ Якъуп ялварды: — Дедем Ибраимнинъ Алласы, бабам Исхакънынъ Алласы, манъа: «Сенинъ топрагъынъа, сой-сопларынъа къайт, Мен санъа яхшылыкъ япарым», деген РАББИ!

¹⁰Манъа, Сенинъ къулунъа косьтерген бутюн мераметинъе ве ишанчлыгъынъа мен ляйыкъ дегилим. Иордан дерьясыны мен къолумда бир таякънен кечкен эдим, шимди исе эки ордум бар.

¹¹Мени агъамнынъ къолундан, Исавнынъ къолундан къуртар. Мен къоркъам ки, о, мында келип мени апайларымнен ве балаларымнен берабер ольдюрир.

¹²Сен бойле дединъ: «Керчектен де, Мен санъа яхшылыкъ япарым, сенинъ эвлятларынъны саймагъа чареси олмагъан денъиз къуму дайын чокъ сайылы этерим».

¹³О геджеси Якъуп анда геджеледи. Сонъ озюнинъ барлыгъындан агъасы Исавгъа бахшыш оларакъ

¹⁴200 эчки, 20 теке, 200 къой, 20 къочкъар,

¹⁵боталарынен берабер 30 сагъылгъан ыргъачы деве, 40 сыгъыр, 10 огюз, 20 ыргъачы эшек, 10 эркек эшек айырып къойды.

¹⁶Оларны о, эр бир сюрю айры олсун деп, айры къулларына берди ве оларгъа: — Сюрюлернинъ араларында ер къалдырып, огюмден кетинъиз, — деди.

¹⁷Якъуп сюрюджилерининъ бирисине буюрды: — Агъам Исавгъа расткельгенинъде ве о, сенден: «Сен кимнинъ къулусынъ? Къайда кетесинъ? Кимнинъ бу айванлары?» — деп сорагъанда,

¹⁸сен онъа айт: «Бу эфендим Исавгъа ёллангъан, къулунъ Якъупнынъ бахшышыдыр. О озю исе артымыздан келе».

¹⁹Экинджиге, учюнджиге ве сюрюлерининъ артындан кельген эписи сюрюджилерге де о, бойле буюрды: «Исавгъа расткельгенде, айны шуны айтынъыз

²⁰ве мытлакъа: “Мына, къулунъ Якъуп артымыздан келе”, — деп айтынъыз». Якъуп тюшюнди: «Огюме йиберильген бахшышларнен Исавнынъ ачувыны ятыштырайым. Сонъундан исе, озюм де огюне корюнирим. Бельки о, мени яхшы къаршылап алыр».

²¹Бахшышларны огюнден алып кеттилер, Якъуп исе ордуда геджеледи.

²²Лякин о геджесинен турып, Якъуп эки апайыны, эки хызметчи апайыны ве он бир огълуны янына алды ве сай еринден Яббок озенининъ бир ялысындан экинджи ялысына кечти.

²³Оларны алып, озенден кечирген сонъ, озюнинъ бутюн барлыгъыны да акъымдан кечирди.

²⁴Якъуп исе бир озю къалды. Сонъ Якъупнен бир адам танъ аткъандже курешти.

²⁵Оны енъип оламагъаныны корип, адам Якъупнынъ янбаш бугъумындан урды, ве курешкенде, онынъ янбаш кемиги пертильди.

²⁶О, Якъупкъа: — Мени йибер, энди танъ ата, — деди. — Мени багъышламагъанынъдже, сени йибермем, — деди Якъуп.

²⁷— Адынъ недир? — деп сорады о. — Якъуп, — деди Якъуп.

²⁸О вакъыт о, Якъупкъа бойле деди: — Бугуньден сонъ сенинъ адынъ Якъуп дегиль де, Исраиль [51] оладжакъ, чюнки сен Алланен ве адамларнен курештинъ ве енъдинъ.

²⁹— Адынъны манъа айтса, — деп ялварды Якъуп. — Менден Меним адымны не сорайсынъ? — деди О ве Якъупны анда багъышлады.

³⁰Якъуп: «Мен Алланы юзьме-юзь корьдим ве джаным сагъ къалды», — деп, о ернинъ адыны Якъуп Пениэл [52] деп къойды.

³¹Якъуп Пенуэлден кеткенде, кунь догъгъан эди. О, янбашы ичюн топаллай эди.

³²Онынъ ичюн бу куньгедже Исраиль огъуллары янбаш дамарларыны ашамайлар, чюнки Курешкен, Якъупнынъ янбаш дамарына токъунгъан эди.