Read Мукъаддес Китап къырымтатар тилинде, Башланув 33 Bible Online

Башланув 33 - Мукъаддес Китап къырымтатар тилинде, bible

Башланув 33

¹Якъуп бакъып, Исавны ве онен берабер 400 адам кельгенлерини корьди. Якъуп Леанынъ, Рахельнинъ ве эки хызметчи апайларынынъ балаларына аналары янларында тургъанларыны айтты.

²Хызметчи апайларыны балаларынен берабер о, огге къойды, оларнынъ артындан Леаны балаларынен берабер, Рахельнен Юсуфны исе энъ арттан къойды.

³Якъуп озю исе огге чыкъты ве, агъасынынъ янына бармаздан эвель, еди кере ерге къадар бель букти.

⁴Исав исе онынъ къаршысына чапты, оны къучакълады, бойнуна сарылды ве оны опьти. Олар экиси агъладылар.

⁵Апайларнен балаларыны корип Исав: — Булар санъа ким олалар? — деди. — Бу — Алла манъа, сенинъ къулунъа багъышлагъан балалардыр, — деди Якъуп.

⁶Хызметчи апайлары озь балаларынен Исавнынъ янына келип, онъа бель буктилер.

⁷Сонъ Леа озь балаларынен якъынлашып бель букти, ве энъ сонъунда Рахельнен Юсуф келип бель буктилер.

⁸— Я бу, манъа расткельген сюрюлер неге? — деп сорады Исав. — Эфендимнинъ козюнде мерамет къазанмакъ ичюн, — деди Якъуп.

⁹— Къардашым, бойле менде де чокъ, — деди Исав. — Сенинъ малынъ сенде къалсынъ.

¹⁰— Ёкъ, — деди Якъуп, — эгер мен сенинъ козюнъде мерамет къазангъан олсам, берген бахшышларымны ал, чюнки сенинъ бетинъни, Алланынъ бетини корьген дайын олдым, ве сен мени пек яхшы къаршыладынъ.

¹¹Мен санъа кетирген багъышлавымны ал, чюнки Алла мени багъышлады ве меним эр шейим бар. Якъуп Исавгъа пек ялварды, ве о, бахшышларны алмагъа разы олды.

¹²Сонъ Исав деди: — Юр, кеттик. Мен огюнъден кетерим.

¹³— Эфендим, балалар назик олгъанларыны озюнъ билесинъ. Къой-эчкилерим ве туварларым да сагъылалар, оларны бир кунь ичинде айдаса, эписи айванлар олерлер.

¹⁴Сен, эфендим, меним огюмде кетсе. Мен исе санъа, эфендиме, Сеир топрагъына барып чыкъмагъанымдже, огюмде кеткен айванлар киби, балалар кеткенлери дайын, яваш-яваш кетерим, — деди онъа Якъуп.

¹⁵— Янымда олгъан бир къач адамны сеннен къалдырайым да, — деди Исав. — Бунынъ не кереги бар? — деди Якъуп. — Сенинъ манъа мераметинъ ойле де пек буюктир!

¹⁶О куню де Исав озь ёлунен Сеир топрагъына къайтты.

¹⁷Якъуп исе Суккоткъа ёл алды. Анда о, озюне эв къурды, айванларына да чалашлар япты. Онынъ ичюн бу ернинъ адыны Суккот [53] деп къойдылар.

¹⁸Якъуп Паддан-Арамдан къайтып, Ханаан топрагъында олгъан Шекем шеэрине эсен-аман келип чыкъты ве шеэрнинъ янында ерлешти.

¹⁹Озь чадырларыны къойгъан тарла къысмыны Якъуп, Шекемнинъ бабасы олгъан Хаморнынъ огъулларындан 100 кумюшке [54] сатын алды.

²⁰Анда къурбан ери къурып, оны Эл-Элохе-Исраэл [55] деп адландырды.