Read Мукъаддес Китап къырымтатар тилинде, Башланув 34 Bible Online

Башланув 34 - Мукъаддес Китап къырымтатар тилинде, bible

Башланув 34

¹Леанынъ Якъупкъа тапкъан къызы Дина о ернинъ къызларына мусафирликке барды.

²О ернинъ акимдары олгъан Хаморнынъ огълу хивли Шекем оны корьди, оны алып онен ятты ве намусына токъунды.

³Якъупнынъ къызы Дина онынъ юрегине ятты, о, онъа севда олды ве онъа назик сёзлер айтты.

⁴Шекем, бабасы Хаморгъа: — Мени бу къызгъа эвлендир, — деди.

⁵Къызы Динанынъ намусына токъунгъанларындан Якъупнынъ хабери олды, лякин онынъ огъуллары айванларнен тарлада эдилер, бунынъ ичюн олар кельмезден эвель о, сусып турды.

⁶Шекемнинъ бабасы Хамор Якъупнен лакъырды этмек ичюн онъа кельди.

⁷Якъупнынъ огъуллары тарладан келип, олгъан шей акъкъында билип ачувландылар, оларнынъ гъазабы пек къайнады, чюнки Шекем Якъупнынъ къызынен ятып, Исраильде масхаралыкъ этти, ойле япмагъа ич олмай эди.

⁸Хамор оларгъа бойле айтып башлады: — Огълум Шекем къызынъызгъа севда олды. Оны огълума апай оларакъ беринъиз.

⁹Келинъиз, сой олайыкъ: бизге къызларынъызны беринъиз, озюнъизге исе къызларымызны алынъыз.

¹⁰Бизнен берабер яшасанъыз, бу топракъ козюнъизнинъ огюнде ачыкъ олур. Мында сербест яшанъыз, мында кочип юрюнъиз ве топракъкъа саип олунъыз.

¹¹Шекем исе Динанынъ бабасына ве агъа-къардашларына бойле деди: — Козюнъизде мерамет къазанмакъ истейим. Айткъан эр бир шейинъизни берерим.

¹²Энъ балабан мукяфат ве энъ къыйметли бахшышлар соранъыз — эписи айткъанларынъызны берерим. Ялынъыз бу къызны манъа апай оларакъ беринъиз.

¹³Якъупнынъ огъуллары Шекемге ве онынъ бабасы Хаморгъа айнеджиликнен джевап бердилер, чюнки Шекем оларнынъ къардашлары Динанынъ намусына токъунды.

¹⁴— Биз буны япып оламаймыз, — дедилер оларгъа. — Къардашымызны сюннетсиз акъайгъа бермек бизге масхаралыкътыр.

¹⁵Эгер сиз эписи акъайларынъызны сюннет эттирип, биз дайын олсанъыз, тек о заман биз разы олурмыз.

¹⁶Сонъ сизге къызларымызны берип, къызларынъызны алырмыз, о заман биз сизлернен берабер яшармыз ве бир халкъ олурмыз.

¹⁷Сиз бизим айткъанларымызгъа къулакъ асмайып сюннет этмесенъиз эгер, биз къардашымызны алып кетермиз.

¹⁸Бу сёзлер Хаморнынъ ве онынъ огълу Шекемнинъ юреклерине ятты.

¹⁹Огълан, Якъупнынъ къызыны пек истегени ичюн, вакъыт джоймайып бу шейни япты. Бабасынынъ эвинде о, энъ урьметли адам эди.

²⁰Хамор ве онынъ огълу Шекем шеэрнинъ араба къапулары огюнде турып, шеэр сакинлерине бойле дедилер:

²¹— Бу адамлар бизге яхшы бакъалар. Бизим топрагъымызда яшасынлар ве сербест долашсынлар. Олар ичюн ер чокъ. Оларнынъ къызларыны озьлеримизге апай оларакъ алырмыз, ве озь къызларымызны оларгъа берермиз.

²²Лякин тек биз олар дайын олып, я да эписи акъайларымызны сюннет эттирсек, о заман бу адамлар бизнен берабер яшап, бир халкъ олмагъа разылар.

²³Сонъ оларнынъ сюрюлери, барлыкъ-вариетлери ве эписи айванлары бизимки олурлар. Келинъиз, оларнен разы олайыкъ да, олар бизнен берабер яшасынлар.

²⁴Шеэрнинъ араба къапуларындан чыкъкъан эписи сакинлер Хамор ве огълу Шекемнинъ айткъанларынен разы олдылар, ве эписи акъайлар, шеэрнинъ араба къапуларындан чыкъкъан эписи сакинлер озьлерини сюннет эттирдилер.

²⁵Учюнджи куню исе, олар эписи даа хаста олып яткъанларында, Якъупнынъ эки огълу, Динанынъ агъа-къардашлары Шимеон ве Левий къылычларыны алып, шеэрге къаршылыкъсыз кирип эписи акъайларны ольдюрдилер.

²⁶Хаморнен огълу Шекемни де къылычнен ольдюрди ве Шекемнинъ эвинден Динаны алып чыкъып кеттилер.

²⁷Сонъ Якъупнынъ огъуллары ольдюрильгенлерге келип, къыз-къардашларынынъ намусына токъунгъанлары ичюн шеэрнинъ эписи шейлерни хырсызлап, дарма-дагъын эттилер.

²⁸Олар къой-эчкилерини, туварларыны, эшеклерини ве эм шеэрде, эм тарлада эписи олгъанларыны алдылар.

²⁹Оларнынъ бутюн барлыкъ-вариетини запт эттилер ве эписи балалары ве апайларыны эсирге алып, эписи эвлерини хырсызладылар.

³⁰Якъуп Шимеоннен Левийге: — Бу ерде яшагъан ханаанлылар ве перизлилернинъ огюнде яхшы адымызны аякъ асты этип, сиз меним башыма беля кетирдинъиз. Адамларым аз — олар топлашып манъа къаршы чыкъып, мени ве меним эвимни ёкъ этерлер, — деди.

³¹Олар исе дедилер: — Къыз-къардашымыз ороспу дегиль, онен ойле япмагъа олмаз.