Read Мукъаддес Китап къырымтатар тилинде, Башланув 35 Bible Online

Башланув 35 - Мукъаддес Китап къырымтатар тилинде, bible

Башланув 35

¹Алла Якъупкъа бойле деди: — Барып Бет-Эльге кет ве анда ерлеш. Анда агъанъ Исавдан къачкъанынъда санъа корюнген Аллагъа къурбан ери яп.

²Сонъ Якъуп озь эвиндекилерине ве онен олгъан эписи адамларына бойле деди: — Сизде олгъан эписи башкъа аллаларны ташлап кетинъиз, элялланынъыз ве урбаларынъызны денъиштиринъиз.

³Сонъ Бет-Эльге кетермиз. Анда башым белягъа къалгъанда манъа джевап берген ве мен юрген ёлларда янымда олгъан Аллагъа мен къурбан ери япаджагъым.

⁴Олар Якъупкъа оларда олгъан эписи башкъа аллаларны бердилер, къулакъларындаки купелерни де чыкъарып онъа бердилер. Якъуп оларны эписини Шекем шеэри янында олгъан эмен тереги тюбюнде комип къойды.

⁵Сонъ олар ёлгъа чыкътылар. Этрафта олгъан шеэрлернинъ сакинлери Алладан къоркъкъанлары ичюн, Якъупнынъ огъулларыны къуваламадылар.

⁶Якъуп озюнинъ эписи адамларынен Ханаан топрагъында олгъан Луз, я да Бет-Эль шеэрине кельди ве

⁷анда къурбан ери къурды. О, бу ернинъ адыны Эль-Бет-Эль [56] деп къойды, чюнки Якъуп агъасындан къачкъанда, Алла онъа мында пейда олгъан эди.

⁸Сонъ Рефикъанынъ даясы Девора кечинди. Оны Бет-Эльнинъ янында эмен тереги тюбюнде дефн эттилер ве бу эменнинъ адыны Якъуп Аллон-Бакут [57] деп къойды.

⁹Якъуп Паддан-Арамдан къайткъан сонъ, Алла онъа корюнди ве оны багъышлады.

¹⁰О, бойле деди: — Сенинъ адынъ Якъуп. Илериде исе адынъ Якъуп олмайджакъ, адынъ «Исраиль» оладжакътыр. Бойле О, Якъупнынъ адыны Исраиль деп къойды.

¹¹Сонъ даа бойле деди: — Мен — Къудретли Алладырым! Догъып арт ве чокъ сайылы ол! Сенден халкъ ве пек чокъ халкъ асыл оладжакъ, падишалар да сенден асыл оладжакълар!

¹²Ибраимге ве Исхакъкъа берген ер юзюни Мен санъа берерим, сенден сонъ олгъан эвлятларынъа да бу ерни берерим.

¹³Сонъ Алла Якъупкъа айткъан еринден кетти.

¹⁴Якъуп о ерде ташны абиде этип тиклеп къойды ве устюне шарапнен зейтюн ягъы тёкти.

¹⁵Бу ернинъ, я да онен Алла лакъырды эткен ернинъ адыны Якъуп Бет-Эль деп къойды.

¹⁶Олар Бет-Эльден чыкъып кетип, Эфрат шеэри янына кельгенлеринде, Рахель бала тапты, онынъ догъувы исе агъыр эди.

¹⁷О, догъып къыйналгъанда, эбанай онъа: — Къоркъма, — деди. — Сенинъ даа бир огълунъ олды.

¹⁸Рахель кечингенде сонъки нефесинен огълунынъ адыны Бен-Они деп къойды, лякин бабасы онъа Биньямин [58] деген ад къойды.

¹⁹Рахель кечинди. Оны Эфрат шеэрине, я да Вифлеем шеэрине кеткен ёлнынъ боюнда дефн эттилер.

²⁰Якъуп онынъ къабрининъ устюне баш таш къойды, ве о Рахельнинъ баш ташы шу куньгедже тура.

²¹Исраиль ёлуны девам этти ве чадырларыны Мигдал-Эдер артында къойды.

²²Исраиль о топракъта олгъанда, Рубен бабасынынъ джариеси олгъан Билханен ятты, ве бабасы бу акъкъында эшитти. Якъупнынъ он эки огълу бар эди.

²³Леанынъ огъуллары: Якъупнынъ биринджи огълу Рубен, ондан сонъ Шимеон, Левий, Ехуда, Иссасхар ве Зевулун.

²⁴Рахельнинъ огъуллары: Юсуф ве Биньямин.

²⁵Рахельнинъ хызметчиси Билханынъ огъуллары: Дан ве Нафтали.

²⁶Леанынъ хызметчиси Зилпанынъ огъуллары: Гад ве Ашер. Бу — Якъупнынъ Паддан-Арамда догъгъан огъуллары.

²⁷Якъуп Мамреде, Кирьят-Арбада, я да Хевронда олгъан бабасы Исхакъкъа кельди. Мында бир заманда Ибраим ве Исхакъ вакътынджа яшадылар.

²⁸Исхакъ 180 йыл яшады.

²⁹О, баягъы къарт олып, яшайышкъа бутюнлей тойып кечинди ве баба-деделерине кетти. Оны Исав ве Якъуп огъуллары дефн эттилер.