Read Мукъаддес Китап къырымтатар тилинде, Башланув 40 Bible Online

Башланув 40 - Мукъаддес Китап къырымтатар тилинде, bible

Башланув 40

¹Бундан сонъ Мысыр падишасынынъ сакиси [62] ве фурунджысы озьлерининъ эфендиси олгъан Мысыр падишасынынъ козю огюнде къабаат ишледилер.

²Фыравун озь эки везири олгъан баш сакиге ве баш фурунджыгъа ачувланды

³ве оларны сакъчылар башлыгъынынъ эвинде олгъан зиндангъа къапатты. Бу зинданда Юсуф да къапалгъан эди.

⁴Сакъчыларнынъ башлыгъы Юсуфны оларгъа хызмет этмеге тайинледи. Везирлер сакъчыларнынъ къолунда бир къач вакъыт олдылар.

⁵Куньлерден биринде зиндангъа къапалгъан Мысыр падишасынынъ сакиси ве фурунджысы тюшлер корьдилер. Эр бири озь тюшюни корьди. Экиси бир геджеде корьдилер. Эр бири хусусий мана ташыгъан тюш корьди.

⁶Саба эрте оларгъа Юсуф кельди ве оларнынъ къасеветленгенлерини корьди.

⁷Юсуф онен берабер эфендисининъ сакъчылары къолунда отургъан фыравуннынъ везирлеринден: — Сизинъ чырайларынъыз бугунь не ичюн кедерли? — деп сорады.

⁸Олар онъа: — Биз тюш корьдик, амма оларны тарифлемеге адам ёкъ, — дедилер. Юсуф оларгъа: — Тарифлер Алладан дегильми? Манъа икяе этсенъиз, — деди.

⁹Баш саки Юсуфкъа озь тюшюни икяе этти. О, Юсуфкъа: — Мен тюшюмде огюмде олгъан юзюм чубугъыны корьдим.

¹⁰Чубукъ устюнде учь пытакъ. Устьлеринде бурьлер пейда олды, олар филиследилер, чечеклер ачылды ве емишлер пиштилер.

¹¹Къолумда исе фыравуннынъ къадеси эди. Мен юзюмни алып, фыравуннынъ къадесине сыкътым ве къадени фыравуннынъ къолуна бердим, — деди.

¹²Юсуф онъа: — Онынъ тарифи будыр: учь пытакъ — бу учь кунь.

¹³Учь кунь ичинде фыравун башынъны юксельтир ве сени озь еринъе къайтарыр, сен де фыравуннынъ къадесини эвельдеки, сен онынъ сакиси олгъан вакътында киби, онынъ къолуна берерсинъ.

¹⁴Санъа яхшы олгъанда, мени хатырла ве, ялварам, манъа эйилик яп: меним акъкъымда фыравунгъа айт ве мени бу зиндандан чыкъар.

¹⁵Чюнки мени еудийлер топрагъындан хырсызладылар. Эм мында да, мени зиндангъа ташламакъ ичюн, бир шей япмадым, — деди.

¹⁶Баш фурунджы, яхшы тариф олгъаныны корип, Юсуфкъа: — Мен де тюш корьдим, — деди. — Мына, башымнынъ устюнде беяз отьмекке толу олгъан учь сепет.

¹⁷Энъ юкъары сепет ичинде фурунджы фыравунгъа пиширген тюрлю емектир. Ве оны башым устюндеки сепеттен къушлар чокъуй эдилер.

¹⁸Юсуф джевап берип: — Мына онынъ тарифи. Учь сепет — бу учь кунь.

¹⁹Учь кунь ичинде фыравун башынъны сенден юксельтип, сени терек устюне асаджакътыр. Сонъ къушлар сенинъ вуджудынъны чокъуйджакълар, — деди.

²⁰Учюнджи куню фыравуннынъ догъгъан куню эди. О, озюнинъ эписи хызметчилери ичюн зияфет берди ве озь хызметчилери арасында баш сакининъ башыны ве баш фурунджынынъ башыны юксельтти.

²¹[21-22] Юсуф тарифлегени киби, фыравун баш сакини эвельки ерине къайтарды, ве саки фыравуннынъ къолуна къадени берди. Баш фурунджыны исе асты.

²³Амма баш саки Юсуфны акъылына кетирмеди. О, оны унутты.