Read Мукъаддес Китап къырымтатар тилинде, Башланув 41 Bible Online

Башланув 41 - Мукъаддес Китап къырымтатар тилинде, bible

Башланув 41

¹Эки йыл кечкен сонъ фыравун тюш корьди. Иште, о, дерья четинде тура.

²Дерьядан гузель корюмли ве семиз еди баш сыгъыр чыкъты ве къамышлыкъта отлады.

³Амма олардан сонъ дерьядан башкъа, чиркин корюмли ве арыкъ еди баш сыгъыр чыкъты. Дерьянынъ ялысында анавы биринджи чыкъкъан сыгъырларнынъ янына турдылар.

⁴Чиркин корюмли ве арыкъ сыгъырлар гузель корюмли ве семиз олгъан еди сыгъырны ашадылар. Фыравун уянды

⁵ве кене юкълап къалды. Экинджи тюш корьди: иште, бир сапта еди толу ве яхшы башакъ осьти.

⁶Амма, иште, олардан сонъ еди дане бош ве шаркъий ель къуруткъан башакъ осьти.

⁷Бош башакълар еди дане толу ве яхшы башакъларны юттылар. Фыравун уянды. Иште, бойле тюш.

⁸Сабасына джаны сакъылгъаны ичюн, фыравун Мысырнынъ эписи тылсымджыларыны ве икметли адамларыны озюне чагъырмакъ ичюн хабер ёллады. Фыравун оларгъа озь тюшюни айтып берди. Амма фыравунгъа оны тарифлеп бермеге кимсе тапылмады.

⁹Баш саки фыравунгъа айтып башлады: — Бугунь мен гуналарымны хатырладым.

¹⁰Фыравун озь къулларына ачувланды ве мени ве баш фурунджыны сакъчылар башлыгъынынъ эвинде сакъчылар къолуна берген эди.

¹¹Биз: мен ве о, бир геджеде бир тюш корьдик. Эр биримиз хусусий маналы тюш корьдик.

¹²Анда бизнен берабер сакъчылар башлыгъынынъ къулу, яш еудий бар эди. Биз онъа корьген тюшлеримизни айтып бердик, ве о, эр биримизге тюшюмизге коре тарифледи.

¹³О, бизге насыл тарифлеген олса, ойле де олды. Мен ериме къайтарылдым, фурунджыны исе астылар.

¹⁴Фыравун Юсуфны чагъырмакъ ичюн адамларны ёллады. Оны ашыкъып зиндандан алып чыкътылар. О, сачыны алды, урбасыны денъиштирди ве фыравунгъа кельди.

¹⁵Фыравун Юсуфкъа: — Мен тюш корьдим, лякин оны кимсе тарифлеп оламай. Сен исе тюш тарифлемеге билесинъ деп эшиттим, — деди.

¹⁶Юсуф фыравунгъа: — Мен дегиль, фыравуннынъ эйилигине Алла джевапны берер, — деп джевап берди.

¹⁷Фыравун Юсуфкъа: — Тюшюмде, мына, мен дерьянынъ четинде турам.

¹⁸Мына, дерьядан гузель корюмли ве семиз еди баш сыгъыр чыкъты ве къамышлыкъта отлады.

¹⁹Иште, олардан сонъ башкъа, пек чиркин ве арыкъ еди баш сыгъыр чыкъты. Бутюн Мысыр топрагъында мен ойле, олар дайын, арыкъларны корьмедим.

²⁰Арыкъ ве чиркин сыгъырлар биринджи еди семиз сыгъырны ашадылар.

²¹Семизлери оларнынъ къурсакъларына кирдилер. Амма олар арыкъларнынъ къурсакъларына киргенлери козьге корюнмей эди. Олар, башындаки киби, эп арыкъ эдилер. Сонъ мен уяндым.

²²Бир даа тюш корьдим. Иште, бир сапта еди дане толу ве яхшы башакъ котерильди.

²³Амма олардан сонъ, иште, индже, бош ве шаркъий ель къуруткъан еди дане башакъ осьти.

²⁴Бош башакълар еди яхшы башакъны юттылар. Мен буны тылсымджыларгъа икяе эттим, амма кимсе манъа тарифлеп оламады, — деди.

²⁵Юсуф фыравунгъа: — Фыравун тюшлерининъ манасы бирдир, — деди. — Алла не япаджагъыны фыравунгъа эвельден бильдирди.

²⁶Еди яхшы сыгъыр — бу еди йылдыр. Еди яхшы башакъ да еди йылдыр: тюш бирдир.

²⁷Олардан сонъ чыкъкъан еди арыкъ ве чиркин сыгъыр да еди йылдыр. Эм де бош ве шаркъий ель къуруткъан еди башакъ — бу ачлыкънынъ еди йылыдыр.

²⁸Мына не себептен мен фыравунгъа: «Алла не япаджагъыны фыравунгъа эвельден косьтерди», — дедим.

²⁹Мына, бутюн Мысыр топрагъында буюк бол-берекетининъ еди йылы башлай.

³⁰Олардан сонъ еди йыл ачлыкъ оладжакъ. Мысыр топрагъында олгъан бол-берекетлик унутылыр. Ачлыкъ топракъны къурутыр.

³¹Ве ер юзюнде олгъан эвельки бол-берекетлик сонъундан кельген ачлыкъ ичюн козьге корюнмез. Чюнки о, пек агъыр оладжакътыр.

³²Тюшнинъ фыравун ичюн эки кере текрарланувы исе — Алланынъ сёзю акъикъий ве Алла буны тезден япаджагъы демектир.

³³Шимди исе, фыравун акъыллы ве икметли бир адамны сайлап алсын да, Мысыр мемлекетине башлыкъ этип къойсун.

³⁴Фыравун бутюн Мысыр мемлекетине незаретчилерни къоймагъа ве бол-берекетининъ еди йылында Мысыр топрагъынынъ беш пайда бир пайыны джыймагъа эмир этсин.

³⁵Олар бу келеджек яхшы йылларнынъ эписи ашларны алсынлар ве шеэрлерде фыравуннынъ анбарларына ашлыкъ джыйсынлар ве къорчаласынлар.

³⁶Бу аш Мысыр топрагъында оладжакъ еди йыллыкъ ачлыкъта, мемлекет ичюн къыйын куньлерде емек олур. Сонъ мемлекет ачлыкътан гъайып олмаз.

³⁷Буны фыравун ве эписи онынъ хызметчилери бегендилер.

³⁸Фыравун озь хызметчилерине: — Биз бойле, о киби, ичинде Мукъаддес Руху олгъан адамны тапармызмы? — деди.

³⁹Сонъ фыравун Юсуфкъа: — Алла бунынъ эписини санъа ачкъаны ичюн, сен киби акъыллы ве икметли адам ёкътыр.

⁴⁰Эвиме башлыкъ оладжакъсынъ. Бутюн халкъым сёзюнъни тутаджакъ, ялынъыз тахтнен мен сенден буюк олурым, — деди.

⁴¹— Иште, — деди фыравун Юсуфкъа, — мен сени бутюн Мысыр топрагъына акимдар этем.

⁴²Фыравун, озюнинъ къолундан юзюкни чыкъарып, Юсуфнынъ къолуна кийдирди. Онынъ устюне индже кетенден тикильген урбалар кийдирди. Бойнуна алтын зынджыр такъты.

⁴³Озюнинъ экинджи арабасында оны алып юрмеге ве онынъ огюнден «Аврех!» [63] — деп къычырмагъа эмир этти. Бойлеликнен фыравун Юсуфны бутюн Мысыр топрагъынынъ башлыгъы этти.

⁴⁴Сонъ фыравун Юсуфкъа: — Мен фыравуным. Амма сенсиз бутюн Мысыр топрагъында кимсе не къолуны, не аягъыны къыбырдатмаз, — деди.

⁴⁵Фыравун Юсуфкъа Цафнат-Панеах деген ад къойды ве Он шеэринде руханий олгъан Поти-Перанынъ къызы Аснаткъа эвлендирди. Сонъ Юсуф Мысыр топрагъы бою кетти.

⁴⁶Мысыр падишасы олгъан фыравуннынъ юзю алдына кельгенде, Юсуф отуз яшында эди. Сонъ Юсуф фыравуннынъ юзю алдындан кетти ве бутюн Мысыр топрагъыны айланып чыкъты.

⁴⁷Топракъ еди бол-берекетли йыл девамында номай махсул бере эди.

⁴⁸Мысырда еди йыл джыйгъан бутюн ашны, Юсуф шеэрлерде топлады. Эр бир шеэрде онынъ этрафында олгъан тарлалардан джыйгъан ашны къойды.

⁴⁹Юсуф, денъиз къуму дайын, пек чокъ захире топлады. Тап саймакъны да токътатты, чюнки саймакънынъ чареси ёкъ эди.

⁵⁰Ачлыкъ йыллары башламадан, Юсуфнынъ эки огълу олды. Оларны онъа Он шеэрининъ руханийи олгъан Поти-Перанынъ къызы Аснат догъды.

⁵¹Юсуф биринджи огълунынъ адыны Менашше [64] къойды, чюнки: «Алла манъа эписи гъам-къасеветлеримни ве бабамнынъ бутюн эвини унуттырды», — деп айта эди.

⁵²Экинджисине исе Эфраим [65] деген ад къойды, чюнки о: «Мен къыйналгъан топракъта Алла мени махсулдар этти», — деп айта эди.

⁵³Мысыр топрагъында олгъан бол-берекетликнинъ еди йылы кечти.

⁵⁴Юсуф айткъаны дайын, ачлыкънынъ еди йылы башланды. Эписи мемлекетлерде ачлыкъ эди. Бутюн Мысыр мемлекетинде исе захире бар эди.

⁵⁵Амма Мысыр топрагъында ачлыкъ башлагъанда, халкъ фыравундан отьмек сорап, къыямет къопарды. Фыравун эписи мысырлыларгъа: — Юсуфкъа барынъыз да, онынъ сизге айткъанларыны япынъыз, — деди.

⁵⁶Бутюн ер юзюнде ачлыкъ эди. Юсуф ашлыкъ анбарларыны ачты ве мысырлыларгъа ашлыкъны сатып башлады. Ачлыкъ исе Мысыр топрагъында эп кучьлене эди.

⁵⁷Юсуфтан ашлыкъ сатын алмакъ ичюн, эписи мемлекетлерден Мысыргъа келе эдилер, чюнки ачлыкъ бутюн ер юзюнде кучьлю эди.