Read Мукъаддес Китап къырымтатар тилинде, Башланув 45 Bible Online

Башланув 45 - Мукъаддес Китап къырымтатар тилинде, bible

Башланув 45

¹Юсуф аякъ устюнде тургъанларнынъ янында озюни артыкъ къолда туталмады ве: — Эр кес чыкъып кетсин! — деп къычырды. Юсуф агъа-къардашларына ачылгъанда, онынъ янында кимсе ёкъ эди.

²О, окюр-окюр агълады, ве мысырлылар эшиттилер, фыравуннынъ эви де эшитти.

³Юсуф агъа-къардашларына: — Мен — Юсуфым, — деди. — Бабам даа сагъмы? Амма агъа-къардашлары онынъ алдында шашкъанларындан, онъа джевап къайтарып оламай эдилер.

⁴Сонъ Юсуф агъа-къардашларына: — Келинъиз яныма, — деди. Олар кельдилер. — Мен, сиз Мысыргъа саткъан къардашынъыз Юсуфтырым, — деди о.

⁵— Амма шимди мени мында саткъанынъызгъа кедерленменъиз ве пешман этменъиз. Чюнки чокъ адамларнынъ яшайышыны сакъламакъ ичюн, Алла мени сизден огюне ёллады.

⁶Чюнки ер юзюндеки ачлыкънынъ девамы мына энди эки йыл, даа беш йыл не ер сюреджеклер, не де ораджакълар.

⁷Сизни ер юзюнде къалдырмакъ ве сизинъ яшайышынъызны аджайип шекильде сакъламакъ ичюн, Алла мени сизден эвель ёллады.

⁸Демек, мени ёллагъан сиз дегильсинъиз, амма Алладыр. О, мени фыравунгъа — баба, онынъ эвине — эфенди ве бутюн Мысыр топрагъына — акимдар этип къойгъандыр.

⁹Тез-тез бабама барынъыз ве онъа: «Юсуф бойле деп айта: “Алла мени бутюн Мысыргъа эфенди этти. Вакъыт созмайып, манъа кель.

¹⁰Сен Гошен топрагъында яшайджакъсынъ. Эм сен, эм огъулларынъ, эм торунларынъ, эм айванларынъ, эм туварларынъ, эм бутюн сенинъ мал-мулькюнъ янымда оладжакълар.

¹¹Сен, къорантанъ ве бутюн сенинъ мал-мулькюнъ фукъарелешмесин деп, сени анда бакъарым. Ачлыкъ исе, даа беш йыл девам этеджектир”», — деп айтынъыз.

¹²Иште, сиз ве Биньямин къардашым бу сизнен мен лакъырды эткенимни озь козьлеринъизнен коресинъиз, — деди о.

¹³— Бабама бутюн корьгенлеринъизни ве Мысырда олгъан бутюн шуретим акъкъында айтынъыз. Ве тез-тез бабамны мында алып келинъиз.

¹⁴Юсуф озь къардашы олгъан Биньяминнинъ бойнуна сарылды ве агълады. Биньямин де онынъ бойнунда агълады.

¹⁵Юсуф эписи агъаларыны да опе ве агълай эди. Сонъ агъа-къардашлары онен лакъырды этмеге башладылар.

¹⁶Юсуфнынъ агъа-къардашлары кельгени акъкъындаки хабер фыравуннынъ эвине барып етти. Фыравун ве онынъ хызметчилери къувандылар.

¹⁷Фыравун Юсуфкъа: — Агъа-къардашларынъа айт: «Буны япынъыз: эшеклеринъизни юклеп, Ханаан топрагъына барынъыз.

¹⁸Бабанъызны ве озь къоранталарыны мында кетирип, манъа келинъиз. Мен Мысыр топрагъында энъ яхшысыны сизге берерим — бу мемлекеттеки энъ яхшысыны ашайджакъсынъыз.

¹⁹Сизге бу эмирдир: буны япынъыз: балалар ве апайлар ичюн Мысыр топрагъындан арабаларны алып, бабанъызны да алып келинъиз.

²⁰Мал-мульклеринъизге исе языкъсынманъыз, чюнки бутюн Мысыр топрагъынынъ энъ яхшысы сизге олур», — деди.

²¹Исраильнинъ огъуллары ойле де яптылар. Фыравуннынъ эмирине бинаен, Юсуф оларгъа арабалар берди. Ёллукъ олгъан аш да берди.

²²Эр бирине янъы урба да берди. Биньяминге исе 300 кумюш ве беш янъы урба берди.

²³Бабасына он эшекнинъ устюне Мысырнынъ энъ яхшысыны ве он ыргъачы эшек устюне бабасы ичюн ёллукъ олгъан ашлыкъ, отьмек ве башкъа азыкъ юклеп ёллады.

²⁴Сонъ агъа-къардашларыны йиберди, ве олар кеттилер. — Ёл бою къавгъа этменъиз, — деди оларгъа.

²⁵Олар Мысырдан кеттилер ве бабалары Якъупкъа, Ханаан топрагъына кельдилер.

²⁶Олар бабаларына: — Юсуф сагъ ве шимди бутюн Мысыр топрагъына акимдарлыкъ эте, — деп хабер эттилер. Якъупнынъ нефеси токътады, чюнки оларгъа инанмады.

²⁷Агъа-къардашлар исе Юсуфнынъ оларгъа бутюн айткъанларыны бабаларына айтып бердилер. Якъуп озю оны алып кетмек ичюн Юсуф ёллагъан арабаларыны корьди. Сонъ онынъ руху котерильди.

²⁸— Етер, — деди Исраиль. — Демек, огълум Юсуф сагъ! Мен ольмезден эвель, барып онен корюшейим.