Read Мукъаддес Китап къырымтатар тилинде, Башланув 46 Bible Online

Башланув 46 - Мукъаддес Китап къырымтатар тилинде, bible

Башланув 46

¹Исраиль бутюн озь мал-мулькюнен ёлгъа чыкъты. Беэр-Шева шеэрине келип, о, бабасы Исхакънынъ Алласына къурбан чалды.

²Алла Исраильге геджеси тюшюнде: — Якъуп! Якъуп! — деди. — Мен мындам, — деди о.

³— Мен — Аллам, бабанънынъ Алласыдырым, — деди Алла. — Мысыргъа бармагъа къоркъма, чюнки анда Мен сенден буюк халкъ асыл этерим.

⁴Мен сеннен Мысыргъа барарым, Мен де сени андан чыкъарырым. Юсуф озь къолунен козьлеринъни къапатыр.

⁵Сонъ Якъуп Беэр-Шевадан кетти. Фыравун оны алып кельмек ичюн ёллагъан арабалар устюнде Исраильнинъ огъуллары бабалары Якъупны, балаларыны ве апайларыны алып кете эдилер.

⁶Олар Ханаан топрагъында ишлеп тапкъан мал-мулькюни ве айванларны озьлеринен алдылар. Ве олар — Якъуп ве бутюн онынъ эвлятлары — Мысыргъа кельдилер.

⁷О, озюнен берабер огъулларыны ве торунларыны, къызларыны ве къыз торунларыны, — бутюн эвлятларыны озюнен берабер Мысыргъа кетирди.

⁸Мысыргъа кельген Исраиль огъулларынынъ адлары будыр: Якъуп ве онынъ огъуллары. Якъупнынъ биринджи огълу Рубен.

⁹Рубеннинъ огъуллары: Ханох, Паллу, Хецрон ве Карми.

¹⁰Шимеоннынъ огъуллары: Емуэл, Ямин, Охад, Яхин, Цохар ве ханаанлы къызнынъ огълу Шаул.

¹¹Левийнинъ огъуллары: Гершон, Кехат ве Мерарий.

¹²Ехуданынъ огъуллары: Эр, Онан, Шела, Перец ве Зерах, амма Эр ве Онан Ханаан топрагъында ольдилер. Перецнинъ огъуллары: Хецрон ве Хамул.

¹³Иссасхарнынъ огъуллары: Тола, Пувва, Йов ве Шимрон.

¹⁴Зевулуннынъ огъуллары: Серед, Элон ве Яхлеэл.

¹⁵Бу — Паддан-Арамда догъгъан, Дина къызынен берабер, Леанынъ Якъупкъа тапкъан огъулларыдыр. Онынъ огъуллары ве къызлары эписи олып отуз учь джандыр.

¹⁶Гаднынъ огъуллары: Цифион, Хагги, Шуни, Эцбон, Эри, Ароди, Арели.

¹⁷Ашернинъ огъуллары: Имна, Ишва, Ишвий ве Бриа. Оларнынъ къыз къардашы Серах. Брианынъ огъуллары: Хевер ве Малкиэл.

¹⁸Бу — Лаван Леа къызына берген Зилпанынъ огъуллары. О, Якъупкъа он алты бала догъды.

¹⁹Якъупнынъ апайы олгъан Рахельнинъ огъуллары: Юсуф ве Биньямин.

²⁰Мысыр топрагъында Юсуфнынъ Менашше ве Эфраим огъуллары догъдылар. Оларны онъа Поти-Пера деген Он шеэриндеки баш руханийнинъ Аснат къызы тапты.

²¹Биньяминнинъ огъуллары: Бела, Бехер, Ашбель, Гера, Нааман, Эхи, Рош, Муппим, Хуппим ве Ард.

²²Бу — Якъупнынъ Рахельден олгъан несили — он дёрт джан.

²³Даннынъ огъуллары: Хушим.

²⁴Нафталининъ огъуллары: Яхцеэл, Гуни, Ецер ве Шиллем.

²⁵Бу — Лаван Рахель къызына берген Билханынъ огъуллары. О, Якъупкъа еди бала догъды.

²⁶Якъупнен берабер, ондан асыл олгъанлар, келинлеринден гъайры, Мысыргъа эписи олып алтмыш алты джан кельдилер.

²⁷Мысырда догъгъан Юсуфнынъ огъуллары эки джаннен берабер, Мысыргъа кочькен Якъупнынъ эвлятлары эписи олып етмиш джандыр.

²⁸Юсуфкъа Гошенге ёлны косьтермек ичюн, Якъуп озюнден эвель Ехуданы ёллады. Олар Гошен топрагъына кельдилер.

²⁹Юсуф озь арабасыны ектиртти ве, бабасы Исраильни къаршыламакъ ичюн, Гошенге кетти. Оны корьген сонъ, бойнуна сарылды ве онынъ бойнунда чокъ вакъыт агълады.

³⁰Исраиль Юсуфкъа: — Энди, сенинъ юзюнъни корьген сонъ, манъа ольмек мумкюн, чюнки сен даа сагъсынъ, — деди.

³¹Юсуф агъа-къардашларына ве бутюн бабасынынъ эвине: — Мен барып, фыравунгъа бу хаберни айтайым: «Манъа Ханаан топрагъындан агъа-къардашларым ве бабамнынъ къорантасы кельдилер. Олар къой-эчки бакъып, чобанлыкъ этелер.

³²Олар къой-эчкилернен туварларны ве оларда олгъан бутюн барлыкъ-вариетни алып кельдилер», — деди.

³³— Эгер фыравун сизлерни чагъырып, ненен огърашкъанынъызны сораса,

³⁴сизлер: «Биз сенинъ къулларынъ, яшлыгъымыздан айванасравджылыкънен огърашамыз, эм биз, эм бабаларымыз», — деп айтынъыз. О заман сизни Гошен топрагъында ерлештирирлер. Чюнки эр къой чобаны, мысырлылар ичюн арамдыр.