Read Мукъаддес Китап къырымтатар тилинде, Башланув 49 Bible Online

Башланув 49 - Мукъаддес Китап къырымтатар тилинде, bible

Башланув 49

¹Якъуп огъулларыны чагъырып, оларгъа бойле деди: — Топлашынъыз, сизлернен келеджекте не оладжагъыны мен сизге хабер этеджегим.

²Якъупнынъ огъуллары, топланынъыз ве бабанъыз Исраильни динъленъиз!

³Рубен! Сен меним биринджи догъгъан огълум, меним такъатымсынъ, акъайлыгъымнынъ ильк козьайдыны, дегер ве къудретнинъ юкъары нокътасысынъ.

⁴Сен сувлар дайын къутургъан оласынъ. Эндиден сонъ энъ буюк олмайджакъсынъ, чюнки сен бабанънынъ тёшегинде яттынъ ве тёшегини арамладынъ.

⁵Шимеон ве Левий керчектен де агъа-къардашлардыр; оларнынъ къылычлары — мераметсиз алетлердир!

⁶Оларнынъ япкъан ишлерине мен къошулмайым, топлашувларына да шуретим даркъалмасын, чюнки олар гъазапларында акъайларны ольдюрдилер, бош истеклерине коре бузавларны сойдылар.

⁷Оларнынъ гъазабы шефкъатсыз олгъаны ичюн лянет олсун, афакъанлары да дешетли олгъаны ичюн лянет олсун! Якъупнынъ огъуллары арасында оларны болерим ве Исраиль огъуллары арасында дагъытып сеперим.

⁸Ехуда! Агъа-къардашларынъ сени макътарлар. Сенинъ къолунъ душманларынънынъ боюнында олур. Агъа-къардашларынъ да санъа къатланаджакълар.

⁹Ехуда огълум, сен яш арслансынъ, гъаниметинънинъ устюнден котерильдинъ. О, арслан дайын, ер устюнде пысып отурды — оны раатсыз этмеге кимнинъ джесарети етер?

¹⁰Ехуданынъ къолундан акимиет таягъы тюшмез, аякъларынынъ янындан акимдарнынъ таягъы кетмез. Сонъ Шило келеджек, ве халкълар онъа боюн эгеджеклер.

¹¹Эшегини о, юзюм чубугъына багълай, эшек баласыны исе энъ яхшы юзюм чубугъына багълай. Урбаларыны о шарап ичинде юва, кийимлерини — салкъымларнынъ къанында.

¹²Козьлери шараптан къара, тишлери сюттен бем-беязлар.

¹³Зевулун денъиз ялысында яшайджакъ. О, гемилер искелеси олур. Сынъыры да Цидон шеэринедже олур.

¹⁴Иссасхар юклер арасында узанып яткъан сагълам эшек.

¹⁵О, раатлыкъ яхшы олгъаныны ве бу топракъ хош кельгенини корип, сыртыны юк тюбюне эгди ве къул олды.

¹⁶Дан озь халкъына акимдарлыкъ этеджек. Исраильнинъ башкъа къабилелери киби оладжакъ.

¹⁷Дан ёлда яткъан йылан олур, атлы аттан йыкъылып кетсин деп, атнынъ аягъыны чакъкъан, ёл четиндеки зеэрли йылан олур.

¹⁸РАББИм, сенинъ къуртарувынъа умют этем!

¹⁹Гадны бир сюрю ёлбасар басаджакълар, о исе, оларны басып пешлеринден къувалайджакъ.

²⁰Ашернинъ ашы берекетли олур, о, падишанынъ софрасына ляйыкъ ашларны еткизеджек.

²¹Нафтали сербест сыгъын киби. О, аджайип балалар асыл эте.

²²Юсуф — махсулдар терекнинъ пытагъыдыр, чокъракъ устюнден оськен махсулдар терекнинъ пытагъыдыр. Онынъ пытакълары дивар устюнден осип кетелер.

²³Окъчулар онъа душманлыкъ этип ве окълар атып, уджюм эттилер.

²⁴Лякин онынъ яйы даима къавий къала эди, чюнки къолларынынъ къавийлиги — Якъупнынъ Кучьлю Алласындандыр, Чобаннынъ адындан ве Исраильнинъ Къаясындандыр,

²⁵Сенинъ баба-деделеринънинъ Алласындандыр! О, санъа ярдым этер! О — Къудретли Алла, О, сени юкъарыдаки коклернинъ багъышлавларынен, ашагъыдаки буюк теренликнинъ багъышлавларынен, эмчек ве къурсакънынъ багъышлавларынен багъышлар!

²⁶Бабанънынъ багъышлавлары эбедий дагъларнынъ багъышлавларындан ве къадимий тёпелернинъ яхшылыкъларындан буюктир. Олар Юсуфнынъ башында, агъа-къардашларынынъ арасындан сечилип алынгъан Юсуф башынынъ тёпесинде олсун [66].

²⁷Биньямин — йыртыджы къашкъыр, саба о, туткъаныны ашай, акъшам исе о, гъаниметини боле.

²⁸Будыр — исраиллилернинъ он эки къабилеси ве бабаларынынъ оларгъа айткъан шейлери. Оларнынъ бабасы Исраиль оларны багъышлады, эр бирини айры багъышлады.

²⁹Сонъ Якъуп огъулларына бойле эмир берди: — Мен о бир дюньягъа, озь халкъыма кетем. Мени хитли Эфроннынъ тарласында олгъан къобада баба-деделеримнен берабер дефн этинъиз.

³⁰Бу къоба Ханаан топрагъында, Мамренинъ янында, Макъпела тарласындадыр. Бу къобаны ве тарланы Ибраим мезар ери оларакъ хитли Эфрондан сатын алды.

³¹Анда Ибраим ве онынъ апайы Саре дефн этильгенлер, анда Исхакъ ве апайы Рефикъа дефн этильгенлер, анда мен Леаны да дефн эттим.

³²Бу тарла ве устюндеки къоба Хет огъулларындан сатын алынгъандыр.

³³Огъулларына эмирини берген сонъ, Якъуп аякъларыны тёшегине къойды ве кечинип озь халкъына, о бир дюньягъа кетти.