Read Мукъаддес Китап къырымтатар тилинде, Башланув 50 Bible Online

Башланув 50 - Мукъаддес Китап къырымтатар тилинде, bible

Башланув 50

¹Юсуф бабасынынъ устюне тюшип, оны опип окюр-окюр агълады.

²Сонъ Юсуф озь хызметчи-экимлерине бабасыны бальзамламагъа эмир этти, ве экимлер Исраильни бальзамладылар.

³Къыркъ кунь кечти, чюнки бальзамламакъ ичюн о къадар вакъыт керек. Мысырлылар онъа янып 70 кунь агъладылар.

⁴Матем куньлери кечкен сонъ, Юсуф фыравуннынъ хызметчилерине бойле деди: — Эгер козьлеринъизде мерамет къазангъан олсам, фыравунгъа айтсанъыз:

⁵«Бабам мени емин эттирип, бойле деди: “Мен о бир дюньягъа кетем. Мени Ханаан топрагъында олгъан, озюме эвельден азырлап къойгъан къабримде дефн эт. Анда мени дефн эт”. Шимди мен кетип, бабамны дефн этмеге ве сонъ къайтып кельмеге разылыкъ сорайым».

⁶Фыравун деди: — Бар, бабанъ сени емин эттиргени киби, оны дефн эт.

⁷Сонъ Юсуф бабасыны дефн этмеге кетти. Онен берабер фыравуннынъ эписи хызметчилери, эвининъ акъсакъаллары ве Мысыр топрагъынынъ эписи акъсакъаллары,

⁸Юсуфнынъ бутюн эви, агъа-къардашлары ве бабасынынъ эви кеттилер. Тек балаларыны, къой-эчкилерини ве туварларыны Гошен виляетинде къалдырдылар.

⁹Онен берабер арабалар ве атлылар да кеттилер. Бойлеликнен, бу орду пек буюк олды.

¹⁰Иорданнынъ артында олгъан Атад арманына барып чыкъкъан сонъ, олар анда аджджы ве кучьлю агълап башладылар. Еди кунь Юсуф бабасына матем тутты.

¹¹О ерде яшагъан ханаанлылар Атад арманында олгъан матемни корип: — Мысырлылар не къадар аджджы агълайлар! — дедилер. Онынъ ичюн Иорданнынъ артында олгъан бу ернинъ адыны «Мысырлыларнынъ Матеми» деп къойдылар.

¹²Якъупнынъ огъуллары, о, оларгъа насыл эмир берген олса, онен ойле де яптылар:

¹³огъуллары, кечинген бабаларыны Ханаан топрагъына кетирдилер ве Мамренинъ янында олгъан, Макъпела тарласындаки къобада оны дефн эттилер. Бу къобаны ве тарланы Ибраим бир заманда мезарлыкъ ери ичюн хитли Эфрондан сатын алгъан эди.

¹⁴Бабасыны дефн эткен сонъ, Юсуф, агъа-къардашлары ве эписи онен берабер бабаларыны дефн этмек ичюн кеткенлер Мысыргъа къайттылар.

¹⁵Юсуфнынъ агъалар бабаларынынъ ольгенини корип: — Не япармыз, эгер Юсуф бизге къаршы нефретленсе ве, биз онъа япкъан бутюн яманлыкълар ичюн, бизден интикъам алмагъа истесе? — деп тюшюндилер.

¹⁶[16-17] Олар Юсуфкъа: — Бабанъ ольмезден эвель: «Юсуфкъа бойле деп айтынъыз: “Ялварам санъа, агъаларынънынъ санъа яманлыкъ япкъанлары ичюн, къабаатларыны ве гуналарыны багъышла”», — деп эмир этти. Шимди бабанънынъ Алласы къулларына, къабаатларыны багъышла, — деп айтмагъа ёлладылар. Юсуф, онъа буны айткъанда, агълай эди.

¹⁸Агъалары озьлери исе келип, онъа седжде эттилер ве: — Иште, биз сенинъ къулларынъмыз, — дедилер.

¹⁹— Къоркъманъыз, — деди Юсуф. — Мен Алла дегилим.

²⁰Сиз манъа къаршы яманлыкъ япмагъа истеген эдинъиз, амма Алла, шимди олгъаныны япмакъ ичюн, я да чокъ адамларнынъ яшайышларыны сакъламакъ ичюн, бундан эйилик япмагъа истеген эди.

²¹Иште, къоркъманъыз: мен сизни ве балаларынъызны бакъарым. Юсуф оларгъа теселли берди, ве онынъ айткъанлары агъа-къардашларынынъ юреклерине ятты.

²²Бойлеликнен, Юсуф бабасынынъ союнен берабер Мысырда яшады. Юсуф 110 йыл яшады

²³ве учюнджи несильгедже олгъан Эфраимнинъ балаларыны корьди. Менашшенинъ огълу Макирнинъ огъуллары да Юсуфнынъ тизлеринде догъдылар.

²⁴Юсуф агъа-къардашларына: — Мен о бир дюньягъа кетем, — деди. — Лякин Алла мытлакъа сизге ярдымгъа келир ве сизни бу ерден чыкъарып, Ибраимге, Исхакъкъа ве Якъупкъа емин эткен ерге алып кетер.

²⁵Сонъ Юсуф Исраиль огъулларына: — Алла мытлакъа сизге ярдымгъа келир, сиз исе меним кемиклеримни мындан алып кетинъиз, — деп емин эттирди.

²⁶Юсуф 110 яшында кечинди. Оны бальзамладылар ве Мысырда дюрбеге къойдылар.