Read Мукъаддес Китап къырымтатар тилинде, Башланув 6 Bible Online

Башланув 6 - Мукъаддес Китап къырымтатар тилинде, bible

Башланув 6

¹Адамлар ер юзюнде чокълашып башладылар. Оларда къызлар догъа эдилер.

²Адамларнынъ къызлары дюльбер олгъанларыны корип, Алланынъ огъуллары, ким къайсы союны сайлап алса, оларны озьлерине апай этип ала эдилер.

³РАББИ деди ки: — Меним нефесим адамда эбедий къалмайджакъ, чюнки о — вуджут. Онынъ куньлери 120 йыл олсун.

⁴О куньлерде ве олардан сонъ ер юзюнде нефиллер [9] бар эдилер. Алланынъ огъуллары адамларнынъ къызларына келип башладылар, ве къызлар оларгъа бала тапа эдилер: олар кучьлю къараманлар, эвель-эзельден намлы адамлар ола эдилер.

⁵РАББИ адамларнынъ ер юзюнде яманлыгъы чокъ олгъаныны, оларнынъ эписи тюшюнджелери ве юреклерининъ ынтылувлары эр вакъыт тек яман олгъанларыны корьди.

⁶РАББИ ер юзюнде адамны ясагъанына пешман этти, ве Онынъ юреги янды.

⁷Сонъ РАББИ деди: — Озюм яраткъан адамларны ер юзюнден къырарым: адамдан башлап айванларгъа, сюйрелип юрген махлюкъларгъа ве кок къушларына баргъандже къырарым, чюнки Мен оларны ясагъаныма пешман эттим.

⁸Нух исе РАББИнинъ алгъышына малик олды.

⁹Мына, Нух ве онынъ эвлятлары акъкъында ривает. О заман яшагъан адамларнынъ арасында тек Нух къусурсыз ве инсафлы адам эди. О, Алланынъ козю огюнде ачыкъ яшай эди.

¹⁰Нухнынъ учь огълу бар эди: Шем, Хам ве Яфет.

¹¹Алланынъ козю алдында ер юзю харап олды. Ер юзю акъсызлыкъкъа синъип толды.

¹²Алла ер юзюне бакъты, ве о, керчектен де харап эди. Ер юзюнде эр бир тири джан юрген ёлуны харап этти.

¹³Алла Нухкъа: — Мен ер юзюндеки эр бир тири джанны ёкъ этерим. Чюнки эр бир тири джан ер юзюни акъсызлыкъкъа толдурды. Мен оларны ве оларнен берабер ер юзюни де къырарым, — деди.

¹⁴— Лякин сен озюнъе гофер [10] терегинден бир сандыкъ яп да, ичини козьлерге болип, ички ве тыш тарафларыны зифтнен зифтле.

¹⁵Онынъ узунлыгъы 135 метр, кенълиги 22,5 метр, юксеклиги де 13,5 метр [11] олсун.

¹⁶Таваны тёпесинден ярым метр [12] юкъары котерильсин. Бир тарафындан къапу ач. Сандыкънынъ ичинде биринджи, экинджи ве учюнджи къатларыны яп.

¹⁷Мен ер юзюни сувгъа гъаркъ этерим ве онынъ устюндеки эр бир ичинде аз-бучукъ руху олгъан джанларны ёкъ этерим. Ер юзюнде яшагъан эр бир тири джан гъайып оладжакътыр.

¹⁸Лякин санъа Меним васиетим оладжакъ. Сен сандыкъкъа огъулларынъ, къадынынъ ве келинлеринънен берабер кирип,

¹⁹янынъа, сеннен сагъ къалсынлар деп, эр бир джанлы махлюкътан эркек-ыргъачыны чифтлеп алырсынъ.

²⁰Эписи къушлар, айванлар ве уфакъ махлюкъларнынъ эр бир чешити, сагъ къалмакъ ичюн, чифт-чифт сеннен сандыкъкъа кирсинлер.

²¹Озюнъе ве оларгъа аш ве емнинъ эр бир чешитинден алып азырла. О да озюнъе аш, оларгъа исе ем олур.

²²Алла насыл эмир эткен олса, Нух ойле де япты.