Read Мукъаддес Китап къырымтатар тилинде, Башланув 7 Bible Online

Башланув 7 - Мукъаддес Китап къырымтатар тилинде, bible

Башланув 7

¹Рабби Нухкъа: — Бутюн къорантанъны алып, сандыкъкъа кир. Озь несилинъде тек сен инсафлы олгъанынъ ичюн, Мен сени сайлап алдым.

²Янынъа элял айванлардан эркек-ыргъачыларыны едишер чифт, арам айванлардан эркек-ыргъачыларыны бирер чифт

³ве кок къушларынынъ эписи сойларындан эркек-ыргъачыларыны едишер чифт ал. Ер юзюнде оларнынъ эвлятлары сакълансын.

⁴Еди куньден сонъ Мен ер юзюне 40 кунь ве 40 гедже девамында ягъаджакъ ягъмур ягъдырырым, яраткъанларымнынъ эписини ер юзюнден силерим, — деди.

⁵Нух Рабби-Таалянынъ бутюн эмир эткенлерини япты.

⁶Сув ташкъыны ер юзюне кельгенде, Нух 600 яшында эди.

⁷Нух, огъуллары, къадыны, келинлеринен берабер сув ташкъынындан сакъланмакъ ичюн сандыкъкъа кирдилер.

⁸[8-9] Алла-Тааля эмир эткени киби, онъа эписи элял ве арам айванлар, къушлар ве эр бир джанлы махлюкъларнынъ бутюн сойларындан эркек-ыргъачы чифт-чифт кельдилер.

¹⁰Еди куньден сонъ ташкъын сувлары ер юзюне келе башладылар.

¹¹Нух 600 яшыны толдургъан йылында, экинджи айнынъ он единджи кунюне буюк ер ярылды да, буюк теренликтен сув урып ташты, кок къапулары да ачылды,

¹²ве 40 кунь ве 40 гедже девамында ер юзюне ягъмур ягъа башлады.

¹³Тамам шу куню Нух, Нухнынъ огъуллары Шем, Хам ве Яфет, Нухнынъ къадыны ве учь келини сандыкъкъа кирдилер.

¹⁴Оларнен берабер чешит сойлардан эписи кийик айванлар ве эв айванлары, ве чешит сойлардан ер юзюнде булунгъан бутюн махлюкълар, ве чешит сойлардан эписи къушлар ве учкъан махлюкълар сандыкъкъа кирдилер.

¹⁵Ичинде аз-бучукъ руху олгъанларнынъ эписи,

¹⁶эр бир союндан эркек-ыргъачы, Нухкъа эмир эткени дайын, онынъ сандыгъына кирдилер. Сонъ Рабби-Тааля Нухнынъ артындан къапуны япты.

¹⁷Сув ташкъыны 40 кунь девам этти. Сув кучьлешип, артып башлагъанда, сандыкъны котерди, ве сандыкъ ялдап кетти.

¹⁸Сув эп арта эди ве ер юзюни къаплады. Сандыкъ сув устюнде ялдай эди.

¹⁹Сув исе, кок тюбюнде олгъан энъ юксек байырларнынъ тёпелерини къапатмагъандже, эп юкъары котериле эди.

²⁰Сув, оларнынъ устюне еди метр [13] котерилип, байырларны сув тюбюнде къалдырды.

²¹Ер юзюнде къыбырдагъан эр бир тири джан: эм къушлар, эм айванлар, эм махлюкълар, эм эписи адамлар ёкъ олдылар.

²²Топракъ устюнде эписи ичинде аз-бучукъ руху олгъанлар гъайып олдылар.

²³Ер юзюни толдургъан эр бир ичинде джаны олгъан махлюкъ къырылды: эм адамлар, эм айванлар, эм джанаварлар, эм кок къушлары — эписи ер юзюнден силиндилер. Ялынъыз Нух ве онен берабер сандыкъта олгъанлар сагъ къалдылар.

²⁴Ер юзю исе 150 кунь сувгъа гъаркъ эди.