Read Мукъаддес Китап къырымтатар тилинде, Башланув 8 Bible Online

Башланув 8 - Мукъаддес Китап къырымтатар тилинде, bible

Башланув 8

¹Алла Нухны ве онен берабер сандыкъта олгъан эписи кийик айванларны, ве эписи эв айванларыны акъылында тута эди. Алла ельни уфюртти, ве сувлар кери къайтты.

²Буюк теренликнен кок къапулары къапалып, коктен ягъмур ягъмагъа токътады.

³Сув исе, 150 кунь кечкен сонъ, яваш-яваш ер юзюнден кери къайтмагъа ве эксильмеге башлады.

⁴Сандыкъ единджи айнынъ он единджи кунюне Арарат дагъларында ерге тийип токътады.

⁵Йылнынъ онунджы айынадже сув даима эксиле эди; онунджы айнынъ биринджи куню исе байыр тёпелери корюне башладылар.

⁶Къыркъ кунь кечкен сонъ, Нух сандыкънынъ таванында олгъан пенджерени ачып,

⁷тышарыгъа къаргъаны йиберди, къаргъа исе, ер къурумагъандже, де учып кетип, де артына къайтып айлана башлады.

⁸Сонъра Нух, ер юзюнден сув кеткенини бильмек ичюн, тышарыгъа гогерджинни йиберди.

⁹Лякин гогерджин, ер юзю аля сув астында олгъаны ичюн, къонмагъа ер тапалмайып артына къайтты. Нух, къолуны узатып, гогерджинни сандыкъкъа алды.

¹⁰Даа еди кунь беклеп, о, бир даа гогерджинни йиберди.

¹¹Гогерджин, агъзында зейтюн япрагъынен, акъшам артына къайтты. Бойлеликнен Нух, ер юзюнден сув кеткенини бильди.

¹²Нух, даа еди кунь беклеп, кене гогерджинни йиберди, ве бу сефер о кери къайтмады.

¹³Нух яшайышынынъ 601-инджи йылында, биринджи айнынъ биринджи кунюне сув джыйылды. Нух, сандыкънынъ таванында олгъан пенджерени ачып, ер юзю деерлик къуру олгъаныны корьди.

¹⁴Экинджи айнынъ 27-нджи кунюне ер устю бутюнлей къуруды.

¹⁵Алла Нухкъа:

¹⁶— Сандыкътан къадынынънен, огъулларынънен, келинлеринънен берабер чыкъ.

¹⁷Янынъдаки эр бир тири джанны: къушлар, айванлар, ер юзюндеки бутюн махлюкъларны — эписини чыкъар. Олар дагъылып ер юзюни толдурсынлар ве ер устюнде догъып артсынлар, — деди.

¹⁸Нух огъулларынен, къадынынен ве келинлеринен берабер сандыкътан чыкъты,

¹⁹артларындан исе чешит сойларындан эписи кийик айванлар, уфакъ-тюфек махлюкълар ве къушлар — дюньяда яшагъанларынынъ эписи сыра-сыра ер юзюне чыкътылар.

²⁰Нух Рабби-Таалягъа къурбан чалмакъ ичюн ерни азырлады. Шу ерде эписи элял айванлардан ве къушлардан алып къурбан чалды ве бутюнлей якъты.

²¹Къурбанларнынъ мис къокъуларыны алып, Рабби-Тааля Озю-Озюне: — Энди адамлар ичюн ер юзюни къаргъамайджагъым. Оларнынъ фикирлери яшлыкътан ярамайлыкъкъа ынтылгъанына бакъмадан, Мен ер юзюнде яшагъанларынынъ эписини бир даа къырмайджагъым.

²²Энди дюнья тургъандже сачкъан ве оргъан вакъытлары, сувукъ ве сыджакъ, яз ве къыш, кунь ве гедже битмейджеклер, — деди.