Read Мукъаддес Китап къырымтатар тилинде, Башланув 9 Bible Online

Башланув 9 - Мукъаддес Китап къырымтатар тилинде, bible

Башланув 9

¹Алла Нухны ве огъулларыны бойле деп багъышлады: — Догъып чокълашынъыз ве ер юзюни толдурынъыз.

²Ер юзюндеки бутюн айванлар, кок къушлары, ердеки махлюкълар ве денъиздеки эписи балыкълар сизден къоркъсун ве сизинъ огюнъизде титресинлер: олар эписи сизинъ къолунъыздадырлар.

³Эвель ер юзюнде оськен эр бир шейни бергеним дайын, бутюн айванларны ашамагъа сизге разылыкъ берем.

⁴Лякин ичинде джаны, демек къаны олгъан этни ашаманъыз.

⁵Сизинъ къанынъызны, демек джанынъызны алгъанлары ичюн, бу къан тёккенлерини джезаларым. Эм айванны, эм озь къардашынынъ джаныны алгъан адамны Мен джезаларым.

⁶Эгер бирев адамнынъ къаныны тёксе, онынъ къаныны да адам тёксюн. Чюнки Мен адамны къыяфетиме коре яраттым.

⁷Сизлер исе догъып артынъыз ве ер юзюнде ерлешип чокълашынъыз.

⁸Сонъ Алла Нухкъа ве онынъ огъулларына:

⁹[9-10] — Сизге ве сизинъ несилинъизге, ве эписи сандыкътан тюшкен ичинде джаны олгъан махлюкъларгъа: къушлар, айванлар ве кийик айванларгъа — бутюн дюньядаки махлюкъларгъа Меним вадем бар.

¹¹Мен сизге, энди ташкъын сувларындан дюньядаки эписи тири джан къырылмайджагъыны ве ер юзюни бошаткъан сув ташкъыны бир даа олмайджагъыны ваде этем, — деди.

¹²[12-13] — Ер сакинлерине берген вадемнинъ бельгиси оларакъ Мен Озь яйымны — кок къушагъыны — булутларда астым. Бу сизге ве бутюн яшагъан махлюкъларгъа эбедиен берген вадемнинъ бельгисидир.

¹⁴Кокте булутларны топлагъанымда, булутлар арасында кок къушагъы пейда олур.

¹⁵О заман Меним акъылыма сизге ве бутюн махлюкъларгъа берген вадем келир, ве эр бир джанны ёкъ эткен сув ташкъыны бир даа текрарланмаз.

¹⁶Булутларда кок къушагъы пейда олур, ве Мен оны корип ер сакинлерине эбедий берген вадемни хатырларым, — деди Алла.

¹⁷Даа Алла Нухкъа: — Бу Меним ер юзюнде яшагъанларынынъ эписине берген вадемнинъ бельгисидир, — деди.

¹⁸Сандыкътан чыкъкъан Нухнынъ огъуллары Шем, Хам ве Яфет эдилер. (Хам Ханааннынъ бабасы олды.)

¹⁹Бу учеви Нухнынъ огъуллары эдилер, ве олардан бутюн ер юзю толдурылды.

²⁰Нух топракъны ишлемеге башлады ве юзюм багъыны сачты.

²¹О, шарап ичип саргъушланды ве озь чадырында чыр-чыплакъ ята эди.

²²Ханааннынъ бабасы олгъан Хам, бабасынынъ чыплакълыгъыны корьди ве чыкъып эки агъа-къардашларына икяе этти.

²³Шем ве Яфет урба алып ве омузларына къойып, арт-артына кеттилер ве бабаларынынъ чыплакълыгъыны къапаттылар. Башкъа тарафкъа бакъып, олар бабаларынынъ чыплакълыгъыны корьмедилер.

²⁴Нух шарапдан айынып ве онынъ экинджи огълу Хам онен нелер япкъаныны билип,

²⁵бойле деди: — Ханаан лянет олсун! Озь агъаларында о, къулларнынъ къулу олсун.

²⁶Сонъ даа бойле деди: — Шемнинъ Алласына, РАББИге шукюрлер олсун! Ханаан исе онынъ къулу олсун!

²⁷Алла Яфетнинъ ерлерини кенълештирсин [14]. Яфет Шемнинъ чадырларында яшасын. Ханаан исе онынъ къулу олсун.

²⁸Сув ташкъынындан сонъ Нух 350 йыл яшады.

²⁹Нух эписи олып 950 йыл яшады, сонъ о кечинди.