Read Мукъаддес Китап къырымтатар тилинде, Чыкъыш 1 Bible Online

Чыкъыш 1 - Мукъаддес Китап къырымтатар тилинде, bible

Чыкъыш 1

¹Якъупнен берабер Мысыргъа кельген Исраиль [1] огъулларынынъ адлары булардыр:

²Рубен, Шимеон, Левий, Ехуда,

³Иссасхар, Зевулун, Биньямин,

⁴Дан, Нафтали, Гад ве Ашер. Эр бири озь къорантасынен кельди.

⁵Якъупнынъ бутюн эвлятлары 70 джан эдилер, олардан олгъан Юсуф къорантасынен берабер исе о заман Мысырда яшай эди.

⁶Юсуф ве онынъ эписи агъа-къардашлары ве оларнынъ эписи акъранлары кечиндилер.

⁷Исраиллилер исе догъып арттылар, зияделештилер ве чокъ сайылы олдылар, ве Гошен виляети оларнен толдурылды.

⁸Сонъра Мысырда Юсуфны бильмеген янъы падиша тахткъа чыкъты.

⁹О, озь халкъына: — Мына Исраиль халкъы бизден чокъ сайылы ве онынъ ичюн къудретли олды.

¹⁰Келинъиз, оларнен япаджакъ ишимизни акъылнен япайыкъ. Ёкъса, олар даа чокълашырлар ве, дженк башласа, олар бизим душманларымызгъа къошулыр, бизге къаршы дженк этер ве топрагъымыздан чыкъып кетерлер, — деди.

¹¹Исраиллилерни агъыр ишке зорламакъ ичюн, мысырлылар оларгъа башлыкълар къойдылар. Исраиллилер фыравунгъа, емеклерни сакъламакъ ичюн, Пифом ве Раамсес деген шеэрлерни къурдылар.

¹²Лякин не къадар чокъ оларны зорласалар да, о къадар олар бу мемлекетте чокълаша ве даркъала эдилер, тап мысырлылар Исраиль огъулларындан къоркъмагъа башладылар.

¹³Онынъ ичюн олар исраиллилерни ишке мераметсизликнен зорлай эдилер.

¹⁴Мысырлылар оларгъа киреч ве кирпичлернен агъыр ишни ве эр бир тарла ишини берип, оларнынъ яшайышларыны пек аджджы эттилер. Эр бир агъыр ишке мысырлылар исраиллилерни мераметсизликнен зорлай эдилер.

¹⁵Мысыр падишасы еудий эбанайларындан экисини чагъыртты. Бирисининъ ады Шифра эди, дигерининъ — Пуа.

¹⁶О, оларгъа: — Еудийлерде эбанайлыкъ япкъанда, олар бала догъгъанларыны корьгенинъизде, эгер огълан олса, оны ольдюринъиз, къыз олса эгер, сагъ къалдырынъыз, — деп эмир этти.

¹⁷Лякин эбанайлар Алладан къоркъа эдилер ве Мысыр падишасы оларгъа айткъаны киби япмайып, огълан балаларны сагъ къалдыра эдилер.

¹⁸О заман Мысыр падишасы эбанайларны озюне чагъыртты ве олардан: — Не ичюн бойле япасынъыз? Не ичюн огълан балаларны сагъ къалдырасынъыз? — деп сорады.

¹⁹— Еудий къадынлары Мысыр къадынлары дайын дегиль. Олар сагъламлар. Эбанай кельмезден эвель, олар энди догъалар, — дедилер фыравунгъа эбанайлар.

²⁰Алла эбанайларгъа мераметли эди. Халкъ исе чокъ сайылы ве онынъ ичюн къудретли ве кучьлю ола эди.

²¹Эбанайлар Алладан къоркъкъанлары ичюн, О оларны къоранталы ве эвли-баркълы этти.

²²О заман фыравун бутюн озюнинъ халкъына эмир этти: — Эр бир янъы догъгъан еудий огъланны дерьягъа ташланъыз, эр бир къызны исе сагъ къалдырынъыз.