Read Мукъаддес Китап къырымтатар тилинде, Чыкъыш 12 Bible Online

Чыкъыш 12 - Мукъаддес Китап къырымтатар тилинде, bible

Чыкъыш 12

¹Мысыр топрагъында РАББИ Мусагъа ве Харунгъа бойле деп айтты:

²— Бу ай сизде айларнынъ башы олсун. Йылнынъ айларындан о, биринджи олсун.

³Бутюн Исраиль джемиетине айтынъыз ки, бу айнынъ онунджы куню эр бир адам озь къорантасына коре къой-эчкилеринден бирини алсын. Эр бир къорантагъа бирер айван олсун.

⁴Эгер къоранта бир айванны ашап битирип оламайджакъ киби уфакъ олса, эвине энъ якъын олгъан къомшусынен берабер джан сайысына коре айван алсын. Ким не къадар ашайджагъына коре, озюнъизге айван сайып алынъыз.

⁵Айван сизде къусурсыз, эркек ве бир яшлы олмакъ керек. Оны къозулардан я да улакълардан алынъыз.

⁶О, сизде бу айнынъ он дёртюнджи кунюнедже турсун. О заман бутюн Исраиль джемиетининъ топлашувы оны акъшам сойсун.

⁷Онынъ къанындан алып, айванны ашайджакъ эвлеринде къапу первазынынъ эки тарафыны ве устюни якъсынлар.

⁸Онынъ этини шу геджеси атешке къызартып, ашап битирсинлер. Оны маясыз хамырдан пишкен питенен ве аджджы отларнен ашасынлар.

⁹Оны чий я да сувгъа пиширип ашаманъыз, амма башынен, аягъынен ве ич алятынен берабер атешке къызартып ашанъыз.

¹⁰Ондан сабагъадже бир шей къалдырманъыз. Амма ондан къалгъаныны сабагъадже атеште якъынъыз.

¹¹Оны бойле ашанъыз: беллеринъиз багълы олсун, аякъкъапларынъыз аякъларынъызда, таякъларынъыз исе къолларынъызда олсун. Оны ашыкъчанлыкънен ашанъыз. Бу — РАББИнинъ Песахыдыр [5].

¹²Мен исе тамам бу геджеси Мысыр топрагъындан кечерим ве адамдан башлап айванларгъа баргъандже, Мысыр топрагъында олгъан эр бир биринджи догъгъан баланы ольдюририм ве эписи Мысыр аллаларыны джезаларым. Мен — РАББИм.

¹³Сиз олгъан эвлер устюндеки къан бельги олур. Мен къанны корерим ве сизинъ янынъыздан кечип кетерим. Мысыр топрагъыны къыргъанымда, сизни къыргъан фелякет олмаз.

¹⁴Бу кунь сиз ичюн хатырлаткъан кунь олсун: оны РАББИге байрам оларакъ несильден несильге япынъыз. Сиз ичюн бу эбедий эмирдир.

¹⁵Еди кунь маясыз пишкен пите ашанъыз. Энъ биринджи кунюнден башлап, эвлеринъизден маяны ёкъ этинъиз. Ким биринджи куньден башлап, единджи куньгедже минген хамырдан пишкен пите ашаса, о джан Исраиль халкъындан айырылыр.

¹⁶Биринджи куню сизде мукъаддес къурултай оладжакъ, единджи куню де мукъаддес къурултай оладжакътыр. Бу куньлери ич бир тюрлю иш япмагъа олмай. Сизге ялынъыз ашамакъ ичюн аш пиширмеге мумкюн.

¹⁷Маясыз Пишкен Пите Байрамыны япынъыз, чюнки тамам бу куню Мен сизинъ ордуларынъызны Мысыр топрагъындан чыкъардым. Бу кунни эбедий урф-адет оларакъ несильден несильге япынъыз.

¹⁸Биринджи айнынъ он дёртюнджи куннинъ акъшамындан башлап, шу айнынъ йигирми биринджи куннинъ акъшамынадже маясыз пишкен пите ашанъыз.

¹⁹Эвлеринъизде еди кунь мая олмамакъ керек, чюнки ким минген хамырдан пишкен пите ашаса, о джан, кельмешекми я да шу ернинъ темель сакиними олсун, Исраиль джемиетинден айырыладжакътыр.

²⁰Минген хамырдан бир шей ашаманъыз. Эр бир яшагъан еринъизде маясыз пишкен пите ашанъыз.

²¹Муса, эписи Исраиль акъсакъалларыны чагъыртып, оларгъа бойле деди: — Къоранталарынъызгъа коре айванларны сайлап алынъыз ве оларны сойып, Песахны азырланъыз.

²²Эзов отунынъ деметини алып, савутта олгъан къангъа батырып, савуттаки къаннен къапу первазынынъ устюни ве эки тарафыны якъынъыз. Сиз исе биринъиз озь эвинъизнинъ къапусындан сабагъадже чыкъманъыз.

²³РАББИ Мысырны къырмагъа чыкъып, къапу первазынынъ устюндеки ве эки тарафындаки къанны корип, къапуларынынъ янларындан кечип кетер ве олюм кетириджи Мелекке, сизге зарар кетирмек ичюн, эвлеринъизге кирмеге бермез.

²⁴Буны озьлеринъиз ве огъулларынъыз эбедий къанун оларакъ кутюнъиз.

²⁵Озю айткъаны дайын, сизге РАББИ береджек топракъкъа киргенинъизде, бу адетни кутюнъиз.

²⁶Балаларынъыз сизден: «Бу насыл адет я?» — деп сорагъанларында исе,

²⁷оларгъа: «Бу — Мысырда мысырлыларгъа зарар кетиргенде, Исраиль огъулларынынъ эвлери янларындан кечип кеткен, эвлеримизни къуртаргъан РАББИге Песах къурбаныдыр», — деп айтынъыз. Халкъ, седждеге къапанып, ибадет этти.

²⁸Исраиль огъуллары кетип, Мусагъа ве Харунгъа РАББИ эмир эткени киби, ойле де яптылар.

²⁹Яры геджеде РАББИ Мысыр топрагъында олгъан эписи биринджи догъгъан балаларны, тахтында отургъан фыравуннынъ биринджи догъгъан баласындан башлап, зинданда отургъан эсирнинъ биринджи догъгъан баласынадже, айванларнынъ бутюн биринджи балаларыны да ольдюрди.

³⁰Геджеси фыравун, онынъ эписи къуллары ве бутюн Мысыр турды. Мысырлыларда буюк къыямет къопты, чюнки олю олмагъан эв ёкъ эди.

³¹Фыравун бу геджеси Муса ве Харунны чагъыртты ве: — Турунъыз! Эм сиз, эм Исраиль огъуллары халкъымнынъ арасындан чыкъып кетинъиз. Барынъыз да, айткъанынъыз дайын, РАББИге ибадет этинъиз.

³²Айткъанынъыз дайын, озь къой-эчкилеринъизни ве туварларынъызны алынъыз. Кетинъиз ве манъа эйилик тиленъиз, — деди.

³³Халкъны о топракътан тез-тез ёлламакъ ичюн, мысырлылар оларны къувалай эдилер, чюнки олар: «Биз эпимиз олермиз», — деп айта эдилер.

³⁴Халкъ озюнинъ экшимеген хамырыны алып кетти. Урбаларына сарылгъан оларнынъ хамыр савутлары омузларында эдилер.

³⁵Исраиллилер, Муса айткъаны киби япып, мысырлылардан кумюш шейлерни, алтын шейлерни ве урбаларны сорадылар.

³⁶РАББИ исе мысырлыларнынъ козьлеринде халкъкъа мераметлик берди: мысырлылар халкъкъа шейлер бердилер, ве исраиллилер мысырлыларнынъ барлыгъыны алып кеттилер.

³⁷Сонъ Исраиль огъуллары Раамсес шеэринден Суккот деген ерге ёл алдылар. Оларнынъ сайысы, къадынлар ве балалардан гъайры, 600 бинъге якъын джаяв кеткен акъайлар эди.

³⁸Оларнен берабер чешит миллетлерден чокъ адамлар ве баягъы буюк сюрюни асыл эткен къой-эчкилернен туварлар да чыкъып кеттилер.

³⁹Мысырдан алып чыкъкъан хамырдан олар маясыз пите пиширдилер, чюнки хамыр экшимеген эди. Олар Мысырдан къувалангъан эдилер ве вакъыт джоймагъа имкянлары олмагъанындан, озьлерине ашны биле азырламадылар.

⁴⁰Исраиль огъулларынынъ Мысырда яшап тургъан вакъты 430 йыл эди.

⁴¹430 йыл кечкен сонъ, тамам бу куннинъ геджесинен РАББИнинъ бутюн ордулары Мысыр топрагъындан чыкъып кетти.

⁴²О гедже РАББИ буюк дикъкъат иле Исраиль огъулларыны Мысырдан алып чыкъа эди. Бунынъ ичюн несильден несильге бутюн Исраиль огъуллары бу геджеси юкъламайып, РАББИге ибадет этсинлер.

⁴³Мусанен Харунгъа РАББИ бойле деп айтты: — Мына Песахнынъ низамнамеси: ич бир ябанджы оны ашамасын.

⁴⁴Кумюшке сатын алынгъан эр бир къул исе сюннет этильген сонъ Песахны ашамакъ мумкюн.

⁴⁵Вакътынджа яшагъан адамнен ыргъат исе оны ашамасын.

⁴⁶Оны бир эв ичинде, сабагъадже къалдырмайып, ашамакъ керек. Этни эвден чыкъарманъыз, кемиклерини де парламанъыз.

⁴⁷Исраиль огъулларынынъ бутюн джемиети Песахны тутмакъ кереклер.

⁴⁸Эгер сенде вакътынджа яшамакъ ичюн кельмешек ерлешип, РАББИнинъ Песахыны япмагъа истесе, онынъ эвинде олгъан эписи эркеклерни сюннет эт. Сонъ о, Песахны япмакъ мумкюн, ве энди ернинъ темель сакини дайын олур. Ич бир сюннет этильмеген исе оны ашамасын.

⁴⁹Эм темель сакинге, эм аранъызда яшамакъ ичюн ерлешкен кельмешекке бир къанун олсун.

⁵⁰Эписи Исраиль огъуллары, РАББИ Мусагъа ве Харунгъа насыл эмир эткен олса, ойле де яптылар.

⁵¹Тамам бу куню РАББИ Мысыр топрагъындан Исраиль огъулларыны ордуларынен чыкъарды.