Read Мукъаддес Китап къырымтатар тилинде, Чыкъыш 13 Bible Online

Чыкъыш 13 - Мукъаддес Китап къырымтатар тилинде, bible

Чыкъыш 13

¹Сонъ РАББИ Мусагъа бойле деди:

²— Исраиль огъулларында эр бир биринджи догъгъан джанны, эм адамдан, эм айвандан догъгъан баласыны Манъа айырып элялла, чюнки олар Менимки.

³Муса халкъкъа бойле деди: — Мысырдан, къуллукъ топрагъындан чыкъкъан бу кунни акъылынъызда тутунъыз, чюнки РАББИ сизни андан Озь къудретинен чыкъарды. Бу куню минген хамырдан пишкен питени ашаманъыз.

⁴Сиз бугунь, баарьнинъ ильк куньлеринде [6] ёлгъа чыкъасынъыз.

⁵Сизинъ Алланъыз олгъан РАББИ сютнен бал акъкъан топракъны, ханаанлыларнынъ, хитлилернинъ, аморлыларнынъ, хивлилернинъ, евуслыларнынъ топрагъыны деделеринъизге бермеге емин этти. О, сизни бу топракъкъа кирсеткен сонъ, бу айда бойле адетни тутмакъ керексинъиз:

⁶еди кунь маясыз пишкен пите ашанъыз, единджи куню исе РАББИнинъ байрамы олур.

⁷Еди кунь маясыз пишкен пите ашамакъ керек. Сизде ве бутюн яшагъан топрагъынъызда маянен пишкен бир шей, не маянынъ озю олмасын.

⁸Огълунъа да о куньде бойле айтып илян эт: «Бу — мен Мысырдан чыкъкъанда, РАББИ манъа нелер япкъанларына хатырадыр».

⁹РАББИнинъ къануны агъзынъызда олсун деп, бу шей сизге къолунъыздаки бельги киби ве манълайынъызгъа сарылгъан саргъы ерине олсун, чюнки РАББИ сизни Озь къудретинен Мысырдан алып чыкъты.

¹⁰Бойлеликнен, бу низамнамени йылдан йылгъа тайинленген вакъытта ерине кетир!

¹¹РАББИ сизге ве деделеринъизге бу ерлер акъкъында емин этти. О, сизни ханаанлыларнынъ топрагъына ерлештирген сонъ ве бу топракъны сизге берген сонъ,

¹²эр бир биринджи догъгъан огъланларынъызны ве айванларынъызнынъ биринджи догъгъан балаларыны РАББИге багъышланъыз. Огъланлар ве эркеклер — РАББИнинъки.

¹³Эшекнинъ биринджи догъгъан эркек баласы ичюн къой я да эчкининъ эркек баласыны беринъиз. Бермеге истемесенъиз эгер, эшек баласынынъ бойнуны сындырынъыз. Эписи биринджи догъгъан огъланларынъыз ичюн айваннынъ янъы догъгъан баласыны беринъиз.

¹⁴Огъулларынъыз сенден: «Бу недир?» — деп сорагъанда, оларгъа бойле деп айтынъыз: «Къуллукъ топрагъындан, РАББИ бизни Озь къудретинен Мысырдан алып чыкъты.

¹⁵Бизни йибермемек ичюн фыравун инатланып тургъанда, РАББИ адамнынъ биринджи догъгъан баласындан башлап, айванларнынъ биринджи догъгъан несилине баргъандже, Мысыр топрагъында эписи биринджи догъгъан балаларны ольдюрди. Онынъ ичюн мен биринджи догъгъан эр бир эркек несильни РАББИге къурбан чалам, огъулларымдан биринджи догъгъан балалары ичюн исе акъкъыны тёлейим.

¹⁶Бу, къолунъыздаки бельги киби ве манълайынъызгъа сарылгъан саргъы ерине олсун, чюнки РАББИ бизни Озь къудретинен Мысырдан алып чыкъты».

¹⁷Фыравун исраиллилерни йиберген сонъ, Алла: «Халкъ, озюне къаршы дженк этиледжегини корип, пешман этмесин ве Мысыргъа къайтмасын», — деп, халкъны Фелестин топрагъынынъ ёлундан, о, якъын олса да, алып бармады.

¹⁸Алла халкъны айланчыкъ сахра ёлунен Къызыл денъиз тарафына алып кетти. Силялы исраиллилер Мысыр топрагъындан чыкъып кеттилер.

¹⁹Муса Юсуфнынъ кемиклерини янына алды, чюнки Юсуф: «Сизге Алла келир, ве сиз меним кемиклеримни мындан янынъызгъа алып чыкъынъыз», — деп, Исраиль огъулларыны емин эттирди.

²⁰Исраиль огъуллары, Суккоттан чыкъып, сахранынъ сонъунда олгъан Этам деген ерде ордунен ерлештилер.

²¹Оларнынъ оглеринде РАББИ Озю кете эди. Куньдюз ёлны косьтерип, булут диреги киби, гедже исе ёлны ярыкълатып, атеш диреги киби. Бунынъ ичюн олар эм куньдюз, эм геджеси кетип ола эдилер.

²²Халкънынъ козю огюнде куньдюз — булут диреги, геджеси — атеш диреги ич ёкъ олмай эди.