Read Мукъаддес Китап къырымтатар тилинде, Чыкъыш 15 Bible Online

Чыкъыш 15 - Мукъаддес Китап къырымтатар тилинде, bible

Чыкъыш 15

¹РАББИге йырлайым, чюнки О, юксек котерильгендир! О, атны ве устюндеки атлыны денъизге ташлады.

²РАББИ — меним къудретим, меним макътав тюркюмдир, О, манъа къуртулыш берди. О, меним Аллам, Оны макътарым! О, бабамнынъ Алласы, Онынъ адыны юксельтирим.

³РАББИ — аскердир! Онынъ ады — РАББИ!

⁴О, фыравуннынъ арабаларыны ве онынъ ордусыны денъизге ташлады; фыравуннынъ энъ яхшы башлыкълары Къызыл денъизде богъулдылар.

⁵Оларны терен денъиз ютты; олар таш дайын сув тюбюне кеттилер.

⁶РАББИ! Сенинъ онъ къолунъ къудретнен нам къазанды! РАББИ! Сенинъ онъ къолунъ душманны йыкъты!

⁷Озь буюк улулыгъынъда Сен Санъа къаршы чыкъкъанларны ёкъ эттинъ. Сен Озь гъазабынъны ёлладынъ, ве о, оларны тобан дайын якъты.

⁸Нефесинъ уфюрди, ве сувлар котерильдилер, сувлар, байырлар киби, турдылар, денъизнинъ ортасындаки терен сувлар къою олдылар.

⁹Душман деди ки: «Артларындан къувалап, артларына етерим, авны болерим. Оларнен джаным тояр, къылычымны чекерим, къолум оларны къырар».

¹⁰Сен нефесинънен уфюрдинъ, ве оларны денъиз къаплады, олар терен сувлар ичине къуршун дайын далдылар.

¹¹РАББИ! Аллаларнынъ арасында Сен дайын ким бар? Мукъаддесликнен улу олгъан, макътавларгъа даима ляйыкъ олгъан, ве аджайип шейлер япкъан Сен дайын ким бар?

¹²Сен Озь онъ къолунъны узаттынъ — оларны ер ютты.

¹³Сен Озь мераметинънен Озюнъ къуртаргъан бу халкъкъа ёлны косьтересинъ. Озь къудретинънен Сенинъ отургъан еринъе бу халкъны алып кетесинъ.

¹⁴Халкълар эшитирлер ве титрерлер; Фелестин сакинлерини дешет басар.

¹⁵О заман Эдом башлыкълары титрерлер, Моав ёлбашчыларыны къоркъу басар, Ханааннынъ эписи сакинлери мугъайырлар.

¹⁶Олар къоркъу ве дешет тюбюнде къалсынлар! РАББИ! Сенинъ халкъынъ кечкендже, Сен Озюнъе айырып алгъан халкъынъ кечкендже, олар къолунънынъ къудретинден таш дайын тильсиз олурлар.

¹⁷РАББИ! Сенинъ мулькюнънинъ дагъына, Озюнъе отурмакъ ичюн эткен ерге, Я Рабби, Сенинъ къолларынъ яратаджакъ мукъаддес ерге Озь халкъынъны алып кирсет ве ерлештир!

¹⁸РАББИ асырлар боюнджа ве эбедиен падишалыкъ этеджектир!

¹⁹Фыравуннынъ атлары арабаларынен ве атлыларынен берабер денъизге киргенде, РАББИ оларнынъ устюне денъиз сувларыны къайтарды. Исраиллилер исе денъиз ортасындаки топракътан кечтилер.

²⁰Сонъ Харуннынъ татасы Мерьем пейгъамбер къолуна даре алды. Онынъ артындан эписи къадынлар, дарелерини алып, ойнап чыкътылар.

²¹Мерьем оларнынъ оглеринде йырлады: РАББИге йырланъыз, чюнки О, юксек котерильгендир, атны ве устюндеки атлыны денъизге ташлады!

²²Муса исраиллилерни Къызыл денъиз янындан алып кетти, ве олар Шур сахрасына кельдилер. Олар сахра бою учь кунь кеттилер, амма сувны тапалмадылар.

²³Марагъа келип, Марадаки сувны ичалмай эдилер, чюнки о, аджджы эди. Онынъ ичюн бу ер Мара [7] деп адландырылгъандыр.

²⁴Халкъ Мусагъа шикяет иле: — Бизлер не ичеджекмиз? — дедилер.

²⁵Муса, ярдым сорап, РАББИге ялварды. РАББИ исе онъа бир терек косьтерди. Муса терекнинъ парчасыны сувгъа ташлады, ве сув татлы олды. Анда РАББИ халкъкъа низамнаме ве къанунны берди, анда да халкъны сынады.

²⁶О, деди ки: — Эгер сизлер РАББИ-Таалянъызнынъ айткъанларыны эшитсенъиз ве Онынъ козю алдында Онынъ истегенини этсенъиз, эгер эмирлерине къулакъ ассанъыз ве Онынъ эписи низамнамелерини кутьсенъиз, о заман Мен мысырлыларгъа ёллагъан хасталыкълардан бирини сизге ёлламам. Чюнки Мен — РАББИм, сенинъ Тедавийиджинъим.

²⁷Исраиллилер Элим деген ерге кельдилер. Анда он эки чокъракъ ве етмиш хурма тереги бар эди. Олар анда сувларнынъ янларында ордунен ерлештилер.