Read Мукъаддес Китап къырымтатар тилинде, Чыкъыш 16 Bible Online

Чыкъыш 16 - Мукъаддес Китап къырымтатар тилинде, bible

Чыкъыш 16

¹Мысыр топрагъындан чыкъкъанларына экинджи айнынъ он бешинджи кунюнде Исраиль огъулларынынъ бутюн джемиети, Элимден ёлгъа чыкъып, Элим ве Синай арасында ерлешкен Син сахрасына кельди.

²Сахрада исе исраиллилернинъ бутюн джемиети Муса ве Харунгъа къаршы шикяетленди.

³Исраиллилер оларгъа: — Ах, эгер биз къазан-къазан этлер янында отургъанымызда, тойгъандже отьмек ашагъанымызда, Мысыр топрагъында РАББИнинъ къолундан ольген олсакъ! Сиз бизлерни, бутюн бу джемиетни ачлыкътан ольдюрмек ичюн, бу сахрагъа кетирдинъиз, — дедилер.

⁴РАББИ Мусагъа: — Иште, Мен сизлерге коктен отьмекни ягъмур дайын ягъдырырым. Халкъ, эр кунь чыкъып, оны кунюне еткени къадар джыйсын. Мен оларны сынайым: Къануныма коре бойсунып, яшайджакълармы — ёкъмы экен.

⁵Алтынджы куню исе кетиргенлерини сакъласынлар. Бу азырлагъанлары, башкъа куню джыйгъанларына коре, эки къат чокъ олур, — деди.

⁶Муса ве Харун эписи исраиллилерге: — Мысыр топрагъындан керчектен РАББИ сизни чыкъаргъаны акъкъында акъшам биледжексинъиз.

⁷Сабалайын РАББИнинъ Шуретини корерсинъиз, чюнки О, Озюне къаршы олгъан шикяетинъизни эшитти. Я биз ким олгъанмыз? Не ичюн бизге къаршы шикяетленесинъиз? — дедилер.

⁸Муса деди ки: — РАББИ сизге акъшам эт, саба исе тойгъандже отьмек береджек, чюнки РАББИ Озюне къаршы шикяетленгенинъизни эшитти. Я биз ким олгъанмыз? Шикяетинъиз бизге къаршы дегиль, амма РАББИге къаршыдыр.

⁹Муса Харунгъа бойле деди: — Исраиль огъулларынынъ бутюн джемиетине барып: «РАББИнинъ юзю огюне якъынлашынъыз, чюнки О, шикяетинъизни эшитти», — деп айт.

¹⁰Харун Исраиль огъулларынынъ бутюн джемиетине айткъанда, олар сахрагъа айланып бакътылар, ве, иште, булутта РАББИнинъ Шурети пейда олгъаныны корьдилер.

¹¹[11-12] РАББИ Мусагъа: — Мен исраиллилернинъ шикяетини эшиттим. Оларгъа бойле деп айт: «Акъшам эт ашайджакъсынъыз, саба исе отьмекке тояджакъсынъыз. О вакъыт Мен — РАББИ, сизинъ Алланъыз олгъанымны биледжексинъиз», — деди.

¹³Акъшам боденелер учып кельдилер ве орду тёпесини къапладылар. Сабалайын исе орду янына чыкъ тюшкен эди.

¹⁴Чыкъ котерильди, ве мына, сахранынъ устюнде недир уфакъ, пулчыкъларгъа ошагъан, ерге тюшкен къырав дайын, бир шей ятмакъта.

¹⁵Исраиллилер, буны корип, бири-биринден: — Бу недир? — деп айта эдилер, чюнки бунынъ не олгъаныны бильмей эдилер. Муса оларгъа: — Бу ашамакъ ичюн берильген РАББИнинъ отьмегидир.

¹⁶РАББИнинъ эмир эткени будыр: «Эр биринъиз оны ашап битиреджегинъиз къадар джыйынъыз. Бир адамгъа бир чанакъ [8] джыйынъыз, чадырынъызда къач джан олгъанына коре алынъыз», — деди.

¹⁷Исраиллилер ойле де яптылар: кими чокъ, кими аз джыйдылар.

¹⁸Чанакънен ольчедилер. Эм чокъ джыйгъан союнда арткъач ёкъ эди, эм аз джыйгъан союнда да эксиклиги олмады. Эр бири ашап битиреджеги къадар джыйды.

¹⁹Муса оларгъа: — Буны сабагъадже кимсе къалдырмасын, — деди.

²⁰Лякин олар Мусанынъ айткъаныны динълемедилер, ве базылары бундан сабагъадже къалдырдылар. Къалдыргъанлары исе къуртлады, ве фена къокъу даркъата башлады. Муса оларгъа зияде ачувланды.

²¹Саба эрте эр бири оны ашап битиреджеги къадар джыя эди. Кунеш къыздыргъанда исе о, ирип кете эди.

²²Алтынджы куню олар отьмекни эки къат чокъ, эр бир адам башына экишер чанакъ джыйдылар. Джемиетнинъ эписи башлыкълары Мусагъа келип буны айттылар.

²³Муса оларгъа: — РАББИнинъ айткъаны будыр: «Ярын — раатлыкъ, РАББИге ибадет этмек ичюн мукъаддес раатлыкъ кунюдир. Къызартыладжакъ шейлеринъизни къызартынъыз, пишириледжек шейлеринъизни пиширинъиз, къалгъаныны исе четке къойып, сабагъадже тутунъыз», — деди.

²⁴Олар оны, Муса эмир эткени дайын, сабагъадже къалдырдылар. О, фена къокъу джайратмады ве къуртламады.

²⁵Муса деди ки: — Оны бугунь ашанъыз, чюнки бугунь — РАББИге ибадет этмек ичюн раатлыкъ куню. Оны бугунь чёльде тапалмазсынъыз.

²⁶Алты кунь девамында оны джыйынъыз, единджи куню исе — раатлыкъ. О, бу куню олмаз.

²⁷Лякин халкъ арасындан базылары единджи куню де оны джыймагъа чыкътылар, амма тапалмадылар.

²⁸Сонъ РАББИ Мусагъа: — Сиз Меним эмирлеримни ве къанунларымны кутьмесинден даа чокъ вакъыт къачынаджакъсынъызмы?

²⁹Бакъынъыз, РАББИ сизге раатлыкъ кунюни берди. Шунынъ ичюн О, сизлерге алтынджы куню эки куньлюк отьмек бере. Эпинъиз ерлеринъизде къалынъыз. Единджи куню ич бир кимсе озь еринден чыкъмасын, — деди.

³⁰Сонъ халкъ единджи куню раатланды.

³¹Бу отьмекке исраиллилер «манна» деген ад къойды. О, кориандр урлугъы киби, беяз тюсте эди; лезети исе баллы пите дайын эди.

³²Муса деди ки: — РАББИнинъ эмир эткени будыр: «Сизни Мысыр топрагъындан чыкъаргъан сонъ, Мен сахрада сизге ашаткъан отьмекни корьсюнлер деп, несилинъизге сакъламакъ ичюн, бир чанакъны маннагъа толдурынъыз».

³³Муса Харунгъа: — Бир савут ал да, ичине толу чанакъ маннаны къой. Оны несилинъизге къалдырмакъ ичюн, Алланынъ огюне кетир, — деди.

³⁴РАББИ Мусагъа эмир эткени киби, Харун, оны сакъламакъ ичюн, Шаатлыкъ огюне къойды.

³⁵Исраиль огъуллары маннаны отурыла-билир топракъкъа кельгенлерине къадар къыркъ йыл девамында ашадылар. Олар маннаны Ханаан топрагъы сынъырына кельгенлерине къадар ашадылар.

³⁶Чанакъ исе эфанынъ [9] он пайда бир пайыдыр.