Read Мукъаддес Китап къырымтатар тилинде, Чыкъыш 17 Bible Online

Чыкъыш 17 - Мукъаддес Китап къырымтатар тилинде, bible

Чыкъыш 17

¹РАББИнинъ эмиринен исраиллилернинъ бутюн джемиети Син сахрасындан чыкъып, озь ёлуны алдылар ве Рефидим деген ерде ордунен ерлештилер. Анда халкъкъа ичмек ичюн, сув ёкъ эди.

²Халкъ Мусанен къавгъа этип: — Бизге ичмеге сув беринъиз, — дей эди. Муса оларгъа: — Не ичюн сиз меннен къавгъа этесинъиз? Не ичюн РАББИни сынайсынъыз? — деди.

³Анда халкъ сувсай эди ве Мусагъа къаршы шикяетленип: — Бизни Мысырдан неге алып чыкътынъ? Бизни, балаларымызны ве сюрюлеримизни сувсузлыкътан ольдюрмек ичюн алып чыкътынъмы? — дей эди.

⁴Муса, ярдым сорап, РАББИге ялварды: — Бу халкънен мен не япайым? Даа бираз вакъыт кечсе, олар мени ташнен урарлар.

⁵РАББИ Мусагъа: — Халкънынъ огюнден кеч. Янынъа Исраиль акъсакъалларындан бир къачыны ал. Эм де Ниль дерьясына ургъан таягъынъны къолунъа алып кеч.

⁶Иште, Хоревдеки къая устюнде Мен алдынъа турарым. Сен къаягъа урарсынъ, ве ондан сув чыкъар. Оны халкъ ичер, — деди. Исраиль акъсакъалларынынъ козьлери огюнде Муса ойле де япты.

⁷О ернинъ адыны Масса ве Мерива [10] деп къойдылар, чюнки исраиллилер, къавгъа эте эдилер ве: «Арамызда РАББИ бармы я да ёкъмы?» — деп РАББИни сынай эдилер.

⁸Амалеклилер келип, Рефидим деген ерде исраиллилернен дженк эттилер.

⁹Муса Ехошуагъа бойле деди: — Озюнъе акъайларны сайлап ал да, барып амалеклилернен дженклеш. Ярын мен байыр тёпесинде турарым, къолумда да Алланынъ таягъы олур.

¹⁰Ехошуа, Муса онъа айткъаны киби япып, амалеклилернен дженклешмеге кетти. Муса, Харун ве Хур исе байырнынъ тёпесине чыкътылар.

¹¹Муса къолларыны котергенде — исраиллилер енъе эдилер, къолларыны тюшюргенде исе — амалеклилер енъе эди.

¹²Лякин Мусанынъ къоллары болдурды. О вакъыт Харун ве Хур, таш алып, онынъ тюбюне къойдылар, ве Муса онынъ устюне отурды. Харуннен Хур исе онынъ къолларыны тутып турдылар, бири — бир тарафтан, экинджиси исе — экинджи тарафтан. Кунь баткъандже Мусанынъ эки къолу котерилип тургъан эди.

¹³Амалекке къаршы къылычларнен дженклешип, Ехошуа онынъ устюнден гъалип чыкъты.

¹⁴Сонъ РАББИ Мусагъа бойле деди: — Буны акъылда тутмакъ ичюн, эльязмада язып, Ехошуанынъ къулагъына мытлакъа къой ки, Мен ер юзюнде амалеклилернинъ изини биле къалдырмам.

¹⁵Сонъ Муса РАББИге къурбан чалынгъан ерни къурды, онъа «РАББИ — Меним Байрагъым» [11] деген ад къойды

¹⁶ве бойле деди: — Къолларым РАББИге котерильгенлери ичюн, О, Амалекке къаршы несильден-несильге дженк этеджек.