Read Мукъаддес Китап къырымтатар тилинде, Чыкъыш 18 Bible Online

Чыкъыш 18 - Мукъаддес Китап къырымтатар тилинде, bible

Чыкъыш 18

¹Мусанынъ къайнатасы Мидьяннынъ руханийи Итро, РАББИ Мысырдан исраиллилерни алып чыкъкъанда, Муса ве Озюнинъ халкъы Исраиль ичюн Алланынъ япкъан эписи шейлери акъкъында эшитти.

²О заман Мусанынъ къайнатасы Итро ондан эвель эвине къайтарылгъан Мусанынъ апайыны Циппораны

³ве онынъ эки огълуны озюне чагъыртты. Олардан бирининъ ады Гершом [12] эди, чюнки Муса: «Мен ябанджы ерде вакътынджа яшагъан адам олдым», — дей эди.

⁴Экинджисининъ ады исе Элиэзер [13] эди, чюнки Муса: «Бабамнынъ Алласы, манъа ярдымджы олып, мени фыравуннынъ къылычындан къорчалады», — деп айта эди.

⁵Мусанынъ къайнатасы Итро Мусанынъ апайы ве балаларынен сахрагъа, Алланынъ дагъы янында ордунен ерлешкен Мусагъа келип,

⁶онъа бойле хабер ёллады: — Мен, сенинъ къайнатанъ Итро, ве сенинъ апайынъ, ве онен берабер эки огълунъ санъа келемиз.

⁷Муса къайнатасыны къаршыламагъа чыкъты, онъа бель букти ве оны опьти. Бири-биринен сорашкъанларындан сонъ, олар чадыргъа кирдилер.

⁸Сонъ Муса къайнатасына Исраиль ичюн РАББИ фыравуннен ве эписи мысырлыларнен япкъанларыны икяе этти. Эм ёлда расткельген эписи къыйынлыкълар акъкъында ве РАББИ оларны фыравуннынъ ве мысырлыларнынъ къолларындан насыл къуртаргъаны акъкъында да икяе этти.

⁹Исраиллилерни мысырлылардан ве фыравуннынъ къолларындан къуртаргъанда, РАББИ исраиллилерге япкъан эйиликлерине Итро къуванды

¹⁰ве бойле деди: — Сизни мысырлыларнынъ ве фыравуннынъ къолундан къуртаргъан ве бу халкъны мысырлыларнынъ укюминден азат эткен РАББИге бинъ шукюрлер олсун!

¹¹Шимди мен билем ки: РАББИ эписи аллалардан буюк, чюнки О, бойле шейлер япып, исраиллилерни гъурурлы мысырлыларнынъ аллаларындан къуртарды.

¹²Сонъ Мусанынъ къайнатасы Итро Аллагъа бутюнлей якъылгъан ве башкъа къурбанлар чалды. Сонъ Алланынъ огюнде Мусанынъ къайнатасынен берабер аш ашамакъ ичюн, Харун ве Исраильнинъ акъсакъаллары кельдилер.

¹³Айланыр куню Муса, халкъны махкеме этмек ичюн, отурды, ве халкъ Мусанынъ огюнде сабадан акъшамгъадже турды.

¹⁴Мусанынъ къайнатасы Муса халкънен япкъанларынынъ эписини корип, ондан: — Бу, сенинъ халкънен япкъанынъ недир? Не ичюн сен бутюн кунь отурасынъ, халкъ исе сенинъ огюнъде сабадан акъшамгъадже тура? — деп сорады.

¹⁵— Халкъ манъа, Алланынъ ирадесини бильмек ичюн, келе, — деди Муса къайнатасына.

¹⁶— Оларда насылдыр иш чыкъкъанда, олар манъа келелер. Мен исе, даваларыны чезип, оларгъа Алланынъ низамнамелеринен къанунларыны огретем.

¹⁷Лякин Мусанынъ къайнатасы онъа бойле деди: — Сенинъ япкъанларынъ яхшы дегиль.

¹⁸Сен озюнъни ве сеннен олгъан халкъны къыйнайджакъсынъ, чюнки сен ичюн бу пек агъыр иш: сен оны бир озюнъ баш этамазсынъ.

¹⁹Шимди айткъанларымны динъле, мен санъа акъыл огретейим, ве Алла сеннен олур. Сен халкъ ичюн Алланынъ огюнде араджы олып, Аллагъа оларнынъ даваларыны еткиз.

²⁰Оларгъа Алланынъ низамнамелерини ве къанунларыны огрет. Насыл яшамакъ ве насыл ишлер япмакъны халкъкъа огрет.

²¹Озюнъе исе бутюн халкътан къабилиетли, Алладан къоркъкъан, ачкозь олмагъан ве адалетли адамларны сайлап ал да, оларны халкънынъ устюне бинъбашы, юзбашы, эллибашы ве онбашы оларакъ къой.

²²Олар даима халкънынъ даваларыны чезсинлер. Эр бир пек муим иш акъкъында сени хабердар этип, чезмесини санъа берсинлер, уфакъ-тюфек даваларны исе озьлери чезсинлер. Санъа къолайджа олур, ишнинъ агъырлыгъы оларгъа да тюшер.

²³Бу — Алланынъ санъа эмири. Сен буны япсанъ эгер, чыдап олурсынъ. Бутюн халкъ исе къанаатленип, озь ерине эсен-аман къайтыр.

²⁴Муса къайнатасынынъ айткъанларыны динъледи ве онынъ эписи айткъанларыны япты.

²⁵Муса бутюн Исраильден къабилиетли адамларны сайлады ве оларны халкънынъ башлыкълары этип, я да бинъбашы, юзбашы, эллибашы ве онбашы оларакъ къойды.

²⁶Олар даима халкънынъ даваларыны чезе эдилер: муим ишлер акъкъында Мусагъа хабер этип, чезмесини онъа бере эдилер, уфакъ-тюфек даваларны исе озьлери чезе эдилер.

²⁷Сонъ Муса къайнатасынен сагълыкълашты, ве о, озь топрагъына кетти.