Read Мукъаддес Китап къырымтатар тилинде, Чыкъыш 19 Bible Online

Чыкъыш 19 - Мукъаддес Китап къырымтатар тилинде, bible

Чыкъыш 19

¹Исраиллилернинъ Мысыр топрагъындан чыкъкъанларынынъ тамам учюнджи айы догъгъанда, олар Синай сахрасына кельдилер.

²Рефидимден чыкъып, Синай сахрасына кельдилер ве анда, сахрада, ордунен ерлештилер. Исраиллилер анда, дагънынъ къаршысында орду олып ерлешти.

³Муса Алланынъ огюне котерильди. РАББИ дагъдан оны чагъырып: — Якъупнынъ эвлятларына, Исраиль огъулларына бойле деп айт ве хабер эт:

⁴«Сиз мысырлыларгъа нелер япкъанымны ве сизни къартал къанатларында киби ташып, Озюме кетиргенимни корьдинъиз.

⁵Демек, эгер сиз Меним айткъанларымны динълесенъиз ве Меним васиетимни кутьсенъиз, эписи халкълардан Меним къысметим олурсынъыз. Чюнки бутюн ер — Менимкидир.

⁶Сизлер исе — Меним руханийлернинъ падишалыгъым ве мукъаддес халкъым олурсынъыз». Исраиль огъулларына айтаджакъ сёзлеринъ будыр, — деди.

⁷Муса келип, халкънынъ эписи акъсакъалларыны чагъырып, оларгъа РАББИ эмир эткен бутюн бу сёзлерни айтып берди.

⁸Бутюн халкъ: — РАББИнинъ бутюн айткъанларыны япармыз, — деп бир агъыздан джевап берди. Муса халкънынъ сёзлерини РАББИге айтты.

⁹РАББИ исе Мусагъа: — Мен сеннен лакъырды эткенимни халкъ эшитсин ве санъа эбедиен инансын деп, Мен санъа къою булутта келирим, — деди. Сонъ Муса халкъкъа РАББИнинъ сёзлерини бильдирди.

¹⁰РАББИ Мусагъа: — Халкъкъа барып, оны бугунь ве ярын эляллат.

¹¹Учюнджи куньге азыр олмакъ ичюн, озь урбаларыны ювсунлар, чюнки учюнджи куню бутюн халкънынъ козю огюнде РАББИ Синай дагъына энер.

¹²Халкъ ичюн дагънынъ чевре-четине сызыкъ сыз ве бойле деп айт: «Дагъгъа чыкъмагъа ве онынъ этегине токъунмагъа сакъынынъыз. Дагъгъа токъунгъан эр кимни ольдюринъиз,

¹³амма бу адамгъа къолнен токъунманъыз: оны ташларнен урып, я да окънен атып ольдюринъиз. Айванмы о, я да адаммы, сагъ къалмасын. Девамлы бору сеси эшитильген вакъытта исе олар дагъгъа чыкъмакъ мумкюн», — деди.

¹⁴Муса дагъдан халкъкъа тюшти ве халкъны эляллатты. Олар озь урбаларыны ювдылар.

¹⁵Муса халкъкъа: — Учюнджи куню азыр олунъыз, апайларынъызгъа токъунманъыз, — деди.

¹⁶Учюнджи куню танъ аткъанда, кок гурюльдеди, яшын яшынлады, дагъ тёпесинде къою булут пейда олды, ве пек кучьлю бору сеси эшитильди. Ордуда олгъан бутюн халкъ титреди.

¹⁷Муса халкъны ордудан Алланынъ къаршысына чыкъарды, ве олар дагъ этеги янында турдылар.

¹⁸Синай дагъы исе, онынъ устюне атеш ичинде РАББИ энгени ичюн, бутюнлей тютей эди. Ондан чыкъкъан тютюн собадан чыкъкъан тютюн дайын эди, ве бутюн дагъ кучьлю къалтырай эди.

¹⁹Бору сеси эп къуветлене эди. Муса айта эди, ве Алла онъа давушнен джевап бере эди.

²⁰РАББИ Синай дагъына, дагънынъ тёпесине энди. РАББИ Мусаны дагънынъ тёпесине чагъырды, ве Муса чыкъты.

²¹РАББИ Мусагъа: — Тюшип, халкъкъа, олар РАББИни корьмек ичюн, Онъа къаршы ынтылмасынлар ве олардан чокъусы гъайып олмасынлар деп, анълат.

²²РАББИге якъынлашкъан руханийлер исе, РАББИ оларны ёкъ этмесин деп, элялланмакъ борджлулар, — деди.

²³Муса РАББИге бойле деди: — Синай дагъына халкъ чыкъып оламай, чюнки Сен бизни: «Дагънынъ чевре-четине сызыкъ сыз, оны азиз эт», — айтып сакъындырдынъ.

²⁴РАББИ онъа: — Сен тюш. Сонъ чыкъ, ве сеннен Харун да чыкъсын. Руханийлер ве халкъ исе, РАББИ оларны ёкъ этмесин деп, онъа чыкъмагъа ынтылмасынлар, — деди.

²⁵Муса халкъкъа тюшти ве буны онъа айтып берди.