Read Мукъаддес Китап къырымтатар тилинде, Чыкъыш 2 Bible Online

Чыкъыш 2 - Мукъаддес Китап къырымтатар тилинде, bible

Чыкъыш 2

¹Левий къабилесинден бириси озюне шу къабиледен де бир къызгъа эвленди.

²Апайы юклю олды ве огълан бала тапты. О, баланынъ пек дюльбер олгъаныны корип, оны учь ай девамында сакълай эди.

³Амма оны артыкъ сакъламагъа чареси къалмагъанындан, о, къамыштан орюльген сепетни алды ве оны къатраннен ве зифтнен зифтледи. Ичине баланы къойып, дерьянынъ ялысы янындаки къамышлыкъкъа къойды.

⁴Баланынъ татасы исе, онен не оладжагъыны корьмек ичюн, авлакъта турды.

⁵Сонъ фыравуннынъ къызы дерьягъа ювунмагъа чыкъты, онынъ хызметчи къызлары исе дерьянынъ ялы боюнда юре эдилер. О, къамышлыкънынъ арасындаки сепетни корьди ве озюнинъ хызметчисини оны алмакъ ичюн ёллады.

⁶Ачты ве баланы корьди. Бала агълай эди. О, оны аджыды ве: — Бу — еудий баласы, — деди.

⁷Баланынъ татасы фыравуннынъ къызындан: — Барып, баланы сюттен къалмагъандже эмиздирмек ичюн, еудий къадынларындан бирисини санъа чагъырайыммы? — деп сорады.

⁸— Эбет, бар, — деди онъа фыравун къызы. Къыз кетти ве баланынъ анасыны алып кельди.

⁹Фыравун къызы онъа: — Бу баланы ал да, оны эмиздир. Сонъ мен сенинъ акъкъынъны одерим, — деди. Къадын баланы алды ве оны эмиздире эди.

¹⁰Бала буюк олгъан сонъ, о, оны фыравун къызына алып кельди, ве бала фыравун къызынынъ огълу олды. Фыравун къызы: «Мен оны сувдан чыкъардым», — деп онъа Муса [2] деген ад къойды.

¹¹Чокъ вакъыт кечкен сонъ, Муса орта яшлы огълан олып, озь халкъына кельди ве оларнынъ агъыр иш эткенлерини корьди. Сонъ о, озь халкъындан бири олгъан еудийни бир мысырлы ургъаныны корьди.

¹²Чевре-четине бакъып ве кимсе олмагъаныны корип, о, мысырлыны ольдюрди ве оны къум ичине сакълады.

¹³Экинджи куню чыкъып, Муса эки еудийнинъ котеклешкенлерини корьди ве ынджыткъан союна: — Не себептен сен достунъны урасынъ? — деди.

¹⁴О исе: — Сени бизге башлыкъ ве къады этип ким къойды? Мысырлыны ольдюргенинъ дайын, мени де ольдюрмеге истейсинъми? — деди. Муса къоркъты ве озь озюне: «Керчектен, бу ишим ачылды», — деди.

¹⁵Бу иш акъкъында фыравун эшитти ве Мусаны ольдюрмеге истеди. Амма Муса, фыравундан къачып, Мидьян топрагъына яшамакъ ичюн кетти. Анда келип, бир къую янында отурды.

¹⁶Мидьяндаки руханийнинъ еди къызы бар эди. Олар, шу къуюгъа келип, бабаларынынъ къой-эчкилерине сув бермек ичюн, сув чекип ашлавларны толдурдылар.

¹⁷Лякин чобанлар келип оларны четке къувдылар. О заман Муса турып, къызларны къуртарды, оларнынъ къой-эчкилерине сув берди.

¹⁸Къызлар озь бабалары Реуэлге келип, бабасы олардан: — Бугунь не ичюн о къадар тез кельдинъиз я? — деп сорады.

¹⁹— Бир мысырлы бизни чобанлардан къуртарды ве бизге сув биле чекип, къой-эчкилеримизге берди, — дедилер олар.

²⁰О исе къызларына: — Я къайда о? Не ичюн сиз оны къалдырдынъыз? Оны чагъырынъыз да, о бизнен пите ашасын, — деди.

²¹Муса бу адамда яшамагъа разы олды. Сонъ о адам озь къызы Циппораны Мусагъа акъайгъа берди.

²²Циппора Мусагъа огълан бала догъды. Муса: «Мен ябанджы ерде кельмешек олдым», — айтып, онынъ адыны Гершом [3] къойды.

²³Чокъ вакъыт кечти. Бу вакъыт ичинде Мысыр падишасы ольди. Исраиль огъуллары исе иштен инъильдей ве ярдым сорап, Аллагъа ялвара эдилер, ве агъыр ишлерден къыйналгъанлары ичюн ялварувлары Аллагъа котерильди.

²⁴Алла оларнынъ инъильтилерини эшитти ве Озюнинъ Ибраимге, Исхакъкъа ве Якъупкъа берген васиетини хатырлады.

²⁵Алла Исраиль огъулларына бакъты ве оларнынъ гъам-къасеветлерини бильди.