Read Мукъаддес Китап къырымтатар тилинде, Чыкъыш 21 Bible Online

Чыкъыш 21 - Мукъаддес Китап къырымтатар тилинде, bible

Чыкъыш 21

¹Исраиллилерге бойле къанунларны илян эт:

²Еудий къулны сатын алсанъыз эгер, сизде алты йыл чалышсын, единджи йылы исе бедава азатлыкъкъа чыкъсын.

³Янъгъыз кельген олса, янъгъыз да чыкъсын, эвли олса эгер, онен берабер апайы да чыкъып кетсин.

⁴Эгер апайыны онъа эфендиси берген олса, о да онъа огъланлар я да къызларны догъгъан олса, о заман апайынен балалары эфендисине къалып, о, янъгъыз чыкъсын.

⁵Эгер къул: «Эфендимни, апайымны ве балаларымны севем, азатлыкъкъа чыкъмайджагъым», — десе,

⁶шу вакъыт эфендиси оны Алланынъ огюне шаатлыгъына кетирип, оны къапу я да къапунынъ первазы янына къойып, къулагъыны бизнен тешсин. Сонъ о, эфендисине эбедиен къул оладжакъ.

⁷Эгер бирев къызыны къуллукъкъа сатса, къыз къуллукътан эр къул дайын чыкъып оламай.

⁸Эфендиси озюне джарие оларакъ сатын алгъан къызны бегенмесе, оны башкъасына сатын алмагъа изин-рухсет берсин. Амма, оны алдатып, ябанджы халкъкъа сатмагъа эфендисининъ акъкъы ёкъ.

⁹Эгер къызны джарие этип, огълуна бермеге истесе, оны къызы ерине корьсюн.

¹⁰Эгер эфендиси озюне даа бир апай алса, биринджи апайы ашсыз, урбасыз ве акъайсыз къалмасын.

¹¹Эфендиси бу учь шейни онъа япмаса эгер, къыз ондан бес-бедава чыкъып кетсин.

¹²Эгер бирев адамны урып ольдюрсе, озю де ольдюрильсин.

¹³Эгер бу, Алла: «Олсун», — деп изин берген къаза олгъан олса, къатильнинъ Мен косьтерген айры ерге къачып кетмеге чареси олур.

¹⁴Эгер бирев ниетленип, башкъа адамны хаинликнен ольдюрсе ве сонъ къурбан чалынгъан ернинъ янына къуртулыш къыдырып чапып кельсе, оны ольдюрмек ичюн андан биле чыкъарып алынъыз.

¹⁵Ким анасыны я да бабасыны урса, ольдюрильсин.

¹⁶Башкъа адамны хырсызлагъан адам, хырсызлангъанны къуллукъкъа сатса, я да сатып етиштирмесе, эписи бир, ольдюрильсин.

¹⁷Бабасыны я да анасыны къаргъагъан адам ольдюрильсин.

¹⁸Эки адам давалашкъанда, бири башкъасыны ташнен я да юмрукънен урса, урулгъан сою ольмейип, тёшекке ятып къалса,

¹⁹ве эгер о, турып таякъкъа таянып эвинден чыкъып олса, оны ургъан адам джезаланмасын. Амма урулгъан адамнынъ иши токътагъаны ичюн акъкъыны берсин ве онынъ яхшы олмакъ ичюн эткен масрафларыны къапласын.

²⁰Эгер бирев къулуны я да хызметчи апайыны таякънен урса, ве олар онынъ къолундан ольселер, о джезалансын.

²¹Эгер олар бир-эки кунь даа яшасалар, о, джезаланмасын, чюнки олар онынъ мулькюдир.

²²Адамлар талашкъанда юклю апайны урсалар, ве онынъ даа догъмагъан баласы тюшсе, лякин башкъа бир зиян олмаса, къабаатлы сою къадыларнынъ козю огюнде апайнынъ акъайы не къадар айтса, о къадар пей берсин.

²³Башкъа зиян олса эгер, джан ичюн джан бер,

²⁴козь ичюн козь, тиш ичюн тиш, къол ичюн къол, аякъ ичюн аякъ,

²⁵яныкъ ичюн яныкъ, яра ичюн яра, эзик ичюн эзик!

²⁶Эгер бирев къулунынъ я да къыз къулунынъ козюни урып чыкъарса, козь ичюн оны азатлыкъкъа йиберсин.

²⁷Эгер къулунынъ я да къадын къулунынъ тишини урып сындырса, оны тиш ичюн азатлыкъкъа йиберсин.

²⁸Эгер акъай я да апайны бугъа тюртип ольдюрсе, бугъаны ташнен урып ольдюринъиз, этини исе ашаманъыз. Огюзнинъ сабысы исе къабаатлы сайылмасын.

²⁹Лякин бугъа эвель де тюрткюч олса ве сабысына бунынъ акъкъында хабер этселер, амма о, бугъагъа мукъайт олмагъан олса, ве бугъасы акъай я да апайны тюртип ольдюрген олса, бугъа да ташнен урып ольдюрильсин, сабысы да ольдюрильсин.

³⁰Амма, эгер ольген адамнынъ сойлары бугъанынъ сабысына одеме тайинлеген олсалар, о, джаны ичюн тайинленген одемени оларгъа тёлесин.

³¹Эгер бугъа огъланчыкъ я да къызчыкъны тюртип ольдюрсе — сабысыны кене де бу къанун боюнджа джезаламакъ керек.

³²Эгер бугъа къулны я да къадын къулны тюртип ольдюрсе, бугъанынъ сабысы оларнынъ эфендисине 30 кумюш [14] тёлесин, бугъа исе ташнен урып ольдюрильсин.

³³Эгер бирев къуюнынъ агъзыны ачса, я да къуюны къазып, онынъ агъзыны къапатмаса, онынъ ичине де бугъа я да эшек тюшсе,

³⁴къуюнынъ сабысы айванларнынъ сабысына бугъанынъ фиятыны тёлесин, бутюн айванны исе озюне къалдырсын.

³⁵Эгер биревнинъ бугъасы къомшусынынъ бугъасыны тюртип ольдюрсе, сагъ къалгъан бугъаны сатсынлар да, тюшкен акъчаны экиге больсюнлер, ольдюрильгенни де экиге больсюнлер.

³⁶Огюзнинъ тюрткюч олгъаны эвель де белли олгъан олса, сабысы да буны билип онъа мукъайт олмагъан олса, о озю ольдюрильген бугъа ичюн бугъаны бермек керек, ольген бугъа исе онъа къалсын.