Read Мукъаддес Китап къырымтатар тилинде, Чыкъыш 23 Bible Online

Чыкъыш 23 - Мукъаддес Китап къырымтатар тилинде, bible

Чыкъыш 23

¹Ошек ташыманъыз. Ялан шаатлыкъ этип, джинаетчиге къол тутманъыз.

²Чокълукънынъ пешинден яманлыкъкъа къошулманъыз, махкемеде шаатлыкъ эткенде, чокълукъкъа къошулып, акъикъатны бозманъыз.

³Фукъаренинъ махкемесинде де ялынъыз фукъарелигини аджып, ялан айтманъыз.

⁴Душманынънынъ джоюлгъан бугъасыны я да эшегини тапсанъыз эгер, онъа кетиринъиз.

⁵Душманнынъ юк агъырлыгъындан йыкъылгъан эшегини корьсенъиз, душманнынъ янындан кечменъиз, эшегини котермеге онъа ярдым этинъиз.

⁶Башкъа адамларнынъ ишлери киби, фукъаренинъ ишини де адалетли чезинъиз.

⁷Ялан шаатлыкъны къабул этменъиз. Акълы ве къабаатсыз адамгъа олюм джезасыны тайинлеменъиз, чюнки Мен бу акъсызлыкъта къабаатлы олгъан адамны багъышламам.

⁸Къапарлар алманъыз, чюнки къапарлар корьген козьни кёр этип, акълыларнынъ ишлерини терс айландыралар.

⁹Кельмешекнинъ джаныны агъырттырманъыз, онъа залымлыкъ этменъиз. Сиз кельмешекнинъ алыны билесинъиз, чюнки Мысыр топрагъында озюнъиз кельмешеклер эдинъиз.

¹⁰Алты йыл тарлаларынъызда ашлыкъ сачып, берекетини джыйынъыз,

¹¹единджи йылы исе халкъынъыздан олгъан факъыр-фукъарелер кечинсин деп, олардан къалгъаныны да тарла айванлары ашап битирсинлер деп, топрагъынъда бир шей сачманъыз. Юзюм ве зейтюн багъларыны да ойле асранъыз.

¹²Алты кунь ишлеринъизни этинъиз, единджи куню исе раатлыкъ куню олсун. Огюзинъизнен эшегинъиз де раатлансынлар, къулунъызнынъ огълу ве кельмешек де нефес алсынлар.

¹³Мен сизге бутюн айткъан шейлеримни тутунъыз. Башкъа аллаларнынъ адларыны айтманъыз, агъызларынъыздан чыкъмасын олар.

¹⁴Йылда учь кере Меним Байрамларымны къайд этинъиз.

¹⁵Маясыз Пишкен Пите Байрамыны япынъыз. Мен санъа эмир эткеним киби, баарьнинъ ильк куньлеринде [15] еди кунь маясыз пишкен пите ашанъыз, чюнки Мысырдан сиз бу айда чыкъып кеткен эдинъиз. Меним огюме кимсе бош къолнен кельмесин.

¹⁶Тарлада сачкъан Биринджи Махсул Байрамыны япынъыз. Тарладан бутюн берекетинъни джыйгъан сонъ, берекет джыйылув куньлерининъ сонъунда, Махсул Джыйылув Байрамыны да япынъыз.

¹⁷Йылда учь кере эписи акъайларынъыз Эфендинъ олгъан РАББИнинъ юзю огюне кельсинлер.

¹⁸Меним къурбанымнынъ къаныны маялы отьмекнен берабер Манъа кетирменъиз. Меним байрам къурбанымдан да ягъ сабагъадже къалдырманъыз.

¹⁹Ернинъ биринджи берекетинден энъ яхшы махсулларыны Алланъ олгъан РАББИнинъ эвине кетиринъиз. Улакъны анасынынъ сютюнде пиширменъиз.

²⁰Мына сени ёлда къорчаласын ве Мен санъа азырлагъан ерге сени алып барсын деп, Мен сенинъ огюнъден Мелегимни ёллайым.

²¹Онынъ юзю огюнде озюнъизни низамлы тутунъыз ве Онынъ сёзюни динъленъиз. Онъа къаршы инатланманъыз, чюнки О, Онда Меним адым олгъаны ичюн, гуналарынъызны багъышламаз.

²²Эгер сиз Онынъ сёзюни динълеп, сизге бутюн айткъанларымны япсанъыз, Мен душманларынъызнынъ душманы олурым, сизге къаршы чыкъкъан адамларгъа да къаршы чыкъарым.

²³Сизинъ огюнъден Меним Мелегим кетип, сизни аморлыларгъа, хитлилерге, перизлилерге, ханаанлыларгъа, хивлилерге, ве евуслыларгъа алып кеткенде, Мен бу халкъларны ёкъ этерим.

²⁴Сиз исе оларнынъ аллаларына табынманъыз ве оларгъа хызмет этменъиз, ишлеринден де орьнек алманъыз. Оларны парлап-парчаланъыз, пут ташларыны да йыкъынъыз.

²⁵РАББИге, сизинъ Алланъызгъа хызмет этинъиз, ве Мен сизинъ отьмегинъизни ве сувунъызны багъышлап, хасталыкъларны сизден узакълаштырырым.

²⁶Сизинъ топрагъынъызда апайларынъызнынъ даа догъмагъан балалары тюшмезлер, къадынлар да баласыз олмаз, омюрлеринъиз де узакъ олур.

²⁷Мен ойле япарым ки, сизлер кельмезден эвель, адамлар Менден отьлерини патлатып шашмалайджакълар, душманларынъызны да сизден къачмагъа меджбур этерим.

²⁸Огюнъизден азманларны ёлларым, олар да юзюнъиз огюнден хивлилерни, ханаанлыларны ве хитлилерни къуварлар.

²⁹Амма топракъ бошамасын ве сизге кийик айванлар чокълашмасынлар деп, юзюнъиз огюнден оларны бир йыл ичинде къуваламам.

³⁰Сизлер бу топракъны толдурмакъ ичюн баягъы артып чокълашмагъанынъыздже, оларны сизден яваш-яваш къуварым.

³¹Сынъырларынъызны Къызыл денъизден башлап Акъ денъизинедже ве сахрадан башлап улу Фират дерьясынадже кечиририм, чюнки бу ернинъ сакинлерини сизге берерим, сиз де оларны юзюнъиз огюнден къуварсынъыз.

³²Не оларнен, не аллаларынен анълашма тизменъиз.

³³Манъа къаршы гунагъа сизни баттырмамакъ ичюн, топрагъынъызда олар яшамасынлар. Лякин олар сизнен берабер яшасалар эгер, озьлерининъ аллаларына хызмет этмек ичюн, сизлерни къапкъангъа тюшюрирлер.