Read Мукъаддес Китап къырымтатар тилинде, Чыкъыш 24 Bible Online

Чыкъыш 24 - Мукъаддес Китап къырымтатар тилинде, bible

Чыкъыш 24

¹Сонъ РАББИ Мусагъа бойле деди: — Харунны, Надавны, Авихуны ве Исраильнинъ етмиш акъсакъалларыны янынъа алып, РАББИге котериль. РАББИге узакътан ибадет этинъиз.

²РАББИнинъ янына Муса бир озю кельсин, олар исе якъын кельмесинлер, халкъ да онен котерильмесин.

³Муса келип, халкъкъа РАББИнинъ эписи сёзлерини ве эмирлерини айтып берди. Бутюн халкъ да бир сеснен: — РАББИнинъ сёзюни тутып, бутюн айткъанларыны япармыз, — деди.

⁴Муса РАББИнинъ эписи сёзлерини язып къойды. Сонъ саба танъда турып, байыр тюбюнде къурбан чалынгъан ерни япты ве Исраиль къабилелерининъ сайысына коре он эки таш къойды.

⁵Сонъ исраилли огъланларгъа, РАББИге бутюнлей якъылгъан къурбанларыны чалмагъа ве таналарны сойып аманлыкъ къурбанларыны чалмагъа эмир этти.

⁶Муса къаннынъ ярысыны савутларгъа джыйды, къалгъаныны къурбан чалынгъан ерге пускюртти.

⁷Сонъ Васиет китабыны алды ве эшиттирип халкъкъа окъуды. Халкъ исе: — РАББИнинъ сёзюни тутып, Онынъ бутюн айткъанларыны япармыз, — дедилер.

⁸Муса савутлардаки къанны алып халкъкъа пускюртти ве бойле деди: — Мына бутюн айтылгъан шейлер акъкъында РАББИ сизлерге эткен васиетнинъ къаны.

⁹Сонъ Муса, Харун, Надав, Авиху ве Исраильнинъ етмиш акъсакъалы байыргъа котерильдилер ве

¹⁰Исраильнинъ Алласыны корьдилер. Онынъ аякъларынынъ тюбюнде темиз кок якъуттан япылгъан, кок дайын тер-темиз олгъан мейданчыкъкъа ошагъан бир шей бар эди.

¹¹Исраилли башлыкълар Алланы корьген олсалар да, Алла оларгъа бир зарар кетирмеди. Башлыкълар анда ашап-ичтилер.

¹²РАББИ Мусагъа бойле деди: — Меним огюме байыргъа чыкъ да, мында ол. Исраиллилерни огретмек ичюн, Мен Къанун ве эмирлерни яздым. Оларны Мен санъа къаядан кесильген ташларнен берабер берерим.

¹³Муса ярдымджысы Ехошуанен барып, Алланынъ байырына котерилип башлады.

¹⁴Акъсакъалларгъа исе бойле деди: — Биз къайтмагъандже, мында къалып турунъыз. Мына сизлернен Харун ве Хур къалалар. Кимде насыл дава олса, оларгъа барсын.

¹⁵Муса байыргъа чыкъкъан сонъ, байырнынъ устюни булут сарды.

¹⁶Алланынъ Шурети Синай дагъына энди, ве онынъ устюни алты кунь булут къаплай эди, единджи куню исе РАББИ булутнынъ ичинден Мусаны чагъырды.

¹⁷Байыр тёпесинде олгъан Алланынъ Шурети исраиллилерге алевленип янгъан атеш киби корюне эди.

¹⁸Муса, булутнынъ ортасына кирип, байыргъа чыкъты. Байыр устюнде Муса къыркъ кунь ве къыркъ гедже къалды.