Read Мукъаддес Китап къырымтатар тилинде, Чыкъыш 25 Bible Online

Чыкъыш 25 - Мукъаддес Китап къырымтатар тилинде, bible

Чыкъыш 25

¹РАББИ Мусагъа даа бойле деди:

²— Исраиль огъулларына айт ки, олар Манъа бахшышлар кетирсинлер. Эр джаны истеген адамдан Манъа бахшышлар алынъыз.

³Олардан сиз аладжакъ бахшышлар булардыр: алтын, кумюш, тунч,

⁴мор, мавылы къырмызы ве ачыкъ къырмызы юнь, индже ишленген кетен ве эчки юнюнден япылгъан безлер;

⁵къойларынынъ дибагъ этилип къырмызы ренкке боялангъан ве индже ишленген терилерини, акация тереклерини;

⁶къандиль ичюн зейтюн ягъы, чешит тюрлю шейлерни ягъламакъ ичюн зейтюн ягъгъа къошулгъан гузель къокъулы шейлер ве якъмакъ ичюн къокъулы отлар.

⁷Эфод [16] ве кокрек торбасы ичюн шохам деген къыйметли ташлар ве дигер, козьлерге къоюлгъан къыйметли ташлар.

⁸Исраиллилер Манъа Азиз Ерни къурсунлар, ве Мен оларнынъ араларында яшарым.

⁹Эписини Мен санъа шимди косьтереджек планларыма коре этинъиз. Мескенни ве онынъ эписи алетлерини япынъыз.

¹⁰Акация терегинден Сандыкъ яп. Онынъ узунлыгъы 1,13 метр олсун, кенълигинен юксеклиги 0,68 метр [17] олсун.

¹¹Ичини ве тышыны темиз алтыннен къапла, чевре-четинде тёпеден орьнекли чембер яса.

¹²Алтынны иритип дёрт алтын алкъа яп да, оларны ашагъыдаки дёрт кошесине туттур: эки алкъа бир тарафындан олсун, эки алкъа да экинджи тарафындан олсун.

¹³Акация терегинден сырыкълар яса, оларны да темиз алтыннен къапла.

¹⁴Сырыкъларны, оларнынъ ярдымынен Сандыкъны ташымакъ ичюн, онынъ четлеринден, алкъалардан кечир.

¹⁵Сырыкълар Сандыкънынъ алкъаларында даима кечирильген олсунлар, оларны андан алмагъа олмай.

¹⁶Сандыкънынъ ичине Мен санъа береджек Шаатлыкъны къой.

¹⁷Сандыкънынъ къапагъыны — Мерамет Ерини — темиз алтындан яса: узунлыгъы 1,13 метр, кенълиги исе 0,68 метр олсун.

¹⁸Мерамет Еринен эки Керувлар [18] бир кесек алтындан япылып, Керувларны дёгюльген шекильде Мерамет Ерининъ эки четинден яса.

¹⁹Бир Керувны бир четинден, экинджи Керувны экинджи четинден яса. Оларны ойле яп ки, къапакънынъ эки четинден тюртип чыкъсынлар.

²⁰Керувларнынъ къанатлары Мерамет Ерининъ тёпесини къаплап, юкъары котерильген олсунлар. Бетлеринен бири-бирине къаршы турып, Керувлар Мерамет Ерине тараф бакъсынлар.

²¹Къапакъны — Мерамет Ерини — Сандыкънынъ устюне къой. Сандыкънынъ ичине исе Мен санъа береджек Шаатлыкъны къой.

²²Анда Мен сеннен корюшеджегим ве Шаатлыкъ Сандыгъынынъ устюнде олгъан эки Керувнынъ арасындан, Мерамет Ерининъ устюнден, санъа исраиллилер ичюн эписи эмирлеримни санъа айтаджагъым.

²³Акация терегинден стол яса. Онынъ узунлыгъы 0,9 метр, кенълиги 0,45 метр, юксеклиги де 0,68 метр [19] олсун.

²⁴Оны темиз алтыннен къапла, чевре-четинде де орьнекли алтын чембер яса.

²⁵Чевре-четинде 10 сантиметр кенълигинде рейка яп, рейканынъ чевре-четине исе алтын чембер яса.

²⁶Стол ичюн дёрт алтын алкъа ясап, оларны дёрт кошесинден, дёрт аягъында пекит.

²⁷Алкъалар, рейканынъ янында олып, тышарыгъа бакъмакъ кереклер: столны ташымакъ ичюн оларгъа сырыкълар кечириледжек.

²⁸Сырыкъларны акация терегинден ясап, темиз алтыннен къапла. Оларнынъ ярдымынен столны ташырлар.

²⁹Стол ичюн темиз алтындан, ичерлик бахшышларыны кетирмек ичюн, чанакълар ве пиалалар, гугюмлер ве мешребелерни яп.

³⁰Столнынъ устюне, Меним козюм огюне даима Меним булунувымны косьтерген пителерни къой.

³¹Темиз алтындан къандиль яп. Бу къандиль бир кесек маденден дёгюлип япылмакъ керек. Темели ве сапы, лампадлар къоймакъ ичюн чаначыкълары, гоньджелери ве чичеклери алтыннынъ бир бутюн кесегинден япылсынлар.

³²Сапынынъ четлеринден алты пытакъ чыкъсын: учь данеси къандильнинъ бир тарафындан, учь данеси де экинджи тарафындан.

³³Бадем чичегине ошагъан учь чаначыкъ, гоньджелери ве чичеклеринен берабер бир пытакъта олсун, бадем чичегине ошагъан учь чаначыкъ да, гоньджелери ве чичеклеринен экинджи пытакъта олсун. Къандильден чыкъкъан эписи пытакъларда айны ойле олсун.

³⁴Къандильнинъ сапында исе бадем чичегине ошагъан дёрт, гоньджелери ве чичеклеринен олгъан чаначыкъ олмакъ керек.

³⁵Олар къандильнинъ алты пытагъы чыкъкъан ерлеринде олсунлар. Эки пытакъ чыкъкъан еринде бир гоньдже, даа эки пытакъ чыкъкъан еринде экинджи гоньдже, даа эки пытакъ чыкъкъан еринде де учюнджи гоньдже.

³⁶Эм гоньджелер, эм пытакълары къандильнинъ сапындан чыкъмакъ кереклер. О, бир бутюн кесектен олып, темиз алтындан япылсын.

³⁷Онъа еди лампад ясап, лампадларнынъ огдеки тарафыны ярыкълатсынлар деп, оларны къандиль устюне къой.

³⁸Лампадлар ичюн машачыкъларны ве табачыкъларны темиз алтындан яса.

³⁹Къандильни, бутюн бу алетлеринен, 35 кило [20] темиз алтындан япсынлар.

⁴⁰Бакъ, Мен санъа байырда насыл корьсеткен олсам, эписи алетлерини тыпкъы ойле де яп.