Read Мукъаддес Китап къырымтатар тилинде, Чыкъыш 26 Bible Online

Чыкъыш 26 - Мукъаддес Китап къырымтатар тилинде, bible

Чыкъыш 26

¹Мескенни он дане индже ишленген кетенден ве мавылы къырмызы ве ачыкъ къырмызы юньден япылгъан безлерден яса. Оларнынъ устьлерине усталыкънен Керувларны нагъышла.

²Эр безнинъ узунлыгъы 12,6 метр олсун, кенълиги — 1,8 метр. Эписи безлер бир ольчюде олсун.

³Беш безни бири-бирине тиктир, къалгъан беш безни де бири-бирине тиктир.

⁴Бири-бирине тикильген биринджи безлернинъ бир четинден мор безден ильмеклер яса, экинджи бири-бирине тикильген безлернинъ бир четинден де ойле яп.

⁵Биринджи тикильген безлерге 50 ильмек яса, экинджи бири-бирине тикильген безлернинъ четине де 50 ильмек яса. Ильмеклер бири-бирине къаршы олмакъ кереклер.

⁶50 дёгмени алтындан япып дёгмелернен безлерни бири-бирине дёгмеле де, бир бутюнлик олур.

⁷Мескеннинъ устюни къапатмакъ ичюн, эчки юнюнден безлер яп. Безлер он бир дане олсун.

⁸Бир безнинъ узунлыгъы 13,5 метр олсун, кенълиги 1,8 метр — бу бир без. Эписи он бир безнинъ ольчюси бир олсун.

⁹Беш безни бири-биринен айры тиктир, къалгъан алты безни де бири-бирине айры тиктир. Алтынджы безни экиге къатла, о, Мескеннинъ огюни къапатсын.

¹⁰Безнинъ бир парчасыны башкъасынен багъламакъ ичюн, экисининъ четлеринде 50-шер ильмек яп.

¹¹50 дане тунч дёгме япып, оларны ильмеклерге кечир де, экиси бир бутюнлик олсун деп, безлернинъ эки парчасыны дёгмеле.

¹²Мескеннинъ арттаки диварындан асылгъан безнинъ бир къысмындан, четтеки безнинъ ярысы ерде ятсын.

¹³Эчки юнюнден япылгъан без, ондан ашагъы олгъан индже ишленген кетенден япылгъан безден, Мескенни бутюнлей къапатмакъ ичюн, 0,45-ер метр асылгъан олсун.

¹⁴Тёпесинден даа эки орьтю яп — бири къойнынъ дибагъ этилип къырмызы ренкке боялангъан терисинден, экинджи исе индже ишленген терилерден.

¹⁵Мескен ичюн акация терегинден черчиве яса, олар догъру турсунлар.

¹⁶Оларнынъ узунлыгъы 4,5 метр, кенълиги — 0,68 метр олсун.

¹⁷Эр бир черчивенинъ ашагъы къысмында эки багълама яп. Мескеннинъ эписи черчивелеринде ойле яп.

¹⁸Мескеннинъ дженюбий тарафы ичюн 20 черчиве,

¹⁹бу 20 черчиве тюбюне кумюштен япылгъан 40 темель яса: бир черчиве тюбюне эки темель, черчивенинъ эки багъламасы тюбюне бирер дане олсун.

²⁰Мескеннинъ шималь тарафы ичюн де 20 черчиве яса.

²¹Оларнынъ тюбюне де кумюштен япылгъан 40 темель яса: бир черчиве тюбюне эки темель, черчивенинъ эки багъламасы тюбюне бирер дане олсун.

²²Мескеннинъ арттаки дивары ичюн, гъарп тарафындан алты черчиве яса.

²³Арттаки тарафынынъ кошелери ичюн даа эки черчиве яса.

²⁴Черчивелер эки къатлы олмакъ керек. Оларнынъ тюплери бири-бирине багълансын, тёпелери де бир алкъагъа багълансын, экиси ичюн де ойле олсун. Олар эки кошеде турсунлар.

²⁵Бойлеликнен, секиз черчиве олур, оларнынъ тюплерине де кумюштен япылгъан он алты темель яса: бир черчиве тюбюне эки темель олсун.

²⁶Акация терегинден сырыкълар яса. Мескеннинъ бир тарафындаки черчивелери ичюн — беш сырыкъ,

²⁷экинджи тарафындаки черчивелери ичюн — беш сырыкъ яса ве гъарпкъа бакъкъан арттаки тараф ичюн де — беш сырыкъ яса.

²⁸Ичеридеки сырыкъ, черчивелерининъ орталарындан башындан сонъунадже кечеджек.

²⁹Черчивелерини алтыннен къапла. Сырыкъларны кечирмек ичюн алкъаларны алтындан яп. Сырыкъларны алтыннен къапла.

³⁰Мескенни санъа байырда косьтерильгени киби къой.

³¹Мор, мавылы къырмызы, ачыкъ къырмызы юньден ве индже ишленген кетенден перде яп, онынъ устюне Керувларны усталыкънен нагъышла.

³²О пердени, акация терегинден ясалгъан, алтыннен къаплангъан, устьлеринде алтын ченгеллери олгъан ве кумюштен ясалгъан дёрт темель устюне тургъан дёрт дирек устюне ас.

³³Пердени ченгеллерге ас, ве анда, онынъ артына, Шаатлыкъ Сандыкъны кирсет. Перде Мукъаддес Ерни Энъ Мукъаддес Ерден айырыр.

³⁴Энъ Мукъаддес Ерде тургъан Шаатлыкъ Сандыгъынынъ устюне Мерамет Ери олгъан къапакъны къой.

³⁵Перденинъ огюнде столны ве столнынъ къаршысына къандильни къой. Къандильни Мескеннинъ дженюп тарафында, столны исе шаркъий тарафында къой.

³⁶Мескеннинъ къапусы ичюн, мор, мавылы къырмызы, ачыкъ къырмызы юньден ве индже ишленген кетенден нагъышлангъан перде яп.

³⁷Перде ичюн алтын ченгеллерни ве акация терегинден беш дирек яса. Диреклерни алтыннен къапла ве оларнынъ тюбюне беш тунч темель яп.