Read Мукъаддес Китап къырымтатар тилинде, Чыкъыш 27 Bible Online

Чыкъыш 27 - Мукъаддес Китап къырымтатар тилинде, bible

Чыкъыш 27

¹Акация терегинден дёрткоше къурбан чалынгъан ерни яп. Узунлыгъынен кенълиги 2,25 метр олсун, юксеклиги де 1,35 метр олсун.

²Къурбан чалынгъан ернен бойнузларны бир бутюн агъач кесегинден япып, бойнузлары дёрт кошесинден тюртип чыкъсын. Бутюн ерни тунчнен къапла.

³Къурбан чалынгъан ер ичюн куль къопкъалары, куречиклер, чанакълар, сенеклер ве комюр табакъларыны яп — эписи алетлерни тунчтан яса.

⁴Онъа тунчтан чильтернинъ бир чешити олгъан пармакълыкъ яп. Дёрт кошесинде дёрт тунч алкъа яса.

⁵Чильтерни къурбан чалынгъан ернинъ ашагъы кенарындан ойле къой ки, ортасына къадар етсин.

⁶Къурбан чалынгъан ер ичюн акация терегинден сырыкълар яса да, оларны тунчнен къапла.

⁷Къурбан чалынгъан ерни ташыгъанда, сырыкъларны онынъ эки четинден алкъаларгъа кечир.

⁸Къурбан чалынгъан ерни тахтадан яп, ичи къувуш олсун. Байырда санъа косьтерильгени киби, оны ойле де яп.

⁹Сонъ Мескеннинъ азбарыны яса. Азбарнынъ дженюп тарафы ичюн индже ишленген кетенден безлер яп. Узунлыгъы азбар бою 45 метр олсун.

¹⁰Безлерни асмакъ ичюн, 20 дирек яса, диреклер тюбюне 20 тунч темель яп. Диреклердеки ченгеллернен багъламалар кумюштен олсун.

¹¹Шималь тарафындан айны ойле олсун — узунлыгъы 45 метр олгъан безлер. Безлерни асмакъ ичюн, 20 дирек яса, диреклер тюбюне 20 тунч темель яп. Диреклердеки ченгеллернен багъламалар кумюштен олсун.

¹²Азбарнынъ гъарбий тарафындан олгъан кенълигине исе безлернинъ узунлыгъы 22,5 метр олсун. Безлер ичюн он дирек олсун, бу диреклернинъ тюбюнде де он темель ясалсын.

¹³Азбарнынъ огюнден, шаркъий тарафындан олгъан кенълигине безлернинъ узунлыгъы 22,5 метр олсун.

¹⁴Киришнинъ бир тарафы ичюн безлернинъ кенълиги 6,75 метр олып, олар ичюн учь темели олгъан учь дирек олсун.

¹⁵Экинджи тарафына да безлернинъ кенълиги 6,75 метр олып, олар ичюн учь темели олгъан учь дирек олсун.

¹⁶Азбарнынъ къапусына исе безнинъ кенълиги 9 метр олсун. О, мор, мавылы къырмызы, ачыкъ къырмызы юньден ве индже ишленген ве нагъышлангъан кетенден олсун. Безни асмакъ ичюн дёрт темели олгъан дёрт дирек олсун.

¹⁷Азбарнынъ чевре-четинде олгъан диреклердеки багъламаларнен ченгеллери кумюштен, темеллери исе тунчтан олсун.

¹⁸Азбарнынъ узунлыгъы — 45 метр, кенълиги — 22,5 метр олсун. Азбарнынъ четлеринден индже ишленген кетенден япылгъан, тунч темеллердеки диреклерде асылгъан, юксеклиги 2,25 метр олгъан безлер олсун.

¹⁹Къулланмакъ ичюн япылгъан Мескендеки эписи алетлер, оны туткъан эписи къазычыкълар, азбарнынъ безлерини туткъан къазычыкълар да тунчтан олсун.

²⁰Исраиль огъулларына эмир эт ки, олар санъа орталыкъны ярыкълатмакъ ичюн къандиль даима якъылып турсун деп, келиде басылгъан темиз зейтюн ягъыны кетирсинлер.

²¹Корюшюв Чадырында, Шаатлыкъ Сандыгъыны сакълагъан перденинъ огюнде, Харуннен огъуллары РАББИнинъ огюнде къандильни акъшамдан сабагъадже якъаджакълар. Бу исраиллилерге ве оларнынъ эвлятларына эбедий низамнамедир.