Read Мукъаддес Китап къырымтатар тилинде, Чыкъыш 29 Bible Online

Чыкъыш 29 - Мукъаддес Китап къырымтатар тилинде, bible

Чыкъыш 29

¹Олар Меним руханийлерим олсунлар деп, сен оларны мына бойле айырып азиз этмек керексинъ: бир яш бузавны ве эки къусурсыз къочкъарны сайлап ал,

²маясыз пишкен пителер, ягънен басылгъан маясыз пителер, пишкен сонъ устьлерине ягъ сюртюльген маясыз пителерни ал. Оларны энъ яхшы богъдай унундан пишир.

³Оларны бир сепетке къойып, сепети такъым кетир ве тананен эки къочкъарны кетир.

⁴Харуннен огъулларыны Корюшюв Чадырынынъ къапусы огюне кетирип, оларны ювундыр.

⁵Хусусий урбаларны алып, Харуннынъ устюне халатны, усть урбаны, эфодны, кокрек торбасыны кийдирип, белини эфоднынъ къушагъынен багъла.

⁶Башына чалманы кийдир, чалманынъ устюне де «РАББИге Айырылып Азиз Этильген» язысы олгъан Азизлик таджыны пекит.

⁷Бир шей сюртмек ичюн ягъны ал да, онынъ башына тёкип, оны ягъла.

⁸Огъулларыны да кетирип, устьлерине халатларны кийдир,

⁹башларына сарыкъ багъла. Харун ве огъулларынынъ беллерине де къушакълар багъла. Эбедий низамнаме боюнджа руханийлик оларнынъ оладжакътыр. Бойле эттирип, Харуннен огъулларыны руханийликке айырып азиз эт.

¹⁰Корюшюв Чадыры янына тананы кетирип, Харуннен огъуллары онынъ башына къолларыны къойсунлар.

¹¹РАББИнинъ огюнде, Корюшюв Чадыры янында тананы сой.

¹²Пармагъынъны тананынъ къанына батырып, къурбан чалынгъан ернинъ бойнузына сюрт. Къалгъан къанны исе къурбан чалынгъан ернинъ тюбюне тёк.

¹³Ич алетлерининъ бутюн ягъыны ве къара джигернинъ энъ яхшы къысмыны, эки буйрегини ягъларынен берабер ал да, къурбан чалынгъан еринде якъ, тютюни Манъа котерильсин.

¹⁴Тананынъ этини, терисини ве ич алетлеринен ичеклерини алып, ордудан тыш олгъан ерде якъ. Бу — гуна ичюн къурбан.

¹⁵Бир къочкъарны ал да, Харуннен огъуллары онынъ башына къолларыны къойсунлар.

¹⁶Къочкъарны сой ве къанындан алып къурбан чалынгъан ернинъ эписи тарафларына пускюрт.

¹⁷Сонъ къочкъарны парчалап, ич алетлеринен тизлерини юв да, оларны парчалангъан къысымларына ве башына къой.

¹⁸Къочкъарны бутюнлей къурбан чалынгъан ер устюнде якъ, тютюни Манъа котерильсин. РАББИ ичюн бутюнлей якъылгъан бу къурбан — тынчландыргъан, мунис къокъу джайраткъан, РАББИге атеште якъылгъан къурбандыр.

¹⁹Экинджи къочкъарны да ал, Харуннен огъуллары онынъ башына къолларыны къойсунлар.

²⁰Къочкъарны сойып, къанындан ал да, Харуннынъ ве огъулларынынъ онъ къулагъынынъ мемелерине, онъ къолларынынъ баш пармакъларына ве онъ аякъларынынъ баш пармакъларына сюрт. Къалгъан къанны къурбан чалынгъан ернинъ чевре-четке пускюрт.

²¹Сонъ къурбан чалынгъан ернинъ устюндеки къаннен берабер бир шей ягъламакъ ичюн ягъны ал да, оны Харуннынъ устюне ве онынъ урбаларына, огъулларынынъ устюне ве оларнынъ урбаларына пускюрт. Бойле эттирип, сен Харунны ве онынъ урбаларыны, онен берабер огъулларыны ве оларнынъ урбаларыны айырып азиз этерсинъ.

²²Къочкъарнынъ ягъыны, къуйрукъ ягъыны, ич ягъыны, къара джигернинъ энъ яхшы къысмыны, эки буйрегини ягъларынен берабер ве онъ янбашыны ал. Бу — руханийлерни айырып азиз этмек ичюн къочкъардыр.

²³Бир маясыз пишкен питени, ягънен басылгъан маясыз питени, пишкен сонъ устюне ягъ сюртюльген маясыз питени де РАББИнинъ огюнде олгъан сепеттен ал.

²⁴Буларны эписини Харуннен огъулларынынъ къолларына бер. Олар исе буларны, РАББИге хусусий бахшыш багъышлагъанда, РАББИнинъ огюнде котерсинлер.

²⁵Сонъ буларны эписини оларнынъ къолларындан ал да, къурбан чалынгъан ернинъ устюнде, бутюнлей якъылып чалынгъан къурбанынен берабер, РАББИнинъ огюнде хош къокъулар джайрасын деп, якъ. Бу — РАББИге атеште якъылгъан къурбан.

²⁶Харунны айырып азиз этмек ичюн, къочкъарнынъ кокрек кемигиндеки этни алып, оны РАББИге багъышлагъанда, РАББИнинъ огюнде котер. Бу сенинъ пайынъ олур.

²⁷Харун ве огъуллары ичюн къочкъарнынъ эки къысмыны: котерильген кокрек кемигиндеки этни ве онъ янбашыны айырып азиз эт.

²⁸Келеджекте, исраиллилер РАББИге къочкъарны къурбан чалып, аманлыкъ къурбанларыны я да котерильген бахшышларыны бергенде, кокрекнен онъ янбашы даима Харуннынъ ве огъулларынынъ пайы олсун.

²⁹Харун ичюн тикильген азиз урбалар онынъ эвлятларына кечеджек. О, оларны бу урбаларда ягълап оларгъа руханийликни береджек.

³⁰Корюшюв Чадырына кирип, Мукъаддес Ерде РАББИге ибадет этмек ичюн, Харуннынъ огъулларындан олгъан янъы баш руханий еди кунь девамында бу урбаларны кийсин.

³¹Руханийлерни айырып азиз этмек ичюн къочкъарны алып, этини Азиз Ерде пишир.

³²Харуннен огъуллары бу къочкъарнынъ этини ве сепеттеки пителерни Корюшюв Чадырынынъ къапусы янында ашасынлар.

³³Оларгъа руханийликни бермек ве оларны айырып азиз этмек ичюн кетирген багъышлав бахшышларыны ве къурбанларыны тек олар ашамакъ мумкюн. Башкъа кимсенинъ буларны ашамагъа акъкъы ёкъ, чюнки о — азизлик.

³⁴Къочкъарнынъ этинден ве пителерден сабагъадже бир шей къалса, къалгъаныны атеште якъ: оны ашамагъа олмай, чюнки о — азизлик.

³⁵Харуннен ве огъулларынен эписини тамам Мен санъа эмир эткеним дайын яп. Еди кунь девамында оларны руханий эт.

³⁶Эр кунь бир тана сойып, гуналардан арынмакъ ичюн къурбан чал. Къурбан чалынгъан ерни темизлемек ичюн, гуналардан арындырткъан багъышлав къурбаныны чал. Сонъ оны ягълап айырып азиз эт.

³⁷Еди кунь девамында къурбан чалынгъан ерни бойле темизле ве айырып азиз эт. Сонъ къурбан чалынгъан ер пек улу азизлик олур. Онъа тийген эр шей азиз олур.

³⁸Къурбан чалынгъан ерде сенинъ чаладжакъ къурбанларынъ будыр: даима, эр кунь эки баш бир яшлы къусурсыз олгъан къойларны,

³⁹бир къойны сабадан, экинджисини — акъшам.

⁴⁰Бир къойнен берабер бир кило богъдай унунен къарыштырылгъан бир литр зейтюн ягъыны багъышла, ичерлик бахшышы ичюн бир литр [23] шарап.

⁴¹Экинджи къойны акъшам къурбан чал, оны да сабадакине ошагъан унлу бахшышынен ве айны ойле ичерлик бахшышынен берабер кетир. Бу — РАББИ ичюн тынчландыргъан, мунис къокъудыр. Онъа атеште якъылгъан къурбан.

⁴²Эр бир кунь несильден несильге бутюнлей якъылгъан къурбанны бойле чалынъыз. Оны РАББИнинъ Огюнде, Корюшюв Чадырынынъ къапусы огюнде чалынъыз. Анда Мен сизлернен корюшип лаф этерим.

⁴³Анда Мен исраиллилернен корюширим. Меним Шуретим бу ерни мукъаддес этер.

⁴⁴Мен Корюшюв Чадырыны ве къурбан чалынгъан ерни айырып азиз этерим. Харуннен огъулларыны да, олар Манъа руханийлик этсинлер деп, айырып азиз этерим.

⁴⁵Шу вакъыт Мен исраиллилернинъ арасында яшарым ве оларнынъ Алласы олурым.

⁴⁶Сонъ исраиллилер, Мен — РАББИ, оларнынъ Алласы олгъанымны билирлер. Араларында яшамакъ ичюн, Мен оларны Мысыр топрагъындан чыкъардым. Мен — РАББИ, исраиллилернинъ Алласы.