Read Мукъаддес Китап къырымтатар тилинде, Чыкъыш 30 Bible Online

Чыкъыш 30 - Мукъаддес Китап къырымтатар тилинде, bible

Чыкъыш 30

¹Акация терегинден къокъулы отларны якъмакъ ичюн ерни яп.

²Узунлыгъынен кенълиги 0,45 метр олсун. О, дёрткоше олмакъ керек. Юксеклиги 0,9 метр олсун. Ондан бойнузлар тюртип чыкъмакъ керек.

³Онынъ тёпесини, четлерининъ чевре-четини ве бойнузларыны темиз алтыннен къапла. Устюне чевре-четине алтын чембер яп.

⁴Алтындан эки алкъа япып, оларны чембернинъ тюбюнде эки четинден пекит. Отларны якъмакъ ерини ташымакъ ичюн алкъалардан сырыкъларны кечир.

⁵Сырыкъларны акация терегинден япып алтыннен къапла.

⁶Отларны якъмакъ ичюн ерини Шаатлыкъ Сандыгъыны къапаткъан перденинъ огюне къой. О, Шаатлыкъ Сандыгъынынъ къапусына — Мерамет Ерине къаршы турсун. Анда Мен сеннен корюширим.

⁷Эр саба лампадларны азырлагъанда, Харун онынъ устюнде къокъулы отларны якъсын.

⁸Акъшам да, лампадларны якъкъанда, оларны якъсын. Къокъулы отлар РАББИнинъ огюнде несильден несильге якъылсынлар.

⁹Бу ернинъ устюнде башкъа отларны якъманъыз, эм де чалынгъан къурбанны бутюнлей якъманъыз, пите ве ичерлик бахшышларыны кетирменъиз.

¹⁰Йылда бир кере Харун гуна багъышлав къурбанны чалып, къанны отларны якъмакъ ерининъ бойнузларына сюртип, оны айырып азиз этсин. Бу — несильден несильге эр йыл оладжакъ арынувдыр. Бу ер — РАББИнинъ улу азизлигидир.

¹¹Сонъ РАББИ Мусагъа даа бойле деди:

¹²— Исраиллилерни сайгъанынъда, эр бири джаны ичюн РАББИге одеме тёлесин. Сонъ оларны сайгъанда, араларында веба олмаз.

¹³Эр сайылгъан адам ярым кумюш [24] бермек керек. (Кумюш исе 20 гера эди.) Бу акъча — РАББИге бахшыштыр.

¹⁴Йигирми яшындан ве ондан буюк олгъан эр сайылгъанлар РАББИге бу акъчаны бермек керектир.

¹⁵Джанларыны сатын алмакъ ичюн РАББИге бахшыш бергенде, бай адам бу акъчадан арткъач бермесин, фукъаре исе ондан эксик бермесин.

¹⁶Исраиллилерден алгъан одеме кумюшини Корюшюв Чадыры ичюн къуллан. Джанлары ичюн акъча берип, исраиллилер бу одемени РАББИнинъ огюнде хатырласынлар.

¹⁷Даа РАББИ Мусагъа бойле деди:

¹⁸— Абдест алмакъ ичюн тунч савут яп, онъа саджаякъны да тунчтан яса. Оны Корюшюв Чадырынен къурбан чалынгъан ернинъ арасына къойып, ичини сувгъа толдур.

¹⁹Харуннен огъуллары ондан сув алып къолларынен аякъларыны ювсунлар.

²⁰Олар Корюшюв Чадырына кирмезден эвель, я да РАББИге къурбан якъмакъ ичюн, къурбан чалынгъан ерге ибадет этмек ичюн якъынлашкъанда, ольмемек ичюн, абдест алсынлар.

²¹Ольмемек ичюн къолларынен аякъларыны сувнен ювсунлар. Бу олар ичюн, Харунгъа ве онынъ эвлятларына, несильден несильге эбедий низамнаме олсун.

²²Сонъ РАББИ Мусагъа даа бойле деди:

²³— Энъ яхшы гузель къокъулы шейлерден: суву сербест акъкъан мюрден алты кило, гузель къокъулы корицадан онынъ ярысы къадар олсун, я да учь кило, гузель къокъулы къамыштан да учь кило,

²⁴киддадан учь кило, зейтюн ягъындан дёрт литр [25] къадар ал.

²⁵Олардан ягъламакъ ичюн мукъаддес ягъны яса — усталыкънен азырлангъан гузель къокъулы мельэм теркип эт. Бу, ягъламакъ ичюн мукъаддес ягъ олур.

²⁶Онен Корюшюв Чадырыны, Шаатлыкъ Сандыгъыны,

²⁷столны ве онынъ эписи алетлерини, къандильни ве онынъ эписи алетлерини, мукъаддес къокъулы отларны якъмакъ ичюн ерни,

²⁸айванларны бутюнлей якъмакъ ичюн къурбан ерини ве онынъ эписи алетлерини, савутны ве онынъ саджаягъыны ягъла.

²⁹Оларны айырып азиз эт де, улу азизлик олур: оларгъа тийген эр шей мукъаддес олур.

³⁰Харуннен берабер огъулларыны ягълап, олар Меним руханийлерим олсунлар деп, оларны айырып азиз эт.

³¹Исраиллилерге исе бойле деп айт: «Бу, несильден несильге ягъламакъ ичюн мукъаддес ягъ олур.

³²Башкъа адамларнынъ тенлерини онен ягъламагъа олмай, озьлеринъизге де теркибинен онъа ошагъан бир шей япманъыз. О — азизлик: сизлер ичюн азизлик олмакъ керек о!

³³Ким онъа ошагъан къокъулы ягъ азырласа я да онен башкъа адамны ягъласа, халкъындан ёкъ этилир».

³⁴РАББИ Мусагъа даа бойле деди: — Озюнъе мис къокъулы шейлерден ал: натаф сакъызыны, шехелетни, гузель къокъулы галбанны, темиз къара майны [26], эписи бир ольчюде олсун.

³⁵Олардан усталыкънен ягъламакъ ичюн теркипни яса. О, тузлу, темиз ве мукъаддес олсун.

³⁶Оны уфакъ этип тюйип, Мен санъа ачылгъан Корюшюв Чадырындаки Шаатлыкъ огюне къой: бу сиз ичюн энъ мукъаддес шей олур.

³⁷Бу теркиптеки ягъны озьлеринъизге япманъыз. Бу — РАББИ ичюн айырылгъан энъ мукъаддес шей.

³⁸Ким тютетмек ичюн онъа ошагъан бир шей япса, онынъ джаны халкъ арасындан ёкъ этилир.