Read Мукъаддес Китап къырымтатар тилинде, Чыкъыш 33 Bible Online

Чыкъыш 33 - Мукъаддес Китап къырымтатар тилинде, bible

Чыкъыш 33

¹Сонъ РАББИ Мусагъа бойле деди: — Мысыр топрагъындан чыкъаргъан халкъынънен берабер мындан чыкъып кет ве «оны эвлятларынъа берерим» деп Ибраимге, Исхакъкъа ве Якъупкъа Мен емин эткен топракъкъа ёл ал.

²Мен сенинъ огюнъден Мелегимни ёлларым ве ханаанлыларны, аморлыларны, хитлилерни, перизлилерни, хивлилерни ве евуслыларны къуварым.

³Бол-берекетли топракъкъа бар. Мен Озюм исе, ёл бою сизлерни ольдюрмемек ичюн, сизлернен бармайджагъым, чюнки сиз инат бир халкъсынъыз.

⁴Халкъ бу къоркъунчлы сёзлерни эшитип, окюр-окюр агълап башлады, ве кимсе устюне ильван такъмады,

⁵чюнки РАББИ Мусагъа бойле деп айткъан эди: — Исраиллилерге бойле деп айт: «Сиз инат бир халкъсынъыз. Мен сизлернен бир дакъкъа кетсем биле, бирден сизлерни къырып ёкъ этер эдим. Бойлеликнен, ильванларынъызны чыкъарынъыз. Мен исе сизлернен не япаджагъымны тюшюнип бакъарым».

⁶Исраиллилер Хорев деген дагънынъ янында устьлеринден ильванларыны чыкъардылар.

⁷Муса бир чадыр алып, ордудан тыш, авлакъта олгъан ерде оны къойды ве «Корюшюв Чадыры» [27] деп адландырды. РАББИни къыдыргъан эр ким ордудан тыш олгъан Корюшюв Чадырынынъ янына келе эди.

⁸Эр вакъыт Муса Корюшюв Чадырына ёл алгъанда, бутюн халкъ озь чадырларынынъ къапусы огюне турып, Муса Корюшюв Чадырына кирмегендже, онынъ пешинден бакъып тура эдилер.

⁹Муса Корюшюв Чадырына киргенде, булут диреги энип Чадырнынъ къапусы огюнде тура эди, ве РАББИ Мусанен лаф эте эди.

¹⁰Чадырнынъ къапусы огюнде тургъан булут дирегини корьген сайын, бутюн халкъ озь чадыры янында седждеге къапана эди.

¹¹Адам достунен лаф эткен киби, РАББИ де Мусанен юзьме-юзь лаф эте эди. Сонъ Муса ордугъа къайта эди, онынъ яш ярдымджысы Нуннынъ огълу Ехошуа исе Чадырда къала эди.

¹²Муса РАББИге бойле деди: — Сен манъа: «Бу халкъкъа ёлбашчылыкъ эт», — деп айтасынъ, амма меннен кимни йибереджегинъни манъа ачмайсынъ. Сен манъа даа: «Сени пек яхшы билем, сенден мемнюним», — айткъан эдинъ.

¹³Эгер менден мемнюн олсанъ, ялварам, мен Сени яхшы бильмек ичюн, ёлларынъны ач. Сонъ Сен даима менден мемнюн олурсынъ. Амма бу адамлар Сенинъ халкъынъ олгъанларыны унутма.

¹⁴— Сенинъ огюнъден Мен Озюм кетип, санъа раатлыкъ берерим, — деди РАББИ Мусагъа.

¹⁵— Эгер бизнен берабер Озюнъ бармасанъ, — деди Муса, — бизни мындан чыкъарма.

¹⁶Сен бизнен бармасанъ, Сен менден ве исраиллилерден мемнюн олгъанынъны адамлар насыл билирлер? Амма, бизнен барсанъ, мен ве Сенинъ халкъынъ ер юзюндеки халкълардан фаркълы олурмыз.

¹⁷— Менден сорагъанларынъны Мен япарым, — деди РАББИ Мусагъа. — Чюнки сенден мемнюним ве сени пек яхшы билем.

¹⁸— Манъа Шуретинъни косьтер, — деди Муса.

¹⁹— Мен сенинъ огюнъде бутюн эйилигимни косьтеририм ве огюнъде «РАББИ» адымны илян этерим, — деди РАББИ Мусагъа. — Кимни аджымагъа истесем — Мен оны аджырым, кимге мерхамет эйлемеге истесем — Мен онъа мерхамет эйлерим.

²⁰Сонъ даа бойле деди: — Амма Меним бетимни корьмеге олмай, чюнки бетимни корьген адам сагъ къалмайджакъ.

²¹Мына Меним янымда, къаянынъ устюнде тур, — деди РАББИ.

²²— Меним Шуретим кечкенде, Мен сени къаянынъ чатлагъына къоярым. Янынъдан кечмегенимдже, устюнъни къолумнен къапатырым.

²³Къолумны алгъан сонъ исе, сен сыртымны корерсинъ. Бетимни исе сен кормезсинъ.