Read Мукъаддес Китап къырымтатар тилинде, Чыкъыш 34 Bible Online

Чыкъыш 34 - Мукъаддес Китап къырымтатар тилинде, bible

Чыкъыш 34

¹Сонъ РАББИ Мусагъа бойле деди: — Эвелькилерине ошагъан эки тегиз таш кес. Мен оларнынъ устюнде, сен парлагъан эвельки ташларда олгъан сёзлерни бир даа язаджагъым.

²Сабагъа азыр олып, Синай дагъына котериль ве анда, дагънынъ тёпесинде, Меним огюме кель.

³Лякин сеннен берабер кимсе котерильмесин ве дагънынъ устюнде кимсе корюльмесин. Малларнен къой-эчкилер биле, дагънынъ янында отламасын.

⁴Муса эвелькилерине ошагъан эки таш кести. Саба эрте турып, онъа РАББИ эмир эткени киби, Муса эки ташны алып, Синай дагъына котерильди.

⁵РАББИ булут ичинде энди ве, Мусанынъ янында токътап, «РАББИ» адыны илян этти.

⁶РАББИ Мусанынъ юзю огюнде кечти ве бойле илян этти: — РАББИ, РАББИ! Аджыгъан, эйилик эткен, тез ачувланмагъан, пек мераметли ве ишанчлы олгъан Алла!

⁷О, бинълердже несиллерге мераметини эйлей, къабаатны, джинаетни, гунаны багъышлай, лякин джезасыз къалдырмай, бабаларнынъ къабааты ичюн балаларындан ве торунларындан учюнджи ве дёртюнджи несилине къадар сорай.

⁸Муса ашыкъып ерге тюшти ве седждеге къапанды.

⁹О, бойле деди: — Эфендим, эгер менден мемнюн олсанъ, ялварам, Эфендим, бизнен бар. Бу халкъ инат олса да, бизим джинаетлеримизнен гуналарымызны багъышла, ве биз Сенинъ мулькюнъ олайыкъ.

¹⁰— Мына, — деди РАББИ. — Мен сизге васиет этем. Бутюн ер юзюнде ве ич бир халкъта олмагъан аджайип шейлерни эписи исраиллилернинъ огюнде япарым. Араларында сиз яшагъан халкълар Мен сизге япкъан шейлерде РАББИнинъ аджайип ишини корерлер.

¹¹Мен санъа шимди эмир эткенлеримни тут! Мына, Мен сенден аморлыларны, ханаанлыларны, хитлилерни, перизлилерни, хивлилерни ве евуслыларны къувам.

¹²Бакъынъыз, сиз киреджек топракъта яшагъан адамларнен анълашма тизменъиз. Тизсенъиз эгер, олар сиз ичюн къапкъан олурлар.

¹³Оларнынъ къурбан чалынгъан ерлерини урып йыкъынъыз, пут ташларыны парланъыз, Ашера путуна табынма диреклерини кесип ташланъыз!

¹⁴Сиз РАББИден гъайры, башкъа аллагъа табынманъыз, чюнки Онынъ ады — «Куньджю»! О — Куньджю Алла!

¹⁵О ернинъ адамларынен анълашма тизменъиз, чюнки олар, аллаларнынъ оглерине ороспуланып, къурбан чалгъанда, сизни де чагъырырлар. Сиз исе оларнынъ къурбанындан ашарсыз,

¹⁶огъланларынъызны оларнынъ къызларына эвлендирирсиз, къызлары аллаларнынъ оглерине ороспуланып, огъулларынъа да аллаларнынъ оглерине ороспулыкъ эттирирлер.

¹⁷Маден иритип, путлар ясаманъыз!

¹⁸Маясыз Пишкен Пите Байрамыны япынъыз. Мен санъа эмир эткеним киби, тайинленген баарьнинъ ильк куньлеринде [28] еди кунь маясыз пишкен пите ашанъыз, чюнки Мысырдан сиз бу айда чыкъып кеткен эдинъиз.

¹⁹Эписи биринджи догъгъан огъулларынъыз — Менимки. Айванларынъызнынъ да биринджи догъгъан эркек балалары, мал баласы я да къой-эчки баласы да Менимки олсун.

²⁰Эшекнинъ биринджи догъгъан эркек баласы ичюн къой я да эчкининъ эркек баласыны беринъиз. Бермеге истемесенъиз эгер, эшек баласынынъ бойнуны сындырынъыз. Эписи биринджи догъгъан огъланларынъыз ичюн айваннынъ янъы догъгъан баласыны беринъиз. Меним огюме кимсе бош къолнен кельмесин.

²¹Алты кунь чалышынъыз, единджи куню раатланынъыз. Ашлыкъ сачылгъан ве орулгъан вакътында да раатланынъыз.

²²Биринджи богъдай берекетини джыйып, Афталар Байрамыны, я да Биринджи Махсул Байрамыны япынъыз. Берекет джыйылгъан куньлернинъ сонъунда Махсул Джыйылув Байрамыны да япынъыз.

²³Йылда учь кере эписи акъайларынъыз Исраильнинъ Алласы, сенинъ РАББИнъ олгъан Эфендинъ юзю огюне кельсинлер.

²⁴Башкъа халкъларны сенден къувалап, ерлеринъни кенълештиририм. Сиз, РАББИнинъ, Алланъызнынъ юзю огюне йылда учь кере кельгенде, сизинъ топрагъынъызгъа кимсе козь этмез.

²⁵Меним къурбанымнынъ къаныны маялы питенен берабер Манъа кетирменъиз. Песах Байрамынынъ къурбаныны да сабагъадже къалдырманъыз.

²⁶Ернинъ биринджи берекетинден энъ яхшы махсуллары Алланъ олгъан РАББИнинъ эвине кетир. Улакъны анасынынъ сютюнде пиширме.

²⁷РАББИ Мусагъа бойле деди: — Меним бутюн айткъанларымны яз, чюнки бу сёзлерге эсасланып Мен санъа ве исраиллилерге Васиет этем.

²⁸Муса аш ашамайып, сув ичмейип, РАББИнинъ янында 40 кунь ве 40 гедже тура эди. О, Васиет сёзлерини, Он Эмирни ташларда ойып язды.

²⁹Муса, къолларында Шаатлыкънен эки ташны тутып, Синай дагъындан тюшти. Онен Алла лаф эткени ичюн бети нурлар джайрата эди, амма Муса буны бильмей эди.

³⁰Харун ве исраиллилер Мусанынъ бети парылдагъаныны корип, янына бармагъа къоркъа эдилер.

³¹Лякин Муса оларны чагъырды, ве Харуннен джемиетнинъ башлыкълары онынъ янына кельдилер. Муса оларгъа мураджаат этти.

³²Бундан сонъ эписи исраиллилер онынъ янына кельдилер, ве Муса, онъа Синай дагъында РАББИ бутюн айткъанларыны оларгъа эмир этти.

³³Муса оларнен лафыны токътаткъан сонъ, бетини орьтюнен къапатты.

³⁴РАББИнен лаф этмек ичюн Муса Онынъ огюне киргенде ве андан чыкъмагъанындже, бетинден орьтюни ала эди. РАББИнинъ огюнден чыкъкъанда исе, РАББИ онъа не эмир эткен олса, исраиллилерге айтып бере эди.

³⁵Исраиллилер Мусанынъ бети парылдагъаныны коре эдилер, ве Муса, кене РАББИнен лаф этмек ичюн кирмегендже, бетини орьтюнен къапата эди.