Read Мукъаддес Китап къырымтатар тилинде, Чыкъыш 35 Bible Online

Чыкъыш 35 - Мукъаддес Китап къырымтатар тилинде, bible

Чыкъыш 35

¹Муса бутюн Исраиль огъулларынынъ джемиетини джыйып, оларгъа бойле деди: — РАББИ мына нени япмагъа эмир этти:

²«Алты кунь ишлеринъизни этинъиз, единджи кунюнъиз исе сизлерде мукъаддес олсун: РАББИге багъышлангъан Раатлыкъ Куню. Ким Раатлыкъ Куню иш япса, ольдюриледжек.

³Раатлыкъ Кунюнде, яшагъан ерлеринъизде атеш биле якъманъыз».

⁴Исраиль огъулларынынъ бутюн джемиетине Муса даа бойле деди: — РАББИнинъ эмир эткени мына:

⁵«РАББИге бахшышлар этинъиз. Эр биринъиз юрегинден къопкъан бахшышыны: алтын, кумюш, тунч,

⁶мор, мавылы къырмызы, ачыкъ къырмызы юнь, индже ишленген кетен ве эчки юнюнден япылгъан безлерни,

⁷къойларынынъ дибагъ этилип къырмызы ренкке боялангъан ве индже ишленген терилерини, акация тереклерни,

⁸къандиль ичюн зейтюн ягъы, чешит тюрлю шейлерни якъмакъ ичюн зейтюн ягъгъа къошулгъан гузель къокъулы шейлер ве къандиллерде якъмакъ ичюн зейтюн ягъгъа къошулгъан къокъулы отларны,

⁹эфод [29] ве кокректеки торба ичюн шохам деген къыйметли ташлар ве дигер, козьлерге къоюлгъан къыйметли ташларны, — РАББИге кетирсин.

¹⁰Аранъызда олгъан яхшы усталар келип, РАББИнинъ эмир эткенлерини япсынлар:

¹¹Алланынъ Мескенини, онынъ Чадырыны ве устюндеки орьтюсини, дёгмелерини, черчивелерини, сырыкъларыны, диреклерини, темеллерини;

¹²Сандыкъны сырыкъларынен, къапагъы олгъан Мерамет Ерини ве къапаткъан пердени;

¹³столны сырыкъларынен ве алетлеринен берабер ве РАББИнинъ булунувыны косьтерген пителерни;

¹⁴ярыкълатмакъ ичюн къандильни эписи алетлеринен, онынъ лампадларыны ве якъып ярыкълатмакъ ичюн зейтюн ягъны;

¹⁵мукъаддес къокъулы отларны якъмакъ ичюн ерни, онынъ сырыкъларыны, бир шей ягъламакъ ичюн зейтюн ягъны, къокъулы ягъны, Мукъаддес Чадырнынъ къапусына асыладжакъ пердени;

¹⁶айванларны бутюнлей якъмакъ ичюн къурбан ерини, онынъ ичюн тунч пармакълыкъны ве онынъ сырыкъларыны эписи алетлеринен, савутны ве онынъ саджаягъыны;

¹⁷азбарнынъ безлерини, онынъ диреклеринен темеллерини ве азбарнынъ къапусына асыладжакъ пердени;

¹⁸Мукъаддес Чадырнынъ къазычыкъларыны, азбарнынъ къазычыкъларыны ве оларнынъ йиплерини;

¹⁹Мукъаддес Ерде ибадет этмек ичюн нагъышлангъан урбаларыны, руханийликни беджермек ичюн баш руханий Харунгъа азиз урбаларны ве онынъ огъулларына да урбаларны».

²⁰Исраиллилернинъ бутюн джемиети Мусанынъ янындан кеттилер

²¹ве бу ишке къолтутмагъа юреги тарткъан ве джаны истеген эр ким келип, РАББИге Корюшюв Чадырынынъ эписи кереклеринен берабер ве эписи азиз урбалар ичюн олгъан бахшышларны кетире эди.

²²Акъайларнен апайлар келип, юреклеринден къопкъан, тюрлю алтын шейлерни кетире эдилер: инелер, купелер, юзюклер ве боюнджакъларны. Эр кес РАББИге багъышлап алтын кетире эди.

²³Кимде мор, мавылы къырмызы ве ачыкъ къырмызы юнь, индже ишленген кетен, эчки юнюнден япылгъан безлер, къойларынынъ дибагъ этильген ве къырмызы ренкке боялангъан ве индже ишленген терилери олгъан эр ким оларны РАББИге кетире эдилер.

²⁴Кумюш я да тунчны берип олгъан эр ким, оны РАББИге бахшыш оларакъ кетире эди. Эм де кимде акация тереги олса, эр ким оны мукъаддес Чадырнынъ чешит кереклиги ичюн кетире эди.

²⁵Эписи уста олгъан апайлар, озь къолларынен мор, мавылы къырмызы ве ачыкъ къырмызы юнни ишлеп ве индже ишленген кетенни токъуп, оларны кетирдилер.

²⁶Джанлары истеген апайлар усталыкънен эчки юнюнден безлер япа эдилер.

²⁷Башлыкълар исе шохам къыйметли ташларыны ве эфоднен кокректеки торбанынъ юваларына къоюлгъан ташларны,

²⁸къандиль ичюн, ягълайджакъ ягъ ичюн ве къокъулы ягъ ичюн гузель къокъулы шейлер ве зейтюн ягъыны кетире эдилер.

²⁹Бойлеликнен, эписи юреклери тарткъан исраилли акъайларнен апайлар, Муса ярдымынен РАББИ япмагъа эмир эткен эр бир ишке, озь истегинен даа чокъ бахшышлар РАББИге кетире эдилер.

³⁰Сонъ Муса исраиллилерге бойле деди: — Бакъынъыз, РАББИ Ехуда къабилесинден олгъан, Хурнынъ торуны, Урининъ огълу олгъан Бецалелни сайлап алды.

³¹О, оны Алланынъ Рухунен толдурды, онъа икмет, акъыл-ферасет, бильги берди ве эр бир ишни усталыкънен япмагъа огретти.

³²Онынъ ичюн о, планлар чызып, алтыннен, кумюшнен, тунчнен кереги киби чалышмагъа биле,

³³ташларны кесип юваларгъа къоймагъа ве эр бир иш ичюн агъач оймагъа да яхшы биле.

³⁴РАББИ онъа ве Дан къабилесинден олгъан Оголиавнен Ахисамакъкъа башкъа адамларны да огретмеге акъыл берди.

³⁵РАББИ оларгъа чешит тюрлю ишлер япмагъа буюк усталыкъ берди, ве олар оймагъа, токъумагъа ве мор, мавылы къырмызы ве ачыкъ къырмызы юннен индже ишленген кетен устюнде нагъыш нагъышламагъа яхшы билелер. Олар тюрлю планлар чызып, чешит шейлерни усталыкънен япмагъа билелер.