Read Мукъаддес Китап къырымтатар тилинде, Чыкъыш 36 Bible Online

Чыкъыш 36 - Мукъаддес Китап къырымтатар тилинде, bible

Чыкъыш 36

¹— РАББИ Бецалелнен Оголиавгъа ве башкъа адамларгъа Азиз Ерни ве алетлерини къурмакъ ичюн бильги ве усталыкъ берди. Олар эписи бутюн ишни РАББИ насыл айткъан олса, тамам ойле де япсынлар.

²Муса Бецалелни, Оголиавны, эписи РАББИден усталыкъ алгъанларны ве кимни юреги тартса, эписини ишни башлап чалышмагъа чагъыртты.

³Олар Мусадан, ишни беджермек ичюн, Мукъаддес Чадырнынъ эписи кереклерине исраиллилер кетирген бахшышларны алдылар. Исраиллилер исе озь истегинен даа чокъ бахшышлар Мусагъа эр саба эп кетире эдилер.

⁴Сонъ Мукъаддес Чадырнынъ тюрлю ишлерини беджерген эписи усталар, ким насыл иш этсе, о ишни ташлап Мусагъа кельдилер

⁵ве онъа бойле дедилер: — РАББИ япмагъа эмир эткен ишлер ичюн халкъ керегинден зияде кетире.

⁶Муса эмир этип, ордуда бойле илян этильди: «Азиз Ер ичюн не апайлар, не де акъайлар бахшышлар кетирмесинлер!» Сонъ халкъкъа бахшышларыны башкъа кетирмеге бермедилер.

⁷Эписи шейлерни япмакъ ичюн керегини арткъачынен кетирген эдилер.

⁸Ишнен огърашкъан эписи усталар Мескенни он дане индже ишленген кетенден ве мор, мавылы къырмызы ве ачыкъ къырмызы юньден япылгъан безлерден ясадылар. Оларнынъ устьлерине усталыкънен Керувларны [30] нагъышладылар.

⁹Эр безнинъ узунлыгъы 12,6 метр эди, кенълиги — 1,8 метр. Эписи безлер бир ольчюде олдылар.

¹⁰Беш безни бири-бирине тиктилер, къалгъан беш безни де бири-бирине тиктилер.

¹¹Бири-бирине тикильген биринджи безлернинъ бир четинден мор безден ильмеклер ясады, экинджи бири-бирине тикильген безлернинъ бир четинден де ойле яптылар.

¹²Биринджи тикильген безлерге 50 ильмек ясадылар, экинджи бири-бирине тикильген безлернинъ четине де 50 ильмек ясадылар. Ильмеклер бири-бирине къаршы кельдилер.

¹³50 дёгмени алтындан япып, дёгмелернен безлерни бири-бирине дёгмеледилер де, Мескен бир бутюн олды.

¹⁴Мескеннинъ устюни къапатмакъ ичюн, эчки юнюнден безлер яптылар. Безлер он бир дане эдилер.

¹⁵Бир безнинъ узунлыгъы 13,5 метр эди, кенълиги 1,8 метр — бу бир без. Эписи он бир безнинъ ольчюси бир эди.

¹⁶Беш безни бири-биринен айры тиктирди, къалгъан алты безни де бири-бирине айры тиктирди.

¹⁷Безлерден япылгъан эки парчаны багъламакъ ичюн биринджи без парчасынынъ четинде 50 ильмек япты, экинджи онен багъланаджакъ парчанынъ четине де 50 ильмек япты.

¹⁸Орьтюни багъламакъ ичюн, 50 дане тунч дёгме япты, ве бир бутюнлик олды.

¹⁹Тёпесинден дибагъ этильген ве къырмызы ренкке боялангъан териден орьтю япты, онынъ тёпесинден исе индже ишленген терилерден даа бир орьтю япты.

²⁰Мескен ичюн акация терегинден дос-догъру тургъан черчиве ясады.

²¹Оларнынъ узунлыгъы 4,5 метр, кенълиги — 0,68 метр эди.

²²Эр бир черчивенинъ ашагъы къысмында эки багъламалар япты. Мескеннинъ эписи черчивелеринде ойле япты.

²³Мескеннинъ дженюбий тарафы ичюн 20 черчиве,

²⁴бу 20 черчиве тюбюне кумюштен япылгъан 40 темель ясады: бир черчиве тюбюне эки темель, черчивенинъ эки багъламасы тюбюне бирер дане эди.

²⁵Мескеннинъ шималь тарафы ичюн де 20 черчиве ясады.

²⁶Оларнынъ тюбюне де кумюштен япылгъан 40 темель ясады: бир черчиве тюбюне эки темель, черчивенинъ эки багъламасы тюбюне бирер дане эди.

²⁷Мескеннинъ арттаки дивары ичюн гъарп тарафтан алты черчиве ясады.

²⁸Арттаки тарафынынъ кошелери ичюн даа эки черчиве ясады.

²⁹Оларнынъ тюплери бири-бирине багълангъан эдилер, тёпелери де бир алкъагъа багъланды, экиси ичюн де ойле эди. Олар эки кошеде турдылар.

³⁰Бойлеликнен, секиз черчиве олды, оларнынъ тюплерине кумюштен япылгъан он алты темель ясады: бир черчиве тюбюне эки темель эди.

³¹Акация терегинден сырыкълар ясады. Мескеннинъ бир тарафындаки черчивелери ичюн — беш сырыкъ,

³²экинджи тарафындаки черчивелери ичюн — беш сырыкъ ве гъарпкъа бакъкъан арттаки тарафы ичюн де — беш сырыкъ ясады.

³³Черчивелерининъ орталарындан башындан сонъунадже кечеджек ичеридеки сырыкъны ясады.

³⁴Черчивелерини алтыннен къаплады. Сырыкъларны кечирмек ичюн алкъаларны да алтындан япты. Сырыкъларны да алтыннен къаплады.

³⁵Мор, мавылы къырмызы, ачыкъ къырмызы юньден ве индже ишленген кетенден перде япып, онынъ устюне Керувларны усталыкънен нагъышлады.

³⁶Акация терегинден перде ичюн алтын ченгеллери олгъан дёрт дирек япып, оларны алтыннен къаплады. Диреклер тюбюне дёрт кумюш темель япты.

³⁷Мескеннинъ къапусы ичюн мор, мавылы къырмызы, ачыкъ къырмызы юньден ве индже ишленген кетенден нагъышлангъан перде япты.

³⁸Перде ичюн ченгеллери олгъан беш дирек япып, оларнынъ тёпелерини ве багъламаларыны алтыннен къаплады. Диреклер ичюн беш тунч темель япты.