Read Мукъаддес Китап къырымтатар тилинде, Чыкъыш 37 Bible Online

Чыкъыш 37 - Мукъаддес Китап къырымтатар тилинде, bible

Чыкъыш 37

¹Бецалел акация терегинден Сандыкъ япты. Онынъ узунлыгъы 1,13 метр, кенълигинен юксеклиги 0,68 [31] метр эди.

²Ичини ве тышары тарафыны темиз алтыннен къаплады, чевре-четинде орьнекли чембер ясады.

³Алтынны иритип, дёрт алкъа япып, оларны ашагъыдаки дёрт кошесине туттурды: эки алкъа бир тарафындан эди, эки алкъа да экинджи тарафындан эди.

⁴Акация терегинден сырыкълар ясап, оларны да темиз алтыннен къаплады.

⁵Сандыкъны ташымакъ ичюн, онынъ четлеринден сырыкъларны алкъалардан кечирди.

⁶Сандыкънынъ къапагъыны — Мерамет Ерини — темиз алтындан ясады: узунлыгъы 1,13 метр, кенълиги исе 0,68 метр эди.

⁷Мерамет Ерининъ эки четинден, дёгюльген шекильде, эки алтын Керувларны ясады.

⁸Бир Керувны бир четинден, экинджи Керувны экинджи четинден ясады. Оларны ойле япты ки, къапакънынъ эки четинден тюртип чыкътылар.

⁹Керувларнынъ къанатлары Мерамет Ерининъ тёпесини къаплап, юкъары котерильген эдилер. Бетлеринен бири-бирине къаршы турып, Керувлар Мерамет Ерине тараф бакъа эдилер.

¹⁰Акация терегинден стол ясады. Онынъ узунлыгъы 0,9 метр, кенълиги 0,45 метр, юксеклиги де 0,68 метр эди.

¹¹Оны темиз алтыннен къаплап, чевре-четинде орьнекли алтын чембер ясады.

¹²Чевре-четинде он сантиметр кенълигинде рейка япты, рейканынъ чевре-четине исе алтын чембер ясады.

¹³Стол ичюн дёрт алтын алкъа ясап, оларны дёрт кошесинден, дёрт аягъына пекитти.

¹⁴Алкъалар тышарыгъа бакъа эдилер; столны ташымакъ ичюн оларгъа сырыкълар кечириледжек эди.

¹⁵Сырыкъларны акация терегинден ясап, темиз алтыннен къаплады. Олар ярдымынен столны ташырлар.

¹⁶Стол ичюн темиз алтындан, ичерлик бахшышларыны кетирмек ичюн, чанакълар ве пиалалар, гугюмлер ве мешребелерни япты.

¹⁷Сонъ темиз алтындан къандиль япты. Бу къандильни бир кесек маденден дёгди. Темели ве сапы, лампадлар ичюн чаначыкълар, гоньдже ве чичеклери бир кесек маденден дёгюльген эди.

¹⁸Сапынынъ четлеринден алты пытакъ чыкъа эди: учь данеси къандильнинъ бир тарафындан, учь данеси де экинджи тарафындан.

¹⁹Бадем чичегине ошагъан учь чаначыкъ, гоньдже ве чичеклеринен берабер бир пытакъта эди. Бадем чичегине ошагъан учь чаначыкъ даа, гоньдже ве чичеклеринен экинджи пытакъта эди. Къандильден чыкъкъан эписи пытакъларда айны ойле эди.

²⁰Къандильнинъ сапында исе бадем чичегине ошагъан гоньдже ве чичеклеринен олгъан дёрт чаначыкъ япты.

²¹Олар къандильнинъ алты пытагъы чыкъкъан ерлеринде япылгъан эдилер. Эки пытакъ чыкъкъан еринде бир гоньдже, даа эки пытакъ чыкъкъан еринде экинджи гоньдже, даа эки пытакъ чыкъкъан еринде учюнджи гоньдже.

²²Эм гоньджелери, эм пытакълары къандильнинъ сапындан чыкъа эдилер. О, бир бутюнлик олып, бир кесек темиз алтындан япылгъан эди.

²³Онъа темиз алтындан еди лампад, табачыкъларны ве машачыкъларны ясады.

²⁴Къандильни, бутюн алетлеринен, 35 кило [32] темиз алтындан яптылар.

²⁵Акация терегинден мукъаддес къокъулы отларны якъмакъ ичюн ерни япты. Узунлыгъынен кенълиги 0,45 метр олып, о, дёрткоше эди. Юксеклиги 0,9 метр эди. Ондан бойнузлар тюртип чыкъа эдилер.

²⁶Онынъ тёпесини, четлерининъ чевре-четини, бойнузларыны темиз алтыннен къаплады. Устюнден чевре-четине алтын чембер япты.

²⁷Алтындан эки алкъа япып, оларны чембернинъ тюбюнде, отларны якъмакъ ичюн ерни ташымагъа алкъалардан сырыкълар кечирмек ичюн эки четинде пекитти.

²⁸Сырыкъларны акация терегинден япып, алтыннен къаплады.

²⁹Сонъ якъмакъ ичюн мукъаддес ягъны азырлады ве буюк усталыкънен, тер-темиз мис къокъулы ягъны япты.