Read Мукъаддес Китап къырымтатар тилинде, Чыкъыш 38 Bible Online

Чыкъыш 38 - Мукъаддес Китап къырымтатар тилинде, bible

Чыкъыш 38

¹О, акация терегинден, узунлыгъынен кенълиги 2,25 метр олгъан, дёрткоше къурбан чалынгъан ерни япты. Онынъ юксеклиги 1,35 метр эди.

²Дёрт кошесинде тюртип чыкъкъан бойнузлар япты. Бутюн къурбан ерини тунчнен къаплады.

³Къурбан чалынгъан ер ичюн къопкъалар, куречиклер, чанакълар, сенеклер ве куль табакъларыны — эписи алетлерни тунчтан ясады.

⁴Онъа тунчтан чильтернинъ бир чешити олгъан пармакълыкъ япты. Чильтерни къурбан чалынгъан ернинъ ашагъы тарафынынъ четлеринден ойле къойды ки, ортасына къадар етти.

⁵Тунч чильтернинъ дёрт кошесинде сырыкъларны кечирмек ичюн дёрт тунч алкъа ясады.

⁶Къурбан чалынгъан ер ичюн акация терегинден сырыкълар ясап, оларны тунчнен къаплады.

⁷Къурбан чалынгъан ерни ташыгъанда, сырыкъларны онынъ эки четинден алкъаларгъа кечирди. Къурбан чалынгъан ерни тюпсюз, тахтадан япты.

⁸Абдест алмакъ ичюн савутны ве саджаягъыны, Корюшюв Чадырынынъ янында хызмет эткен апайларнынъ кузьгюлеринде олгъан тунчундан ясады.

⁹Мескеннинъ азбарыны да япты: азбарнынъ дженюп тарафы ичюн перделерни индже ишленген кетенден япты, узунлыгъы азбар бою 45 метр эди.

¹⁰Перделерни асмакъ ичюн 20 дирек ясады, диреклер тюбюне 20 тунч темель япты. Диреклердеки ченгеллернен багъламаларны кумюштен ясады.

¹¹Шималь тарафы да 45 метр эди. О, 20 дирек ясады, диреклер тюбюне 20 тунч темель япты. Диреклердеки ченгеллернен багъламаларны кумюштен ясады.

¹²Гъарбий тарафындан олгъан перделернинъ кенълиги 22,5 метр эди. Он дирек, оларнынъ тюбюнде — он темель эди. Диреклердеки ченгеллернен багъламаларны кумюштен ясады.

¹³Азбарнынъ огюнден, шаркъий тарафындан олгъан кенълиги 22,5 метр эди.

¹⁴Киришнинъ бир тарафы ичюн безлернинъ кенълиги 6,75 метр олып, олар ичюн учь темели олгъан учь дирек ясады.

¹⁵Экинджи тарафына да перделернинъ кенълиги 6,75 метр олып, олар ичюн учь темели олгъан учь дирек ясады.

¹⁶Азбарнынъ эписи тарафларына асылгъан перделер индже ишленген кетенден япылгъан эдилер.

¹⁷Азбарнынъ чевре-четинде олгъан диреклердеки багъламаларнен ченгеллерни кумюштен, темеллерини исе тунчтан ясады.

¹⁸Азбарнынъ къапусына асылгъан перде мор, мавылы къырмызы ве ачыкъ къырмызы юнь йиплеринден ве индже ишленген кетенден япылып нагъышнен нагъышлангъан эди. Онынъ узунлыгъы 9 метр, юксеклиги де азбарнынъ перделеринен бир олып 2,35 метр эди.

¹⁹Перделер ичюн дёрт тунч темель устюнде тургъан дёрт дирек ясады, оларнынъ ченгеллеринен багъламаларыны кумюштен ясады, тёпелерини де кумюшнен къаплады.

²⁰Мескеннинъ эписи къазычыкъларынен азбарнынъ къазычыкъларыны тунчтан ясады.

²¹Мына Шаатлыкъ Мескенининъ къурулмасына кеткен масрафларынынъ джедвели. Оны баш руханий Харуннынъ огълу Итамарнынъ ёлбашчылыгъында, Мусанынъ эмиринен Левий къабилесинден акъайлар тиздилер.

²²Эр шейни исе, Мусагъа РАББИ эмир эткени киби, Ехуда къабилесинден олгъан, Хурнынъ торуны, Урининъ огълу Бецалел япты.

²³Онъа, Дан къабилесинден олгъан Ахисамакънынъ огълу Оголиав ярдым этти. О, усталыкънен оймагъа, планлар чызмагъа ве мор, мавылы къырмызы, ачыкъ къырмызы юньден ве индже ишленген кетенде нагъыш нагъышламагъа биле эди.

²⁴Азиз Ернинъ эписи алетлерининъ къурулмасына бахшыш этилип масраф этильген алтын мукъаддес пара ольчюсинен къарарнен 1025 кило [33] эди.

²⁵Джемиетнинъ сайылгъан акъайларындан тюшкен кумюш исе мукъаддес пара ольчюсинен къарарнен 3521 кило [34] эди.

²⁶Оны 20 яшындан буюк олгъан, саювгъа тюшкен 603550 адамдан джыйгъан эдилер, бир адам башына, мукъаддес пара ольчюсинен, алты грамм [35].

²⁷Мукъаддес Ер ве перде темеллерининъ япылмасына 3500 кило кумюш кетти. Юз темель ичюн 3500 кило, я да бир темель ичюн 35 кило кумюш.

²⁸21 кило кумюш исе диреклер ичюн ченгеллернен багъламаларыны ясамакъ ве диреклернинъ тёпелерини къапламакъ ичюн керек эди.

²⁹Бахшыш этильген тунч исе 2480 кило [36] эди.

³⁰Ондан Корюшюв Чадыры къапусы диреклернинъ темеллери, къурбан чалынгъан ернен онынъ чильтери ве эписи алетлери,

³¹азбардаки эписи диреклерининъ темеллери, азбарнынъ къапусындаки диреклернинъ темеллери ве Корюшюв Чадырынынъ ве азбарнынъ эписи къазычыкълары япылгъан эди.