Read Мукъаддес Китап къырымтатар тилинде, Чыкъыш 39 Bible Online

Чыкъыш 39 - Мукъаддес Китап къырымтатар тилинде, bible

Чыкъыш 39

¹Мусагъа РАББИ эмир эткени киби, усталар, Азиз Ерде ибадет этмек ичюн мор, мавылы къырмызы, ачыкъ къырмызы юньден ибадет урбаларны тиктилер. Олар Харун ичюн азиз урбаларны тиктилер.

²Сонъ алтындан ве мор, мавылы къырмызы, ачыкъ къырмызы юнь ийплеринден ве индже ишленген кетенден эфодны яптылар.

³Олар алтынны башта япракъ-япракъ эзип, оны индже йиплерге дагъыттылар ве оларны усталыкънен мор, мавылы къырмызы, ачыкъ къырмызы йиплерининъ арасында ве индже ишленген кетенден кечирдилер.

⁴Онынъ уджларында бири-бирине багълангъан, омузлардан кечирильген, эки къайыш яптылар, о, эки уджундан багълы эди.

⁵Эфоднынъ устюнден кийильген къушакъ да, Мусагъа РАББИ эмир эткени киби, тамам эфод киби, алтындан, мор, мавылы къырмызы, ачыкъ къырмызы юньден ве индже ишленген кетенден япылгъан эди.

⁶Сонъ олар шохам деген къыйметли ташларны алып, алтын юваларгъа отуртты, оларнынъ устюнде де Исраиль огъулларынынъ адларыны, тамгъалар устюнде оюлгъаны киби, ойды.

⁷Мусагъа РАББИ эмир эткени киби, бу эки ташны, Исраиль огъулларына хатырлатма олсун деп, эфоднынъ кушачыкъларына къойды.

⁸Сонъ кокректеки торбаны усталыкънен ясады. О да, тамам эфод киби, алтындан, мор, мавылы къырмызы, ачыкъ къырмызы юньден ве индже ишленген кетенден япылгъан эди.

⁹Онынъ узунлыгъынен кенълиги бирер къарыш [37] олып о, дёрткоше ве эки къатлы эди.

¹⁰Онынъ устюндеки юваларгъа дёрт сырагъа сыралап ташларны къойдылар. Якъут, сары якъут, зумруд ташлары — бу биринджи сыра эди.

¹¹Экинджи сыра: карбункул, кок якъут ве эльмаз.

¹²Учюнджи сыра: яхонт, агат, аметист.

¹³Дертюнджи сыра: хризолит, шохам, яспис. Эписи ташлар алтын юваларгъа къоюлгъан эдилер.

¹⁴Исраиль огъулларынынъ, кичигинден башлап буюгинедже, он эки адына коре бу ташлар он эки дане эди. Эр бир таш устюне, тамгъада олгъаны киби, он эки къабилелернинъ бирер ады оюлгъан эди.

¹⁵Кокректеки торба ичюн темиз алтындан йип дайын орюльген зынджырчыкълар япкъан эдилер.

¹⁶Алтындан эки юва ве эки алкъа япып, оларны кокректеки торбанынъ эки уджуна пекиттилер де,

¹⁷орюльген алтын зынджырчыкъларны кокректеки торбанынъ уджларында олгъан эки алкъагъа кирсеттилер.

¹⁸Зынджырчыкъларнынъ эки бош уджуны эки ювагъа пекитип, бойлеликнен оларны эфод къушачыкъларынынъ ог тарафына пекиттилер.

¹⁹Даа эки алкъа япып, оларны кокректеки торбанынъ, эфодгъа яткъан тарафындаки эки уджуна пекиттилер.

²⁰Ондан сонъ алтындан даа эки алкъа япып, оларны тамам эфоднынъ къушачыгъы устюнден кельген тикишнинъ янында, эфоднынъ эки къушачыгъынынъ тюбюне, ог тарафындан, пекиттилер.

²¹Мусагъа РАББИ эмир эткени киби, кокректеки торбанынъ алкъаларыны эфоднынъ алкъаларына мор юньден ишленген йипнен багъладылар. О, эфод къушачыгъынынъ устюнден эди ве эфоднынъ устюнден тюшмей эди.

²²Эфоднынъ тюбюнден кийильген руханийнинъ урбасыны мор юньден япты.

²³Бу урбада баш кирсетмек ичюн агъыз олсун, агъызнынъ четлери тифтильмесин деп, баш кечирмек ичюн агъзыны пекитти.

²⁴Урбаларнынъ этегинде бойдан-бой мор, мавылы къырмызы ве ачыкъ къырмызы юньден ве индже ишленген кетенден нарчыкълар яптылар.

²⁵Темиз алтындан чанъчыкъларны япып, нарчыкъларнынъ араларында, урбанынъ этегинде, бойдан-бой асып чыкътылар.

²⁶Бойдан-бой чанъчыкъ ве нарчыкъ, чанъчыкъ ве нарчыкъ олды. Мусагъа РАББИ эмир эткени киби, бу урба ибадет этмек ичюн эди.

²⁷Харун ве огъуллары ичюн индже ишленген кетенден япылгъан руханийлик халатларыны тиктилер.

²⁸Индже ишленген кетенден чалманы, башларына саргъыларыны, тюп урбаны япты.

²⁹РАББИ Мусагъа эмир эткени киби, мор, мавылы къырмызы, ачыкъ къырмызы юньден йипишли къушакъны яптылар.

³⁰Темиз алтындан Азизлик таджы ичюн тегиз тахтачыкъ япып, онынъ устюне, тамгъа устюне оюлгъаны киби, «РАББИге Айырылып Азиз Этильген» сёзлерини ойдылар.

³¹Мусагъа РАББИ эмир эткени киби, тахтачыкъны мор йипнен чалма устюне багъладылар.

³²Бойлеликнен, Корюшюв Чадырынынъ бутюн ишлери япылып биткен эди. Исраиллилер, РАББИ Мусагъа насыл эмир эткен олса, ойле де эписини эттилер.

³³Сонъ Мусагъа Мескенни: Чадырны ве онынъ алетлерини, дёгмелерини, черчивелерини, сырыкъларыны, диреклерини, темеллерини,

³⁴къырмызы ренкке боялангъан къой-эчки терилеринден япылгъан орьтюни ве индже ишленген териден япылгъан орьтюни, къапаткъан пердени,

³⁵Шаатлыкъ Сандыгъыны сырыкъларынен ве оны къапаткъан Мерамет Еринен,

³⁶столны алетлеринен берабер ве РАББИнинъ булунувыны косьтерген пителерни,

³⁷темиз алтындан япылгъан къандильни эписи алетлеринен, онынъ устюне къоюлгъан лампадларынен берабер эписи алетлерини ве якъып ярыкълатмакъ ичюн зейтюн ягъны,

³⁸къокъулы отларны якъмакъ ичюн алтындан япылгъан ерни, бир шей ягъламакъ ичюн зейтюн ягъны, мис къокъулы ягъны ве Чадырнынъ къапусына асыладжакъ пердени,

³⁹тунчтан япылгъан къурбан ерини, онынъ ичюн тунч пармакълыкъны, онынъ сырыкъларыны эписи алетлеринен, савутны ве онынъ саджаягъыны,

⁴⁰азбарнынъ перделерини, онынъ диреклеринен темеллерини ве азбарнынъ къапуларында олгъан пердени, къазычыкъларыны ве йиплерини, Мескеннинъ Корюшюв Чадырында ибадет этмек ичюн олгъан эписи алетлерни,

⁴¹Азиз Ерде ибадет этмек ичюн нагъышлангъан урбаларны: руханийликни беджермек ичюн, баш руханий Харунгъа азиз урбаларны ве онынъ огъулларына тикильген урбаларны кетирдилер.

⁴²РАББИ Мусагъа насыл эмир эткен олса, исраиллилер эписи бу ишлерни ойле де яптылар.

⁴³Муса оларнынъ бутюн эткен ишини козьден кечирди ве, олар оны тамам РАББИ эмир эткени киби япкъанларыны корип, оларны багъышлады.