Read Мукъаддес Китап къырымтатар тилинде, Чыкъыш 4 Bible Online

Чыкъыш 4 - Мукъаддес Китап къырымтатар тилинде, bible

Чыкъыш 4

¹Муса исе: — Эгер олар манъа инанмасалар ве сёзюмни динълемейип: «Санъа РАББИ корюнмеди», — деп айтсалар? — деди.

²— Къолунъдаки шей недир? — деди онъа РАББИ. — Таякъ! — деп джевап къайтарды о.

³— Оны ерге ташла, — деди РАББИ. Муса оны ерге ташлады, таякъ йылан олды, ве Муса ондан къачты.

⁴РАББИ Мусагъа: — Къолунъны узат да, оны къуйругъындан тут, — деди. Муса къолуны узатып оны алды, ве йылан онынъ авучында таякъ олды.

⁵— Бунынъ ичюн РАББИ, бабаларынынъ Алласы, Ибраимнинъ Алласы, Исхакънынъ Алласы ве Якъупнынъ Алласы санъа корюнгенине инансынлар.

⁶РАББИ даа бойле деди: — Къолунъны къойнунъа къойса. Муса къолуны къойнуна къойды ве сонъ оны чыкъарды. Иште, онынъ къолу джузам [4] хасталыгъындан къар дайын беязлашты.

⁷— Къолунъны кене къойнунъа къой, — деди РАББИ. Муса кене къолуны къойнуна къойды. Кене оны къойнундан чыкъарды. Иште, къолу кене тени дайын олды.

⁸— Эгер олар санъа инанмасалар ве биринджи аджайип шей оларны инандырмаса, экинджи аджайип шей инандырыр, — деди РАББИ.

⁹— Эгер бу эки аджайип шейге инанмасалар ве сени динълемеселер, о заман дерьядан сув ал да, топракъкъа тёк. Дерьядан алынгъан сув топракъ устюнде къан олур.

¹⁰Муса РАББИге: — Эй, я Раббим! Ялварам, лафым чиркин. Эр вакъыт, балалыгъымдан берли ве Сен меннен, Озь къулунънен лаф этип башлагъанынъда биле, мен бойле эдим. Дудакъларым абдал, тилим де къолайсыз, — деди.

¹¹РАББИ деди: — Адамгъа агъзыны ким берди? Ким оны тильсиз я да сагъыр япа? Онынъ козьлери корьсюн, я да корьмесин деп ким япа? Буны япкъан — Мен, РАББИ, дегильми?

¹²Демек, бар. Сен лакъырды эткенинъде, Мен янынъда олурым. Санъа не айтмагъа керек олгъаныны Мен огретирим.

¹³— Я Раббим! — деди Муса. — Ялварам, башкъасыны, кимни истесенъ, ёлласа.

¹⁴РАББИнинъ Мусагъа къаршы гъазабы къызды, ве О: — Сенинъ Харун деген, Левий къабилесинден олгъан агъанъ бар, керчекми? О, дюльбер лакъырды этип олгъаныны билем. О, сенинъ къаршынъа чыкъар ве сени корип, джан-юректен къуваныр.

¹⁵Сен онъа айтарсынъ ве сёзлерни онынъ агъзына къоярсынъ. Мен исе, сен лакъырды эткенде, сенинъ янынъда, о, лакъырды эткенде де, онынъ янында олурым. Сизге не япмакъ керек оладжагъыны Мен сизге огретирим.

¹⁶Сенинъ еринъе халкъкъа о, айтаджакъ. О, сенинъ агъзынъ оладжакъ, сен исе онъа Алла ерине олурсынъ.

¹⁷Бу таякъны исе къолунъа ал, онен сен аджайип шейлерни япаджакъсынъ, — деп айтты.

¹⁸Муса кетип, къайнатасы олгъан Итрогъа къайтты. Онъа: — Мен Мысырда олгъан халкъыма къайтайым. Олар даа сагъмы-ёкъмы экен бакъайым, — деди. Итро Мусагъа: — Аман-эсен бар, — деди.

¹⁹РАББИ Мусагъа Мидьянда: «Мысыргъа къайтып кет, чюнки сени ольдюрмеге истегенлер эписи ольдилер», — деген эди.

²⁰Муса апайыны ве огъулларыны алып, эшекке отуртты ве Мысыр топрагъына къайтты. Алланынъ таягъыны да Муса къолуна алды.

²¹РАББИ Мусагъа: — Мысыргъа къайтып баргъанынъдан сонъ, эписи аджайип шейлерни Мен санъа берген къуветнен фыравуннынъ козю огюнде яп. Мен исе онынъ юрегини таш киби этерим, ве о, халкъны йибермез.

²²[22-23] Фыравунгъа бойле деп айт: «РАББИ: “Исраиль — Меним биринджи догъгъан огълумдыр. Мен санъа бойле деп айтам: Огълумны, Манъа ибадет этсин деп, йибер. Эгер йибермесенъ, Мен сенинъ огълунъны, биринджи догъгъан огълунъны ольдюририм”, — деп айта», — деди.

²⁴Ёл бою геджелемеге токътагъанда, РАББИ Мусагъа кельди ве оны ольдюрмеге истеди.

²⁵О заман Циппора, чакъмакътан япылгъан пычакъны алып, огълуны сюннет этти ве кесильген тери парчасыны Мусанынъ аякъларына тийип, онъа: — Сен меним къан киевимсинъ, — деди.

²⁶Сонъ РАББИ Мусадан чекильди. О заман Циппора: «Къан киевимсинъ», — дегенде, о, сюннет акъкъында айта эди.

²⁷РАББИ Харунгъа: — Мусаны къаршыламакъ ичюн, сахрагъа кет, — деди. Харун кетип, Мусанен Алланынъ дагъы янында корюшти ве оны опьти.

²⁸Муса Харунгъа оны ёллагъан РАББИнинъ эписи сёзлерини айтып берди, ве Онынъ эмир эткен эписи аляметлери акъкъында икяе этти.

²⁹Муса Харуннен барып, Исраиль огъулларынынъ эписи акъсакъалларыны топладылар.

³⁰Харун РАББИнинъ Мусагъа айткъан эписи сёзлерини айтып берди. Муса исе халкънынъ козьлери огюнде эписи аджайип шейлерни япты.

³¹Сонъ халкъ инанды. Олар Исраиль огъулларына РАББИ келип, оларнынъ чеккен зулумларыны корьгенини эшиттилер. Ондан сонъ олар седждеге къапанып ибадет эттилер.