Read Мукъаддес Китап къырымтатар тилинде, Чыкъыш 40 Bible Online

Чыкъыш 40 - Мукъаддес Китап къырымтатар тилинде, bible

Чыкъыш 40

¹РАББИ Мусагъа бойле деди:

²— Биринджи айнынъ биринджи кунюнде Мескенни — Корюшюв Чадырыны къой.

³Анда Шаатлыкъ Сандыгъыны кирсетип къой да, оны перденен къапат.

⁴Сонъ столны кетирип, устюне эписи шейлерини къой. Къандильни кетирип, онынъ устюне лампадларыны къой.

⁵Къокъулы отларны якъмакъ ичюн алтындан япылгъан ерни Шаатлыкънынъ огюнден къойып, Мескеннинъ къапусына пердени ас.

⁶Сонъ айванларны бутюнлей якъмакъ ичюн къурбан ерини Мескеннинъ — Корюшюв Чадырынынъ къапусы огюнде къой.

⁷Абдест алмакъ ичюн савутны Корюшюв Чадырынен къурбан ерининъ арасына къойып, ичини сувгъа толдур.

⁸Азбарны безлернен къоралап, азбарнынъ къапусына пердени ас.

⁹Якъыладжакъ ягъны алып, онен Мескенни ве ичинде олгъан эр бир шейини ягълап, оны ве онынъ эписи алетлерини айырып азиз эт. Сонъ о азизлик олур.

¹⁰Айванларны бутюнлей якъмакъ ичюн къурбан ерини ве онынъ бутюн алетлерини ягълап, къурбан ерини айырып азиз эт. Сонъ къурбан ери пек улу азизлик олур.

¹¹Абдест алмакъ ичюн савутны саджаягъынен ягълап, оларны айырып азиз эт.

¹²Харуннен огъулларыны Корюшюв Чадырынынъ къапусына кетирип, оларны ювундыр.

¹³Харуннынъ устюне азиз урбаларыны кийдирип, оны ягънен ягълап, айырып азиз эт. О, руханий оларакъ Манъа хызмет этеджек.

¹⁴Огъулларыны да кетирип, устьлерине руханийлик халатларыны кийдир.

¹⁵Бабалары киби, оларны ягънен ягъла. Сонъ олар руханий оларакъ Манъа хызмет этеджеклер. Бойле этип, ягънен ягъланып, олар ве оларнынъ эвлятлары эбедиен руханий оладжакълар.

¹⁶Муса, РАББИ онъа насыл эмир эткен олса, эписини ойле де этти.

¹⁷Мысырдан чыкъкъанларына экинджи йылнынъ биринджи айындаки биринджи кунюнде Мескен къоюлгъан эди.

¹⁸Муса Мескенни къойгъанда, темеллерини къойды, черчивелерини котерди, сырыкъларыны кечирди ве диреклерини къойды.

¹⁹Сонъ Мескеннинъ устюнден орьтюни джайратты, орьтюлернинъ устюни де, РАББИ эмир эткени киби, даа бир орьтюнен къапатты.

²⁰Шаатлыкъны алып, Сандыкънынъ ичине къойды, Сандыкънынъ алкъаларындан сырыкъларны кечирди ве тёпесине къапакъ олгъан Мерамет Ерини къойды.

²¹Сандыкъны Мескен ичине кирсетип ве оны къапаткъан пердени асып, РАББИ онъа эмир эткени киби, Шаатлыкъ Сандыгъыны къапатты.

²²Корюшюв Чадырында, Мескеннинъ шималь тарафында, перденинъ огюнде столны къойды.

²³Столнынъ устюне, РАББИ онъа эмир эткени киби, Муса РАББИнинъ огюнде сыранен пителерни къойды.

²⁴Сонъ Корюшюв Чадырында, Мескеннинъ дженюп тарафында, столнынъ къаршысында къандильни къойып,

²⁵РАББИ эмир эткени киби, РАББИнинъ огюнде лампадларны къойды.

²⁶Корюшюв Чадырында, перденинъ огюнден, алтындан япылгъан ерни къойып,

²⁷РАББИ онъа эмир эткени киби, ернинъ устюнде мис къокъулы отларны якъты.

²⁸Сонъ Корюшюв Чадырынынъ къапусына пердени асты.

²⁹Айванларны бутюнлей якъмакъ ичюн къурбан ерини Мескеннинъ — Корюшюв Чадырынынъ къапусы огюне къойды ве, РАББИ онъа эмир эткени киби, онынъ устюнде айванлар къурбанларыны чалып бутюнлей якъты ве ашлыкъ бахшышларыны кетирди.

³⁰Корюшюв Чадырынен къурбан ерининъ арасында абдест алмакъ ичюн савутны къойып, ичини сувгъа толдурды.

³¹О савуттан Муса, Харун ве онынъ огъуллары сув алып къолларынен аякъларыны юва эдилер.

³²РАББИ Мусагъа эмир эткени киби, Корюшюв Чадырына киргенде, я да къурбан чалынгъан ерге якъынлашкъанда, даима абдест ала эдилер.

³³Сонъ Мескеннинъ ве къурбан ери азбарынынъ чевре-четини къоралады ве азбарнынъ къапусына перделерни асты. Бойле эттирип, Муса ишини битирди.

³⁴Сонъ Корюшюв Чадырынынъ устюни булут сарды, ве Мескеннинъ ичини РАББИнинъ Шурети толдурды.

³⁵Муса Корюшюв Чадырынынъ ичине киралмай эди, чюнки булут оны сарып алгъан эди, ве РАББИнинъ Шурети Мескенни толдургъан эди.

³⁶Исраиллилернинъ бутюн долашкъан вакъытларында, Мескеннинъ устюнден булут котерильгенде, олар ёлгъа чыкъа эдилер.

³⁷Булут котерильмесе эгер, олар, о, котерильмегендже, ёлгъа чыкъмай эдилер.

³⁸Бутюн долашкъан вакъытларында, эписи исраиллилернинъ козю огюнде, Мескеннинъ устюнде куньдюз РАББИнинъ булуты эди, геджесинен исе атеш эди.