Read Мукъаддес Китап къырымтатар тилинде, Чыкъыш 6 Bible Online

Чыкъыш 6 - Мукъаддес Китап къырымтатар тилинде, bible

Чыкъыш 6

¹РАББИ исе Мусагъа: — Энди Мен фыравуннен не япаджагъымны корерсинъ. Къудретиме бойсунып, о, оларны йиберер. Къудретиме бойсунып, оларны озь топрагъындан къувалар биле, — деди.

²Алла Мусагъа бойле деди: — Мен — РАББИ.

³Мен Ибраимге, Исхакъкъа, Якъупкъа «Къудретли Алла» адынен келе эдим, лякин Мен «РАББИ» деген адымнен оларгъа ачылмадым.

⁴Мен оларгъа Ханаан топрагъыны, олар вакътынджа яшагъан топракъны бермеге васиет эттим.

⁵Мен мысырлылар исраиллилерни къуллукъта туткъанлары акъкъында оларнынъ инъильтилерини эшиттим ве Озюмнинъ васиетимни хатырладым.

⁶Бойлеликнен, Исраиль огъулларына айт: «Мен — РАББИ. Сизни мысырлыларнынъ зулумындан алып чыкъарым, оларнынъ къуллугъындан азат этерим ве къудретимни косьтерип буюк белялар ярдымынен сизлерни къуртарырым.

⁷Сизни Озюм халкъым этип, къабул этерим ве сизге Алла олурым. Сонъ сиз Мен — РАББИ сизни Мысыр топрагъындан, Мысыр зулумындан алып чыкъкъан сизинъ Алланъыз олгъанымны билирсинъиз.

⁸Мен сизни Ибраимге, Исхакъкъа ве Якъупкъа бермеге емин эткен топракъкъа кирсетирим ве оны мулькюнъиз этип, сизге берерим. Мен — РАББИ».

⁹Муса буны Исраиль огъулларына айтты, лякин олар рухтан тюшкенлери ве къуллугъы агъыр олгъаны себебинден Мусаны динълемедилер.

¹⁰РАББИ Мусагъа даа бойле деди:

¹¹— Фыравунгъа, Мысыр падишасына барып, онъа, Исраиль огъулларыны озь топрагъындан йиберсин, деп айт.

¹²Муса РАББИнинъ огюнде бойле деди: — Бакъ, Исраиль огъуллары биле мени динълемейлер, насыл этип фыравун мени динълейджек? Чиркин меним лафым.

¹³Сонъ РАББИ Муса ве Харуннен лаф этип, Исраиль огъулларыны Мысыр топрагъындан чыкъармакъ ичюн, Исраиль огъулларына ве Мысыр падишасы олгъан фыравунгъа аит эмирлерни оларгъа берди.

¹⁴Мына, исраилли къабилелерининъ башлыкълары. Исраильнинъ биринджи огълу олгъан Рубеннинъ огъуллары: Ханох, Паллу, Хецрон ве Карми. Бу — Рубенден чыкъкъан къоранталар.

¹⁵Шимеоннынъ огъуллары: Емуэл, Ямин, Охад, Яхин, Цохар ве ханаанлы къызнынъ огълу Шаул. Бу — Шимеондан чыкъкъан къоранталар.

¹⁶Мына, къоранталарына коре, Левий огъулларынынъ адлары: Гершон, Кехат ве Мерарий. Левий 137 йыл яшады.

¹⁷Гершоннынъ огъуллары: Ливни, Шимий ве оларнынъ къоранталары.

¹⁸Кехатнынъ огъуллары: Амрам, Ицхар, Хеврон ве Уззиэл. Кехат 133 йыл яшады.

¹⁹Мерарийнинъ огъуллары: Махлий ве Муший. Мына, эвлятларына коре, Левийден чыкъкъан къоранталар.

²⁰Амрам аласы Екеведге эвленди, ве о, Амрамгъа Харун ве Мусаны тапты. Амрам 137 йыл яшады.

²¹Ицхарнынъ огъуллары: Корах, Нефег ве Зикри.

²²Уззиэлнинъ огъуллары: Мишаэл, Элцафан ве Ситри.

²³Харун Нахшоннынъ къыз къардашы олгъан Амминадавнынъ къызына Элишевагъа эвленди. О, Харунгъа Надав, Авиху, Элазар ве Итамар адлы огъулларны тапты.

²⁴Корахнынъ огъуллары: Ассир, Элкъана ве Авиасаф. Бу — Корахтан чыкъкъан къоранталар.

²⁵Харуннынъ огълу Элазар Путиэлнинъ бир къызына эвленди. О, Харунгъа Пинехасны тапты. Мына, къоранталарына коре, Левий къабилелерининъ башлыкълары.

²⁶Мына Харун ве Муса. РАББИ оларгъа бойле айткъан эди: — Исраиль огъулларыны ордуларынен Мысыр топрагъындан алып чыкъынъыз.

²⁷Мысыр падишасы олгъан фыравунгъа да, олар — Муса ве Харун озьлери, Исраиль огъулларыны Мысыр топрагъындан алып чыкъмакъ акъкъында айткъан эдилер.

²⁸Бойлеликнен, РАББИ Мысыр топрагъында Мусанен лаф эткенде,

²⁹онъа бойле айткъан эди: — Мен — РАББИ! Мысыр падишасы олгъан фыравунгъа Мен санъа бутюн айткъанларымны айт.

³⁰Муса исе РАББИнинъ огюнде: — Иште, меним нутугъым чиркин. Насыл этип, фыравун меним айткъанларымны динълейджек? — деди.