Read Мукъаддес Китап къырымтатар тилинде, Чыкъыш 7 Bible Online

Чыкъыш 7 - Мукъаддес Китап къырымтатар тилинде, bible

Чыкъыш 7

¹Лякин РАББИ Мусагъа бойле деп айтты: — Бакъ, Мен сени фыравунгъа Алла киби этип къойдым, агъанъ Харун да сенинъ пейгъамберинъ оладжакъ.

²Мен санъа бутюн эмир эткенлеримни онъа айтаджакъсынъ. Агъанъ Харун исе, Исраиль огъулларыны озь топрагъындан йиберсин деп, фыравунгъа айтаджакъ.

³Лякин Мен онынъ юрегини таш киби этерим ве Мысыр топрагъында чокътан-чокъ аляметлеримни ве аджайип шейлеримни япарым.

⁴Фыравун сизни динълемейджек, ве Мен, Озь къудретимни косьтерип, буюк белялар ярдымынен Меним ордуларымны, Исраиль огъулларынынъ халкъыны Мысыр топрагъындан алып чыкъарым.

⁵Мен, Озь къудретимни Мысыргъа косьтерип, Исраиль огъулларыны мысырлыларынъ арасындан алып чыкъкъанымдан сонъ, эписи мысырлылар «Мен — РАББИ» олгъанымны билирлер.

⁶Муса ве Харун, РАББИ насыл айткъан олса, ойле де яптылар.

⁷Олар фыравунгъа буны айтып башлагъанларында, Муса 80 яшына эди, агъасы Харун исе — 83.

⁸[8-9] РАББИ Мусагъа ве Харунгъа: — Фыравун сизге: «Аджайип шей япынъыз», — деп айтса, сен Харунгъа: «Таягъынъны ал да, фыравуннынъ огюне ташла. Таякъ йылан олур», — деп айт, — деди.

¹⁰Муса ве Харун, фыравунгъа келип, РАББИ эмир эткени дайын яптылар. Харун таягъыны фыравун ве онынъ къуллары огюнде ташлады, ве о, йылан олды.

¹¹Фыравун акъыллы адамларны ве ырымджыларны чагъыртты. Бу Мысыр тылсымджылары озь тылсымларынен айны шуны яптылар:

¹²олардан эр бири озь таягъыны ташлады, ве олар йыланлар олдылар. Амма Харуннынъ таягъы оларнынъ таякъларыны ютты.

¹³Фыравуннынъ юреги таш киби олды, ве РАББИ айткъаны дайын, о, оларны динълемеди.

¹⁴РАББИ Мусагъа бойле деп айтты: — Фыравуннынъ юреги инат, халкъны йибермеге истемей.

¹⁵Ярын йылангъа айлангъан таягъынъны къолунъа алып, фыравунгъа бар да, о, сув янына чыкъкъанда, сен онынъ ёлунда, дерья ялысында тур.

¹⁶Онъа да бойле деп айт: «РАББИ, еудийлернинъ Алласы мени санъа буны айтмакъ ичюн ёллады: “Манъа сахрада ибадет этсинлер деп, Меним халкъымны йибер”. Лякин сен аля даа динълемединъ.

¹⁷РАББИ бойле айта: “Мен — РАББИ олгъанымны сен япкъанларымдан билирсинъ”. Мына бу къолумдаки таякънен мен Ниль дерьядаки сувгъа урарым, ве о, къангъа айланыр.

¹⁸Дерьядаки балыкъ олер, дерья да фена къокъу даркъатып башлар, ве мысырлылар дерьядаки сувны ичип оламазлар».

¹⁹Сонъ РАББИ Мусагъа бойле деди: — Агъанъ Харунгъа бойле деп айт: «Таягъынъны алып, къолунъны Мысыр топрагъынынъ сувларына: онынъ озенлерине, сув акъынларына, голлерине ве эписи хавузларына тараф котер. Олар къангъа айланырлар, бутюн Мысыр топрагъындаки эм таш, эм агъач савутларында биле къан олур».

²⁰Муса ве Харун, РАББИ оларгъа насыл эмир эткен олса, ойле де яптылар. Харун, фыравун ве онынъ къулларынынъ козьлери огюнде озь таягъыны котерип, дерья сувуна урды ве дерьядаки бутюн сув къангъа айланды.

²¹Дерьядаки балыкъ олип озен сасыгъаны ичюн, мысырлылар дерьядаки сувны ичип оламай эдилер. Бутюн Мысыр топрагъында къан эди.

²²Амма Мысыр тылсымджылары озь тылсымларынен айны шуны яптылар. Фыравуннынъ юреги таш киби олды, ве о, РАББИ айткъаны киби, Мусанен Харунны динълемеди.

²³Фыравун айланып эвине кетти. Лякин бу шейлер онъа тесир этмеди.

²⁴Эписи мысырлылар исе ичмеге сув тапмакъ ичюн дерья янындаки ерни къазып башладылар, чюнки олар озендеки сувны ичип оламай эдилер.

²⁵РАББИ дерьяны харап эткенине еди кунь толды.