Read Мукъаддес Китап къырымтатар тилинде, Чыкъыш 8 Bible Online

Чыкъыш 8 - Мукъаддес Китап къырымтатар тилинде, bible

Чыкъыш 8

¹РАББИ Мусагъа бойле деп айтты: — Фыравунгъа барып, онъа айт: «РАББИ бойле айта: “Манъа ибадет этмек ичюн, халкъымны йибер.

²Оларны йибермеге разы олмасанъ эгер, Мен бутюн сенинъ топрагъынъны бакъаларгъа толдурырым.

³Дерьянынъ ичи бакъаларгъа толып-ташар, ве олар чыкъып, сенинъ эвинъе, юкълагъан еринъе, тёшегинъе, хызметчилеринънинъ ве халкъынънынъ эвлерине, собаларынъа ве хамыр савутларынъа биле кирерлер.

⁴Олар сенинъ, халкъынънынъ ве эписи хызметчилеринънинъ устюне чыкъарлар”».

⁵Сонъ РАББИ Мусагъа бойле деди: — Агъанъ Харунгъа бойле деп айт: «Таягъынъны алып, къолунъны озенлернинъ, сув акъымларынынъ ве голлернинъ устьлерине узатып, Мысыр топрагъына бакъаларны чыкъар».

⁶Харун къолуны Мысыр сувларынынъ устюне узатып, бакъаларны чыкъарды, ве бакъалар чыкъып, Мысыр топрагъыны къапладылар.

⁷Амма Мысыр тылсымджылары, озьлерининъ тылсымларынен айны шуны япып, бакъаларны Мысыр топрагъына чыкъардылар.

⁸Сонъ фыравун, Мусанен Харунны чагъыртып, оларгъа: — Менден ве халкъымдан бакъаларны ёкъ этсин деп, РАББИге мен ичюн дуа этинъиз. Сонъ мен, РАББИге къурбан чалмакъ ичюн, Исраиль халкъыны йиберерим, — деп айтты.

⁹Муса фыравунгъа бойле деди: — Бакъалар сенде, халкъынъда, эвлеринъде ёкъ олып, тек дерьяда къалсынлар деп, сен ичюн, хызметчилеринъ ве халкъынъ ичюн дуа этеджегимнинъ вакътыны манъа озюнъ бильдир.

¹⁰Фыравун онъа: — Ярын, — деп айтты. Муса онъа бойле джевап берди: — Айткъанынъ киби олур. Бойледже биль: бизим Алламыз олгъан РАББИ киби кимсе ёкъ.

¹¹Бакъалар сенден, эвлеринъден, хызметчилеринъден ве халкъынъдан кетерлер. Олар тек Ниль дерьясында къалырлар.

¹²Муса ве Харун фыравундан чыкъкъан сонъ, Муса фыравунгъа ёллангъан бакъалар акъкъында РАББИге дуа этти.

¹³РАББИ Муса сорагъаны киби, этти: бакъалар мысырлыларнынъ эвлеринде, азбарларында, тарлаларында ольдилер.

¹⁴Оларны обаладылар, ве ер сасып башлады.

¹⁵Фыравун, енгиллик олгъаныны корип, юрегини таш киби къаттырды ве, РАББИ айткъаны дайын, Мусанен Харунны динълемеди.

¹⁶Сонъ РАББИ Мусагъа бойле деп айтты: — Харунгъа бойле деп айт: «Таягъынъны котерип, оны топракъкъа ур, ве бутюн Мысыр топрагъынынъ тозу боджеклерге айланыр».

¹⁷Олар ойле де яптылар. Харун, къолундаки таягъыны котерип, топракъкъа урды, ве адамларнен айванларнынъ устю боджеклерге толды. Бутюн Мысыр топрагъы бою топракъ тозу боджеклерге айланды.

¹⁸Тылсымджылар озь тылсымларынен боджеклерни япмагъа тырыштылар, амма япып оламадылар. Адамларнен айванларнынъ устю-башы исе боджек эди.

¹⁹Сонъ тылсымджылар фыравунгъа: — Керчектен, аллалар озь къудретини косьтерелер, — деп айттылар. Лякин фыравуннынъ юреги таш киби къатты эди, ве о, РАББИ айткъаны киби, динълемеди.

²⁰РАББИ Мусагъа бойле деп айтты: — Ярын саба эрте турып, фыравун сувнынъ янына кельгенде, онынъ огюне бар ве онъа айт: «РАББИ бойле деп айта: “Сахрада Манъа ибадет этсин деп, халкъымны йибер.

²¹Меним халкъымны йибермесенъ эгер, Мен санъа, хызметчилеринъе, халкъынъа ве эвлеринъе чокътан-чокъ копек чибинлерини ёлларым, ве мысырлыларнынъ эвлеринен яшагъан ерлери чибинлерге толур.

²²О куню Меним халкъым яшагъан Гошен топрагъыны Мен айырарым, ве анда чибинлер олмаз. О заман, Мен — РАББИ, бу топракъта олгъанымны билирсинъ.

²³Меним халкъымны чибинлерден къорчалап, оны сенинъ халкъынъдан фаркълы этеджегим. Бу алямет ярын оладжакъ”».

²⁴РАББИ ойле де япты: фыравуннынъ эвине, хызметчилерининъ эвлерине ве бутюн Мысыр топрагъына чокътан-чокъ чибинлер учып кельди. Ер юзю чибинлерден харап олаята эди.

²⁵Фыравун, Мусанен Харунны озюне чагъыртып, оларгъа: — Бу топракътан кетмейип, сизинъ Алланъызгъа къурбан чалынъыз, — деди.

²⁶Лякин Муса онъа бойле джевап къайтарды: — Буны япмакънынъ чареси ёкъ, чюнки РАББИге къурбан чалсакъ, мысырлылар ичюн бу арам олур. Мысырлылар ичюн арам олгъан къурбанны оларнынъ козьлери огюнде чалсакъ эгер, олар бизлерни ташларнен урмазлармы?

²⁷Биз учь куньлюк ёлгъа сахрагъа чыкъайыкъ ве, РАББИ бизге айткъаны киби, Онъа, бизим Алламызгъа къурбан чалайыкъ.

²⁸Фыравун бойле деп айтты: — Сахрада РАББИге, сизинъ Алланъызгъа къурбан чалмакъ ичюн, мен сизни йиберерим, тек узакъ кетменъиз. Меним ичюн дуа этинъиз.

²⁹Муса бойле джевап къайтарды: — Иште, мен сенден чыкъып кетип, РАББИге дуа этерим, ве чибинлер сенден, хызметчилеринъден, халкъынъдан ярын учып кетерлер. Тек, РАББИге къурбан чалмакъ ичюн халкъны йибермейип, яландан вазгеч.

³⁰Сонъ Муса фыравундан чыкъып, РАББИге дуа этти.

³¹РАББИ Муса сорагъаны киби япып, фыравундан, онынъ хызметчилеринден ве халкъындан чибинлерни ёкъ этти, бир данеси биле къалмады.

³²Лякин фыравун юрегини таш киби этти ве кене де халкъны йибермеди.